[قسورة الغاب]

السلام عليكم ورحمة الله وبركاته


شعراء مبدعين تم الكشف عنهم اليكم محاورة

الداب الارقط ومحمد البغيلي



محمد عياد البغيلي

سلام للي قرأ الموضوع والعلم نور *** السالفه واضحة وانتم تعرفونها
الجو غيمه تتداحم و الرحاوي تدور ***والداب مدري علامه صار من دونها

الداب الارقط;

يامرحبا من هحوس ن ماتخفى بالامور000تعرف علوم ن مع الـــــعالم يقولونها
من بـــعدها يالبغيـلي مانقـول مــعذور000من بعد بدلت بشتك قصرت ردونها

محمد عياد البغيلي;

دام البقا وأنت حاول لا تلف وتدور *** قبل الاوادم عليك إتلد بعيونها
مالك ومال السحاب وجارحات الطيور***خلك على الارض لا تبلش بمجنونها

لداب الارقط;

من فوق غصن الشجر نسمع نغيق الطيور000والشجره ام الطيور نهزهز غصونها
ان كان مانته على صكات بقعا صبور000ريّح ضميرك وخل الناس في شونها

محمد عياد البغيلي

إ تـهزها يوم حيلك بيدته الجذور ***إ موثقه كلها من ختم مأمونها
لكن تفٌهم بعلم ن جاك بين السطور***قدام تكويك جمرتها بغليونها

الداب الارقط;

النقش ماينمسح من فوق حيد الصخور000لاكن حط البضاعه وسط كرتونها
اثر الــــــبغيلي ليا ذا لحــين دمــــه يفور000مايدري ان السوالف باح مكنونها

محمد عياد البغيلي

النقش لك والصخر له نحت يبقى دهور ***ولا انت خزنتك قلي ويش مخزونها
الداب داب الحنش ولا انت وسط الجحور*** الحية ام الجنيب وباين قرونها

الداب الارقط;

من بعض ماقلت يامحمد تضيق الصدور000والا المعاني لها ناس ن يحلونها
الداب اثر نابه اقشر صار فيك محفور000يابو عيونن هدبها يغطي اجفونها

محمد عياد البغيلي

ياللي عكست الشوارع لاتلوم المرور *** مدام شرواك مايحميه قانونها

ماهوب أنا اللي تقوله يا قصير الشبور ***غرتك ناس معادنها قلٌب لونها

صح الله اللسنتكم

الموضوع الأصلي: تنسيق محاورة محمد البغيلي والداب الارقط | | الكاتب: قسورة الغاب | | المصدر: شبكة بني عبس

[محمد عياد البغيلي]

صح بدنك وتسلم ايدينك على التنسيق وشهادتك وسام على صدري

وصح لسان أخوي الداب الارقط

وتقبل مرووري

[كنترول القاف]

يا سلام يا ابن عياد

انا هاقي انك لو تقعد مده بسيطه بالمنتدى هذا راح يكون قصيدك اقوى

وانا ما اقول ان لعبك هذا ماهو قوي بالعكس لعب فتل ونقض بس انا طامع انه يكون اقوى بعد

[محمد عياد البغيلي]

كنترول القاف

شهادة أعتز فيها ويعلم الله إن أحد تلاميذكم ويمكن البعض يجهل عمري

أقولهم إن عمري 21 سنه يعني شاعر مبتدئ وصغير سنه
ومنكم نستفيد ,,,
وشرفتني ياكنترول بمرورك وتقبل تحياتي لشخصك

أخوك محمد البغيلي