[راعي البلها]

معلث المقوعي *** يمدح الشيخ/ دليم بن براك

السلام عليكم ورحمة الله وبركاته
اقدم لكم هذه القصيده لشاعر الكبير /معلث المقوعي رحمه الله واسكنه فسيح جناته
والقصيده طويله ومكونه من تسع وتسعين بيت ولكن للاسف لم احصل عليها كامله
وهذه بعض الابيات من هذه القصيده ..

قال المقوعي هيض العصـر مابـه=من واهج(ن) باقصى الضماير لهدها
من واهج(ن) قام يتطـارد سرابـه=ضيق على بيبـان قلبـي عمدهـا
ابيات من قلـب المقوعـي حكابـه=بافكار واذكـار(ن) يولـف عددهـا
يوم ان ابـن بـراك جانـا كتابـه=دليم شوق اللي صغيـر(ن) نهدهـا
مخلي سروج الخيل حامـي عقابـه=خيال وضح(ن) ربعت فـي جلدهـا
حامـي جوانـب ديرتـه بالحرابـه=بعركات لقوات(ن) يطيح بنصدهـا
يشيب بها راس الولد مـع شبابـه=لا غاب عن خطو الحمولة سعدهـا
صفت و صفاهـا و غـدا جنابـه=بشهود ورجـال(ن) تقلـط سندهـا
بعيال تنفـى مرهـا عـن شرابـه=شيخـان لحيـاض المنايـا تردهـا
و دليم حبس الخيل لا عـض نابـه=يمنـاه باللقـوات تحمـي طردهـا
و دليم لا قالوا عن الشيـخ طابـه=يفعل مفاعيـل(ن) لبـوه يحمدهـا
ابن نحيت حجـاب جـود صوابـه=خـلاه جيـان العلـم مـا يردهـا
حلف عليه و حدره مـن هضابـه=برادات من ينشي المزون ورعدهـا
وادي الرمة حمى الرشيدي جنابـه=يقولهـا راع المثـل مـا جحدهـا
و اخوات بقشة شمسهم يوم غابـه=نزل لهـم بيـن النفـود و جلدهـا
بايمـن شريفـه يشبعـن الذيابـه=اولاد وايل طيـر شلـوى جلدهـا
تسعين لحيـه كلهـم مـن قرابـه=غير الرجـال اللـي تعـدد افندهـا
وابن سويلـم والعواجـي سطابـه=هـدم مبانيهـا و قرشـع عمدهـا
و حتى الشويب من فعولـه رمابـه=ومطير حمـران النواظـر سردهـا
كل القبايـل طيـر شلـوى تهابـه=لـولا فعولـه مـا تـورث بلدهـا
يادليم ابـن بـراك ينعـاف مابـه=من يوم أهل ضرغط تقاوت جهدها
من يوم اهل ضرغط غدالها ضبابه=هاك الوجيه اللي كثير(ن) حسدهـا
غيالة الشيطـان مـن قـرد مابـه=قامت تقصـد يـوم ربـي قردهـا
يالضرغطي ياشيـن مالـك مهابـه=دنيـاك لاتقلـب عليـك بوعدهـا
تـروح عـدك سفـه مـن ترابـه=والله مايبـرى عيونـك رمـدهـا
اقصر مطبك كـان تـدرى عقابـه=لايضربونك ضربـة(ن) ماتحمدهـا
لاتعترض سـن الرشـا واقترابـه=تفوت نفسـك قبـل ياتـي عددهـا
تقصر وحظـك جادعـه بالخرابـه=باللـي يـورون العـداوه نكـدهـا
بني رشيـد بنجـد مثـل الذيابـه=يوم انت تـروي للنعامـه ولدهـا

الموضوع الأصلي: معلث المقوعي *** يمدح الشيخ/ دليم بن براك | | الكاتب: راعي البلها | | المصدر: شبكة بني عبس

[عبسيه كويتيه]

يسلموووو خيو ونعم بشيوخنا

[صادق الوعد]

مشكور راعي البلها على نقل القصيده لشاعر ...... معلث المقوعي رحمة الله عليه


يستاهل المدح .. الشيخ والفارس دليم بن براك رحمة الله عليه

[راعي البلها]

اقتباس من مشاركة عبسيه كويتيه يسلموووو خيو ونعم بشيوخنا

الله يسلمج عبسيه كويتيه واشكرج على مرورج وردج

[راعي البلها]

اقتباس من مشاركة صادق الوعد مشكور راعي البلها على نقل القصيده لشاعر ...... معلث المقوعي رحمة الله عليه يستاهل المدح .. الشيخ والفارس دليم بن براك رحمة الله عليه

العفو صادق الوعد ويعطيك العافيه على التواصل والردود المستمره :)

[فواز الدواي]

رحمهم الله جميع

قصيده وافيه بس بعض الاخطاء المطبعيه بدل عددها وعدها

ويوم انت ترمي على ماظن للنعامه ولدها

لاهنت تقبل مروري

[بنت العبسي]

الف شكر وصح لسان قايلها وتسلم يمين ناقلها

[نشمي الرشيدي]

صح لسان الشاعر العملاق معلث المقوعي واسكنه فسيح جناته والشيخ دليم ابن براك رحمه الله يستاهل المدح وهو فارس غني عن التعريف
ويعطيك العافيه ياراعي البلها على النقل