[عايض بن صالح]

السلام عليكم ورحمة الله وبركاته

اسعد الله جميع اوقاتكم بالخير إليكم هذه المساجله التي تعبر عن نفسها

بيني وبين الشاعر

مريف علي الرشيدي

عساها تحوز على رضاكم

يقول مريف

ياللي نقلت ورحت ماعاد يمديك=ترجع ولكن رافقتك السلامه
نقلت من طيبه على شان غاليك= وادعت طيبه بالتجاه اليمامه
طالت سنينك مبعداتن حراويك= طيراً على ماقيل يطرد حمامه
الشيب والله ياسعد بايناً فيك=ماينفعك صبغه ولبس العمامه
ماطعت شوري ياسعد يوم اوصيك=وكم واحداًماطعت قبلي كلامه
لاشك خل عبيد صالح ايواسيك=كم شهر بالدمام لله صامه
الناس تقرب وانت تبعد مماشيك=متوكلاً عن صاحبك باستلامه
بديار ماتلقابها من يخاويك=غير ابو صالح وانشغل في دوامه
الجيب باعه واستلم قيمت الشيك= الله يحقق لبن صالح مرامه
ان اشتراله فلتن يتصل فيك= والا رحل وتودعه بالسلامه
شايب قضا عشرين عام بضواحيك= اليا تقاعد ماتشيله عضامه
والوقت مايرجع على شان يرضيك =من شاب راسه ودع الابتسامه
واللي سرى بالليل يحتاج لتريك= والايضيع وينجم في ضلامه
وانكان ماتقرا ولاتسمع اذنيك= قل لبو صالح ينتهي من منامه

مردي

يامريف ياللي ترفع الصوت نوحيك= صوتك صداه يلج بحر المنامه
طاير ومستعجل ولاعندك ابريك=لولاي ياخذله قسيمة غرامه
بيتاً جداره طين واخر سراميك=عليه من بين المباني علامه
يامريف ماني جاهلاً في معانيك=غالي ولايلحقك مني ملامه
ولولا مدير المنتدى يمكن اعفيك=لاشك عندي غير راع الجهامه
ابو محمد بالمواقف ينشميك= انشهد انه يستحق الزعامه
عرّفك ربعك وانت محداً درى فيك= عليك عن سلفان ربعك غمامه
في ليبيا واللي بدار المماليك= واللي مع السودان واللي بشامه
في كل دار بلاد تسكن عوانيك= عبسي من القاده ومرفوع هامه
معمر القذاف صاهر بناخيك= والفارس المختار منا مدامه
وابو محمد شاب من شان يحييك= والا انت بانيتاً عليك العدامه
مهمس ومرمس مالقى غير اثاريك= وسط الشعيب اللي تراكم احطامه
شالك على اكتافه سعد واعتنا فيك= ذخيرته بالمعركه من احزامه
يامريف هيك اللي يعز العرب هيك= احيان يهجر مرقده مع طعامه
يامريف جعل الله بخيره يمسيك= اشعيل في حد الخضيرا سنامه
يعني على هذا الكلام اغسل ايديك =يابو علي ماجور ومع السلامه

الموضوع الأصلي: مساجله شعريه مع الشاعر مريف تخص مدير المنتدى | | الكاتب: عايض بن صالح | | المصدر: شبكة بني عبس

[(ابوعواض)]

الله الله الله
صح لسآنك والله اكبر عليك ولسآن مريف

والله استمتعت مبددددع شوي فيك

ويستاهل ابومحمد

يعني على هذا الكلام اغسل ايديك=يـابـو عـلـي مـاجـور ومــع الـسـلامـه

هههههههههههههههههههههههههههههههههه

لاتحرمني جديدك

[~:(دلال):~]

...صح لسآنكـ ...

[أبو عيسى]

ولولا مدير المنتدى يمكن اعفيك لاشك عندي غير راع الجهامه ابو محمد بالمواقف ينشميك انشهد انه يستحق الزعامه عرّفك ربعك وانت محداً درى فيك عليك عن سلفان ربعك غمامه في ليبيا واللي بدار المماليك واللي مع السودان واللي بشامه في كل دار بلاد تسكن عوانيك عبسي من القاده ومرفوع هامه معمر القذاف صاهر بناخيك والفارس المختار منا مدامه وابو محمد شاب من شان يحييك والا انت بانيتاً عليك العدامه

صح لسانك ياأبو صالح وبيض الله وجهك على هذه القصيده الجزله وصح لسان الشاعر مريف علي..

[برق الوسم]

شاعرنا ابو صالح
صح لسانك وبيض الله وجهك قصايد جزلات
صوت وصدى يسمعه اللي بالمنامه على قولتك
لاهنت ولاهان شاعرنا مريف علي
تقبل خالص الود والتقدير

[كاتب الرشيدي]

صح لسان الشاعر مريف وصح لسان الشاعر ابو صالح

امتعتونا بهذه الرائعتين التي فيها من الجمال والطرفة العذبه



تحياتي

[عويض بن شامان بن خلف]

شاعرنا ابو صالح
صح لسانك وبيض الله وجهك قصايد جزلات
صوت وصدى يسمعه اللي بالمنامه على قولتك
لاهنت ولاهان شاعرنا مريف علي
تقبل خالص الود والتقدير