[أبوفيصل الجولان]

ياطيـر عقبـي كـن خاطـرك شايـن

خاطرك شيـن وغيبتـي عنـك يوميـن

النقـص فيـك مبـيـنٍ لــه بـوايـن

في لمعة الريشـه وفـي ناظـر العيـن

ياطيـر انـا ويــاك كـنّـا خـدايـن

وبينـي وبينـك ولـف ومعامـلٍ زيـن

يـوم نتخـاوى مـع وجيـه الضعايـن

ونهمل سبوقك في مناكـب ( خسيريـن )

ولاّ ( شمـال الهضبتـيـن القـرايـن )

شرقّ ( طلال) .. ومن ( سواحيق) ويمين

ولإ عطيـنـا سـكّـة ( التابـلايـن )

ولاقـد عطيناهـا عليـهـن حـراذيـن

نصبح علـى طـارات شهـب المكايـن

بيـن ( العراقييـن ) و ( الأردنيـيـن )

فـي خايـعٍ بـه كـنّ عينـي تعـايـن

ربد الحباري بـه علـى أربـع وثنتيـن

ونأخـذ لنـا أيــامٍ بـذيـك الدفـايـن

مابيـن برقـع والـغـدف والبسيتـيـن

ونكسر علـى ماينحـدر مـن ضوايـن

وناخـذ هنـاك أسبـوع والاّ سبوعيـن

وننكـف نشـاط وسالميـن الصخـايـن

ولـوّ كـان نتعـب عدنّـا مستريحيـن

قــدّام يطـلـع للصـقـاره زبـايـن

نـاسٍ تحـوش القوبعـه بـأم روحيـن

ليّـا روحــوّ بمشحـنّـات الخـزايـن

مافـي نحـاهـم ذوّقــوه الأمـريـن

والـيـوم مابيـنـي وبيـنـك مـدايـن

أنا سعودي وأنـت جـايٍ مـن الصيـن

وأمّــا لقيـنـا للحـبـاري عـوايـن

والاّ تـوادعـنــا وداع المـحـبـيـن

الـوقـت ماتالـيـه معـنـا بـزايـن

والبرّ في حادور من حيـن فـي حيـن

أدنـاه ملـيـانٍ كراتـيـن ( فـايـن )

وأقصاه ضاق وضيّقوه به هـل الضيـن

وضاقـت مناهـج طيبيـن الضغـايـن

اللّ علـى المقنـاص يالطيـر ضاريـن

واليـوم كّـن اللـي يحاكـيـك مـايـن

هـذي سبوقـك وأنتهـض بالجناحـيـن

وهاجـر مهاجـر مبحـرات السفـايـن

للصين والاّ أهبط علـى ضلـع غزويـن

لـوّ كـان عنـدي مـن فراقـك بهايـن

حنّـا عـزاز ولانهـيـن العزيـزيـن

خلّـك تـروح ولاتـشـوف الغبـايـن

شاملـك عفـوٍ مثـل عفـوالمساجيـن



عبدالله بن عون

الموضوع الأصلي: من ارووع قصائد عبدالله بن عون............ | | الكاتب: أبوفيصل الجولان | | المصدر: شبكة بني عبس

[كاتب الرشيدي]

صح لسانك




تحياتي

[أبوفيصل الجولان]

تسلم على المرور...................أبوفيصل الجولان

[مشعل الخياري]

صح لسانك ومشكووور
تقبل مرووووري

[ذيبان الرشيدي]

صح لساانك ولسان ابن عون العتيبي
شاعر لطالما اطربني واطرب الكثيرين

دمت
بخير وعافية

[أبوفيصل الجولان]

شكرا لرواد الشعر ونهنيكم بحلول شهر رمضان المبارك وكل عام وانتم بخير والكلمة الطيبة ماتجي ألا من الطيبين الي أمثالكم .وشكرا لكم.........ابوفيصل الجولان.