[بدر حيي]

انقل لكم هذه القصيده بعنوان ( حسبي الله ونعم الوكيل )لشاعر المبدع عبدالله باتل الملقب في (البحر الميت) وهي قصيده جديده





كـل شــئ بالـكـلام وكــل شــئ بالـسـلام لاتـلـوم ولاتــلام وحـــســـبـــي الله ونــــعـــــم الـــوكـــيـــل
مايترك الواحد فـي حالـه كـلٍ ينقـل جوالـه ونـاسٍ حالتهـم حالـه وحـــســـبـــي الله ونــــعـــــم الـــوكـــيـــل
وانـا مانـي متضايـق لكـن مانـي رايـق لـكـن هــذي حقـايـق وحـــســـبـــي الله ونــــعـــــم الـــوكـــيـــل
اللي يسمن يضعف عقله وعليك يثقل ماأنـت ونقلـه والاتصيبـه رقلـه وحـــســـبـــي الله ونــــعـــــم الـــوكـــيـــل
نـوبٍ يجينـي مطفـل كنـه علـي مكفـل إمـا يجـفـل وإلا يجَـفِـلْ وحـــســـبـــي الله ونــــعـــــم الـــوكـــيـــل
نـوبٍ يجينـي بليـد يقـول ماجيـت الوليـد بــاردٍ مـثـل الجلـيـد وحـــســـبـــي الله ونــــعـــــم الـــوكـــيـــل
ونوبٍ يجينـي حيـوان يقـول طلعلـك ديـوان ورجـالٍ مثـل النسـوان وحـــســـبـــي الله ونــــعـــــم الـــوكـــيـــل
وأنـا والله ماشكيـت وانـا والله مـا حكـيـت وانــا والله مابكـيـت وحـــســـبـــي الله ونــــعـــــم الـــوكـــيـــل
والناس ماهي مضبوطه وناسٍ مع ناس مربوطه ولاهي في شئ مغبوطه وحـــســـبـــي الله ونــــعـــــم الـــوكـــيـــل
بعد الاسهم كن الناس اكثرهم وضعه منحاس ولالـه قلـب ولا لـه راس وحـــســـبـــي الله ونــــعـــــم الـــوكـــيـــل
وبعض منهم مثل اللوقي مايعرف واجب وحقوقي وينس مثـل السلوقـي وحـــســـبـــي الله ونــــعـــــم الـــوكـــيـــل
إما بعضهم منافق ولازم تسمعلـه وتوافـق ويخلـق مـن مـاءٍ دافـق وحـــســـبـــي الله ونــــعـــــم الـــوكـــيـــل
إما اكثرهم سمع وطاعه دائماً بإذنيه السماعه وعليه لـو تزعـل ساعـه وحـــســـبـــي الله ونــــعـــــم الـــوكـــيـــل
من إرضاها تشوفه راضي وجه بشوش وفضفاضي ولاهو بعنها معتاضي وحـــســـبـــي الله ونــــعـــــم الـــوكـــيـــل
إما اكثرهم مصلحجي يشطف شطف ويصنج صنجي ومثل العنقز منه تنجي وحـــســـبـــي الله ونــــعـــــم الـــوكـــيـــل
إما بعضهـم محطـه ينقـل كـلام ويمطـه ويحـب المشـوي والشطـه وحـــســـبـــي الله ونــــعـــــم الـــوكـــيـــل
إما بعضهـم منحـاز وحمـار يبيلـه منقـاز وإن خاويتـه خـوة غـاز وحـــســـبـــي الله ونــــعـــــم الـــوكـــيـــل
إما بعضهم غريافي ويهوى الطلعه بالاريافي ولاله نـور ولاهـو طافـي وحـــســـبـــي الله ونــــعـــــم الـــوكـــيـــل
وإما بعضهم ملعون ومـن مانعيـن الماعـون وعسـى مثلـه لطاعـون وحـــســـبـــي الله ونــــعـــــم الـــوكـــيـــل
وكلٍ يبغى يصيـد الثانـي ويبيلـه شـئ مجانـي وكـلٍ يـذم الزمانـي وحـــســـبـــي الله ونــــعـــــم الـــوكـــيـــل
وفيهم نحس وفيهم شكـه ولامـن بعضهـم فكـه والبـاب كـلٍ يصكـه وحـــســـبـــي الله ونــــعـــــم الـــوكـــيـــل
وإما اللي عنده دراهم مايبغـى يجلـس وياهـم يشغلونـه كانـه جاهـم وحـــســـبـــي الله ونــــعـــــم الـــوكـــيـــل
وهذا زمـانٍ فضيـع يبيلـه وجـهٍ وسيـع نـاسٍ واجـد فيـه تضيـع وحـــســـبـــي الله ونــــعـــــم الـــوكـــيـــل
وهذا زمان البلاوي الكبده هـي ويـا الكـلاوي والهلالـي والنصـراوي وحـــســـبـــي الله ونــــعـــــم الـــوكـــيـــل
وغنيه دائم منحاش وفقيره ماهو معتـاش وكـم سكـار وكـم حشـاش وحـــســـبـــي الله ونــــعـــــم الـــوكـــيـــل
وكثرو فيه المظلومين وبالغصب صار التأميـن يالله معـي قولـو اميـن وحـــســـبـــي الله ونــــعـــــم الـــوكـــيـــل
وانا نفسي نفسٍ حـره فـي حائـل والابالحـره والحقيقـه دائـم مـره وحـــســـبـــي الله ونــــعـــــم الـــوكـــيـــل
وانا رجالٍ عبسي بشعري وبهمي وبلبسي واشرب شاهي واشرب بيبسـي وحـــســـبـــي الله ونــــعـــــم الـــوكـــيـــل
إما الدنيا بشكل عام عاثـو فيهـا بنـي سـام وفيهـا غريـب الاسـلام وحـــســـبـــي الله ونــــعـــــم الـــوكـــيـــل
وبالعـراق بكـل يـوم كـم يقتـل مسلـم مظلـوم لامجهـول ولامعلـوم وحـــســـبـــي الله ونــــعـــــم الـــوكـــيـــل
والافغان المساكيـن صـارو مالهـم دكاكيـن ولحقوهـم بأقصـى بكيـن وحـــســـبـــي الله ونــــعـــــم الـــوكـــيـــل
واعذروني بالتقصيـر ولانـي عـارف وش يصيـر ولكـن لله المصيـر وحـــســـبـــي الله ونــــعـــــم الـــوكـــيـــل
واختمها في ذكر الله وصـلاة الله وسـلام الله علـى محمـد رسـول الله وحـــســـبـــي الله ونــــعـــــم الـــوكـــيـــل

الموضوع الأصلي: عبدالله باتل حسبي الله ونعم الوكيل | | الكاتب: بدر حيي | | المصدر: شبكة بني عبس

[فهيد الشويلعي]

صح السان الشاعر عبدالله باتل
لا هنت ع النقل

[مداروفلك]

وانا نفسي نفسٍ حـره فـي حائـل والابالحـره والحقيقـه دائـم مـره؟؟ وحــســبـــي الله ونــعـــم الــوكـــيـــل
وانا رجالٍ عبسي بشعري وبهمي وبلبسي واشرب شاهي واشرب بيبسـي؟؟ وحــســبــي الله ونــعــم الـوكــيــل
******************
صح السان الشاعر /عبدالله باتل

وبيض الله وجهك على النقل

ومشكووووووور