[عوده الخياري]

بديت بذكر من جاب موسى على التابوت
ورده على امه رد بمره وتيسيره
سميعن سمع تسبيح يونس ببطن الحوت
عليمن يعلم الغيب سره وتدبيره
ونجاء نبيه في حمامه وعنكبوت
من الشر وهل الشر وعطاهم الحيره
نصر قائد الاسلام في معركة جالوت
مدمر هل الناقه عذابه وتدميره
بعد ماذكرت الله ماني رجل شموت
ابنصح نصيحة خير للي بهم غيره
على السنه الغراء نبي منهم الثبوت
نفكر سواء والشر نطرد جماهيره
انا ابنصح اللي ساهرينن على البالوت
نصيحه لوجه الله مابالسهر خيره
واليا قام يلعب صارو الجالسين اشتوت
ولاكاسبن بيزه ولاكاسبن ليره
ولايستفيد الا لجاجه ورفع الصوت
وجاره من اللجه يبي يكره الجيره
وتكشفك لونك من اول رجل صموت
ويشره عليك العاقل اللي بتفكيره
وعشاقها من ليلته لف عشر بيوت
يدور على السهرات ياكثر تدويره
وبيته واهل بيته تقل عنه في بيروت
من العصر حتى البح تصحي عصافيره
ولو يمرضون اطفال ولا نقصهم قوت
يوش خانة السهره ووشي معاذيره
يتروح حياته كلبوها ضياع وقوت
ايضيع حياته حكم وشكل وتسفيره
يعكر مزاجه كل ما كبت الكبوت
يعير خويه والخوي قل تقديره
وعند السراء يدحم زميله يشوته شوت
وهذا يقوم وذاك يجلس بدل غيره
من اظرارها الكبرى صلاة الفجر تفوت
اليا جاء يقوم تقول بالجسم تخديره
ولوتساله بمور دينه يصيبه لوت
قليلن جوابه واضحن منه تقصيره
ومن اظرارها الصغرى تجمع لك الحتحوت
رجال بمناضرهم ولاهم على السيره
قليلن حياهم بس لجه وخبص كروت
ويعطي ظهره الجل بالعمد ويديره
وراس الزقاره كنها مبخرة حانوت
ويوذي رجالن جالسه كثر تعميره
ولاتميز الصاحي ولا تميز السربوت
تجيب المشاكل والبلاء في حثافيره
تبعد عن الانذال ومجالس العكروت
قليل الحيا اللي ماتهمه معاييره
عدوا الشريعه لايجيك وعطه شلوت
ترى مخلط الاجرب على الحول تاثيره
وتراء المرجله ماهي وناسه ولبس ابشوت
تراء المرجله في طاعة الله وتكبيره
تهجد وصل الفرض دايم بخمس اوقوت
تهجد بجوف الليل ثم اطلب الخيره
وخفض الجناح لوالدينك على السكوت
وتراء البر في ولديك ياعظم تبريره
وتكريم جارك ثم قولت لضيفك فوت
وحييت بالزاير وبينت تقديره
واليا عدوا اهل الخير خلك رجل منعوت
ولاتصير جاهل والجهل فيه تاخيره
تعلم فان العلم يرفع عماد بيوت
من المهد حتى اللحد تسعى لتطويره
وتراء الجهل يهدم ثم يجي البنا منكوت
وتراء العلم نورن والجهل مظلم النيره
تحفظ كتاب الله ياحظك المبخوت
تامل اباياته وقوله وتفسيره
تغانم زمانك قبل لايفوت الفوت
قبل لاتموت وثم ترحل عن الديره
تراء العمر والله ياولد مقتفيه الموت
ولايضيع عمرك بين لعبه وتصفيره
خذ حساب يوم تصير في داخل المنحوت
بقبرن يضمك ثم تكشف تقاريره
تراء ابسط عذاب الاخره جمرتن بسبوت
ويغلي دماغ الادمي مع مناخيره
وصلاة ربي عد مايخضرن اخبوت
على محمد اللي له مناهج وله سيره

الموضوع الأصلي: قصيده ونصيحه عنوانها البالوت للشاعر عوده | | الكاتب: عوده الخياري | | المصدر: شبكة بني عبس

[ميلاس]

‎
صح لسآنك واعتلآ شآنك <..
‏ ‏

[يوسف الاسود]

تراء المرجله في طاعة الله وتكبيره
تهجد وصل الفرض دايم بخمس اوقوت

صح لسانك ياابويوسف شاعر كبير وابن شاعريشهدله التاريخ الشعري واتمنى لك التوفيق ...

[عبدالله معزي]

صح لسانك وجزاك الله خير

[حامد الحنيفان]

صح لسانك على هالقصيده الجزله التى تعتبر من القصائد الشامخه0
في مخاطبة اخواننا الذي لهم هوايت لعب البلوت ويعلم الله اننى بعد ماقراتها دعيت لك من كل قلبي
واقول الله يجزاك خير 0 وانا ارى والراي السديد راجع للمشرفين والمراقبين ان يقوموا في تنسيقها واتثبيت لنها تستحق التثبيت
لما تحمله من المواعظ والعبر للانسان0 وتقبل مروري وحترامي

[احمد منيف]

انا من عادتي أي بيت او بيتين يعجبني انسخهم لكن والله ثم والله ان القصيده كلها قويه من البدايه الا النهايه

وانا مع اخوي ( حامد ) القصيده تستاهل التثبيت ،،، ماشالله عليك اخوي الله لايضرك

عجني هالبيت لما قريته ابتسم وقلت عز الله انك ماضلمتهم :)

وعند السراء يدحم زميله يشوته شوت وهذا يقوم وذاك يجلس بدل غيره

هههه تستاهل خمس نجووووووووووووووم تحياتي لك

[راع العرفاء]

شكرا000اخواني على مروركم الرائع

[بنساك]

الله عليــك يا ابو يــوسف


وهذه الابيــات تستحق التنسيق والتثبيت

انت شاعر لست بحاجة شهادتــنـا

ولكننا سعــداء بأنضمامك لنــا

تقبل احترامي