[الهنوف]

السلام عليكم و رحمة الله و بركاته


الصبـي وان طـاب طيبـه مـن خوالـه ،،، بـالـخـوال يــســال قــبل الـوالـديـنـي
أشـــرب الفـنـجـال واكــــب الـبـيـالـة ،،، تــابــعٍ سـلـمــي ســلــوم الأولـيــنــي

من لا يعرف .. هذين البيتين .. بيتين أشهر من نار على علم ..



قد يجهل البعض قائلهما .. ولكن اكيد سمع بالبيتين من قبل ..



حتى اصبح مضرب مثل يتداوله كثير من الناس ..



قائل هذين البيتين ..



الشاعر / راشد بن حسن بن مانع بن رحيان الضاعني الملقب بــ ابن الذيب وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..



راشد بن حسن .. كان يشتغل في شركة ارامكوا السعوديه .. وكان يقود سيارة الشركه ( جمس ارامكوا ) ..
وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل على سيارة الشركه حتى اشتهر عند البدوان لا جا احد يبي يروح مكان ولا عنده مطيه والا موتريمشي في طريقه ويقول عسا يلقاني ( ابن الذيب ) على الطريق والا انا القاه ..



ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..



جاء يوم من الايام الا عجوز وعندها غنم تعد على الاصابع و ( راشد بن حسن ) .. كان مشغول ومتأخر على الدوام شوي



وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..



يوم جاها قالها يامره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..



قالت له العجوز .. خلاص رح الله يستر عليك ياولدي



انا جالسه هنا انتظر ابن الذيب



هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه
( ابن الذيب ) .. هو نفسه اللي هي تكلمه ..



يوم انصدم ( راشد بن حسن ) بقولها .. وتعجب !!



قال اركبي يا خاله انا ( ابن الذيب ) وابشري بعزك ..



ابوصلك انتي وغنمك ..



وكانت انظمة ارامكو تمنع السائقين ان يشيلوالرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم
حتى وصل علم .. للشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤسائه يأسوا من المحاوله معه .. واعجبتهم شهامته..



وصل العجوز إلى منصاها والمكان اللي تبيه ..



وقال هذهـ القصيده .


قالهـا ابـن الذيـب مـن هاجـوس بالـه ،،، كلـمـةٍ يـلـعـب بـهــا والـبــال زيـنـي
قـالـهــا يــومــه طــرالــه مـاطــرالــه ،،، مـن هواجـيـسٍ تشـيـب المرضعيـنـي
حـالـفٍ مـاخـذ عـلـى الطـرقـي ريـالـه ،،، وبـالـثـلاث مـحــرم أنــــه مايـجـيـنـي
لالقيـت اللـي علـى ( السكـه ) لحالـه ،،، يلـتـفـت ويـقــول ويـــن المستحـيـنـي
أوقـف المـوتـر حـيـا وأبــي الجمـالـه ،،، يــوم ولــد الــلاش وجـهــه مايلـيـنـي
الطـمـع فــي كــروة الرجـلـي رذالـــة ،،، خـص وان جـابـه مـجـال الغانميـنـي
والــردي فــي حـالـةٍ مـاهــيب حـالـه ،،، واعـويـنــه مــــن كــــلام الطيـبـيـنـي
الـــردي لـــو بـــان مـايـذكـر عـمـالـه ،،، مـايـعـد الـــلاش مـقـصـور اليمـيـنـي
أركـبــه لـعـيـون مـــن زيـــنٍ دلالــــه ،،، ماتـحـاكـوا فـــي قـفــاه الرامـسـيـنـي
مابـغـى غـيـري وانــا مابـغـى بـدالـه ،،، قـاعــدٍ لـــي بـالـرجـا مـــدة سنـيـنـي
الصبـي وان طـاب طيبـه مـن خوالـه ،،، بـالـخـوال يــســال قــبل الـوالـديـنـي
أشـــرب الفـنـجـال واكــــب الـبـيـالـة ،،، تــابــعٍ سـلـمــي ســلــوم الأولـيــنــي
ولاقـعـدنــا بـالـعـمـل بــنــا الــرزالـــة ،،، نـاخــذ العـلـيـا طــريــق الفـايـزيـنـي
غـرنـي بـعـض الـرجـال بكـثـر مـالــه ،،، مادرى ان المـوت فـي حبـل الوتينـي
كيـف ينفعنـي وابـا(..........) خـالـه ،،، مايـقـوم البـيـت دام الـسـاس طـيـنـي
مـاش ويــنا الـي عـوايـده الجمـالـة ،،، مثـل ابـن ظافـر حـمـد ليـتـه يجيـنـي
الـثـنـا والـجــود دايـــم فـــي خـيـالــه ،،، عـلـمــه ظــافــر ســلــوم الطـيـبـيـنـي
جـــــوّد الـعـلـيــا ولـزمّــهــا عـيــالــه ،،، وادركــوا مــن علمـتـه دنـيـا وديـنـي
واهنـي مـن بـاع حظـه واشتـرى لــه ،،، وسار في درب النبي وأخزى اللعيني
مـوقــفــه مــاكـــل رجــــــال يــنــالــه ،،، مــن بـغـى مـمـشـاه يـقـعـد مرتـيـنـي
كـم ذبـح مـن حـايـلٍ مــن حــر مـالـه ،،، وعـادتـه لـطـمـة خـشــوم العايلـيـنـي

و سلامتكم ،،،

الموضوع الأصلي: الصبي ان طاب ..طيبه من خواله !! | | الكاتب: الهنوف | | المصدر: شبكة بني عبس

[الاجهر]

حـالـفٍ مـاخـذ عـلـى الطـرقـي ريـالـه ،،، وبـالـثـلاث مـحــرم أنــــه مايـجـيـنـي
لالقيـت اللـي علـى ( السكـه ) لحالـه ،،، يلـتـفـت ويـقــول ويـــن المستحـيـنـي

صح السان الشاعر رحمه الله ولاهنتي اختى الهنوف على سرد التعريف بالشاعر مع القصيدة - اقلام مانعدمها

[رسام الغروب]

رحم الله الشاعر

وتسلمين على القصة الرائعه
لاهنتي الهنوف

[سعد عبدالله]

الصبـي وان طـاب طيبـه مـن خوالـه ،
...
اتوقع ان البيت الصحيح..
الولد وان طاب طيبه من خواله ....


عندي سؤال ...
انتي ...طايحه بعجوز..تسولف لك,, ولا وش الســالفــه .
اشوفك كل شويه منزله سوالف عجايز ...

بس صراحه .
السالفه الي تطلع منكـ ..لو كانت مغبــره ...تجي منكـ ...ماركه عالميــه ,,,,,^_^

شكرا يالهنوف

[الهنوف]

اقتباس من مشاركة ¸¸~ mujazif ~¸¸ الصبـي وان طـاب طيبـه مـن خوالـه ، ... اتوقع ان البيت الصحيح.. الولد وان طاب طيبه من خواله .... عندي سؤال ... انتي ...طايحه بعجوز..تسولف لك,, ولا وش الســالفــه . اشوفك كل شويه منزله سوالف عجايز ... بس صراحه . السالفه الي تطلع منكـ ..لو كانت مغبــره ...تجي منكـ ...ماركه عالميــه ,,,,,^_^ شكرا يالهنوف

هههههههههههههههههههههههههه
الله يسعدك مجازف
والقصة ومافيها أني أميل لقراءة هالنوعية للعظة والعبرة او سلوك وتصرف الشخصية :)

حياااااااكم الله جميعاً
لاحرمني الله هذا التواجد
.
.
.

[(ابوعواض)]

الله يعطيك العافيه

ونفس ماقال مجازف

الولد وان طاب طيبه

اما الصبي العجوز اللي تسولفلك جيزانيه ؟
ههههههههههههههه

وانتشر عنه انه ابن الذيب

والصحيح خر الذيب

الله يعافيك يالهنوف

[الجدي1]

السلام عليكم ورحمة الله وبركاته

[ساااره]

مشكوووووره ولاهنت
والله يرحم الشاعر
وياحلاة سوالف الاولين
وعلومهم