[فيصل الرشيدي]

هذي مشاركة بن ساقان في برنامج شاعر المليون .. وللأسف لا القصيدة ولا الشاعر اخذ حقه في المسابقه
انا اعتبر هذي القصيده من روائع الشعر النبطي ومن اكثرها انسانيه

بن ساقان وصف في القصيده حال الشايب الي يطلب الناس في الشارع ومعاناته بدقه شديده

صور لنا كل معاناته واوجاعه و ( تأهأهاته ) "ان صح التعبير" .. لدرجه انك اذا عشت جو القصيده تشوف الشايب قدامك

اترككم مع القصيده الي تقول :

على صبح العويل بصدر هاك العود يا درويش=صحى والنار تاكل من حطب جوعه صبا بنته
نهض وبنيته تفرك محاجرها.. يبه به عيش=يبه والصمت حار .. وثرثره للطفله ادفنته
وقام يمتر الشارع على عكازته بشويش=يدور من صباح النور .. نور باهت ازمنته
وشنق حلمه خيوط الشعاع وبزغه التغبيش=تكفكف عينه وينعق بلمه..اغراب ونونته
وامر احيان من حوله ولا يطالع ..تدري ليش؟=يخاف تقول عيني يا فقير الحال ..هذا انته ؟
واحاول ازرع الرئفه بارض تنبت التطنيش=ابي لامن يبس من شهبها قمت وتسوسنته
يا ليت اكون طير وحالته جنحان ولا ريش=عشان ان كل ما ضميت جنحاني تحضنته
ابيه يعيش زي ما هالاوادم بالحياة تعيش=مع ان مدة يديني قبر وقروشي هي اكفنته
كثر ما تصرخ ايده بالفقر يا محسنين قريش=كثر ما صافح من الفقر حاله واكثر احزنته
وانا كل ما عطيته قرش حس القرش له بخشيش=عشان يقوم يدعي لي عسى ماعيش بامحنته
وشفه يسابق اصغار القطط على فتات.. الويش؟!!=يا عمي خلني ساكت.. تهد الحال انأنته
تخيل بيده العيش وعجز لا ياكل من العيش=لان ما عاد به حيل كثر ماوجاعه اوهنته
واخذ كف الرصيف يلقمه من نظره التهميش=واخذت امضغ وجعه وكل ما غصيت عاينته
يدسدس باقي اوجاعه على جنب الرصيف بخيش=يخاف ان حزنه يضيق صدر بيته على بنته
كأنه لا تأه آه.. شفت وجهه في مرايا الطيش=ملامح شايب متهدل وجهه من ازمنته
ولا اصعب من تهجاي الوجع في نظره الدرويش=سوى لا من قرى في وجهك الرحمه ليا عنته

الموضوع الأصلي: مشاركة بن ساقان في برنامج شاعر المليون | | الكاتب: فيصل الرشيدي | | المصدر: شبكة بني عبس

[خالد العويمري]

مشكورررررر على القصيدة الجميله

[سعد بن عادي]

بيض الله وجهك فيصل على نقل القصيده الاكثر من رائعه

وصح لسانك ولسان شاعرها

دمتم كما تحبون

[عبدالعزيز الخياري]

تسلم يافيصل على النقل المميز وصح لسان الشاعر بن ساقان

[عابد الرشيدي]

بيض الله وجهك فيصل على نقل القصيده الاكثر من رائعه

وصح السان الشاعر ابن ساقان