[النمر1012]

الورع عيا لا يوافق على النوم .. .. .. قام يتهشم ويتزايد عويله

ادوج به وسط الدكاكين واحوم .. .. .. ادور اللي يشتهي واشتري له

واذا نشدته قال ماعندي علوم .. .. .. يقول ابي امي والسوالف قليله

مالي على شيله جلاده وتعلوم .. .. .. مير الدهر خلاني اليوم اشيله

ياعبيد لو أمك بها قوة عزوم .. .. .. الورع والله ماعترض في سبيله

انك لتلقاني مكفي ومحشوم .. .. .. وهي بشوفاته بصير دليله

ياعبيد انا يابوك ضايق ومهموم .. .. .. أضحك وفي كبدي سوات المليله

أضحك واوسع خاطري وابعد الحوم .. .. .. واطلب عسى تالي العواقب جميله

شكواي للي يفرض الحج والصوم .. .. .. والا البشر ياعبيد ماينشكي له

ماجور ياللي بالطبيب أمس واليوم .. .. .. الله يجيرك جعل ماهي طويله

ياصاحبي لوكان بالبيع والسوم .. .. .. كان اشتريك وتشتريك القبيله

لاشك مادبر على العبد مقسوم .. .. .. حيل الله أقوى ما باليدين حيله

ياعبيد أنا يابوك ماني بمليوم .. .. .. الغبن غبن منقضات الجديله

بعض النسا ياعبيد تقنيهن القوم .. .. .. واللي كسبها قال عندي حليله

لي صاحب في وقتنا اليوم معدوم .. .. .. اليا فقدته وين ابا القى مثيله

عذروب خلي شارةٍ فيه مرسوم .. .. .. يتبع غضب نفسه ويرضي قبيله

والجار يبطي ماشكى منه مثلوم .. .. .. ولاهي على رواد بيتي بخيله

ولاهي من اللي تطرق النزل وتحوم .. .. .. دايم على الفرقان يومي شليله

الموضوع الأصلي: قصيده مرشدالبذال | | الكاتب: النمر1012 | | المصدر: شبكة بني عبس

[ذبحني غروركـ]

صح لسااان شااعرها ونااقلها الله يسلمك

[النمر1012]

وانت سالمه اختي ذبحني غرورك مشكوره علي المرور