[انسان عادي]

السلام عليكم ورحمة الله وبركاته
طاروق المبدعين عبدالله الهذلي وزايد ابن عدله بين ايديكم

زايد ابن عدله
مرحبا من هاجسً ياخذ من السبع الطوايف==في محل أهل الوفاء والجود والعلم الثمينا
ياسليل هذيل سج الخيل والفنجال كايف==وانتظر بالاوله بالثانيه لا تحترينا

عبدالله السعيدي

البقاء ماوايق السرحان فالرجم المنايف==عادت السرحان يبدي عالي الرجم الزبينا
الخيول انسجها ومدربه ماهي عسايف==اخذ منا الاوله والمد من ذرب اليمينا

زايد ابن عدله
البطاله سيطرت والشعب صار بلا وظايف==والدليله شعب أهل تونس وزين العابدينا
ياوسيع العرف متنبيك ماعقّب خلايف==ماطلع مبدع على منهج سلوم المبدعينا


عبدالله السعيدي
عزنا بالله وابومتعب وراع المجد نايف ==دامت ان حكامنا ال سعود حنا مغتنينا
وانت يراع المطيه خل حملتها خفايف ==لا تثقل حملها . تبرك وتقرع بالحنينا

زايد ابن عدله
ياسفير هذيل كانك من كلام الحق خايف==انكسر عود الثمامه وانقطع عرق الوتينا
ماعلى العاقل ملام ولا على العاجز كلايف==يرحم الله والديك ويرحم الله والدينا

عبدالله السعيدي

يابن عدله عدل القالات لا تصبح عجايف ==مانخاف وعلمنا مجرود لن رحنا وجينا
انت فارس تنوي الغاره وتبلش فالنكايف==وانت مادينت لك حاجه ولا نته مســتدينا

زايد ابن عدله
الله الله والله الله ماعلى الدنيا حسايف==مير حنّا من بعض كشف السوالف مستحينا
قلت لك ياشاعر الهذلان ماعودت عايف==تايلندا عن بني مسعود تنشد صحرا سينا

عبدالله السعيدي

الله الله راح علمك مثل طلقات القذايف ==لو ماصـابت تروع في العباد الامنينا
انت تدري عن بني مسعود بعيونك وشايف==والبنادم حدد الله لـــه مصــيره فالجبينا



زايد ابن عدله
كان فيكم جن يالهذلان فيه اشهار طايف==ماخلق ربي عبث مير العباد العابثينا
النبي فبلادكم ياهذيل ماحصلّ ولايف==واذبحوه القوم والهذلان كانوا محتسينا

عبدالله السعيدي
انت عينت الجمـــال اللي تـدرهم بالسفــايف==وسمها وسمك وحايل دونها شاطي ومينا
النبي صحابته منا وبيضان الصحايف ==اقر تاريخ الرجال اللي يسر الناظرينا


زايد ابن عدله
وسمها وسم الشرف والعز مافيها حلايف==شرّعت في وادي الهذلان في جرد السنينا
ماخبرنا الانبياء بهذيل علاّقة سلايف==ولانصدق في حديث هذيل لو هو ملتحينا

منقول
من موقع قبيله العوامره الرسمي
آمل ان تنال اعجابكم

الموضوع الأصلي: طاروق بين الشاعرين المبدعين زايد ابن عدله وعبدالله السعيدي الهذلي | | الكاتب: انسان عادي | | المصدر: شبكة بني عبس

[سلمان العويمري]

يعطيك العافه على النقل ومحاروه من الوزن الثقيل مادامت من طرف ابن عدله ولايهون الهذيلي

[ابو موسى]

يا سلام عليك يابن عدله انت والهذلي

[كاتب الرشيدي]

نقل مميز وصح لسان الشاعرين

وينقل للمحاورات المنقوله

[انسان عادي]

اقتباس من مشاركة سلمان العويمري يعطيك العافه على النقل ومحاروه من الوزن الثقيل مادامت من طرف ابن عدله ولايهون الهذيلي

لاهنت على المرور

[ناصر الخياري]

صح لسان الشعاار ..
لاااااهنت ..