[عبدالعزيز الخياري]

محاورة طريق شقراء بين معيوف ابن زهيميل و سلمان ابن عمّار

سلمان:

طريق شقراء ينادي فزعتك يامعيوف=وش فيك يوم إنه يناديـك وتطنشـه
تبا تقول العمل تبا تقـول الظـروف=لكن أقول الك كل أعـذارك مهمشـه

معيوف:

المعذره يالبناخي جعل الأمر مخلوف=ما طنش اهل الوفاء والطيب ما فنشه
أليا سمح خاطرك عندي يصير معروف=صاحبك تكفى طلبتك مير لاتبلشه

سلمان:

مادام هاللون جعله ماتجيك الصـدوف=إطلع معي بالماسنجر وإترك الدردشه
أرسلتلك بالحسا وأرسلت لي بالهفوف=يعني وش الفرق أبا أعرفه وأبا آناقشه

معيوف:

تفداك ياصاحبي رؤس الرجال الضعوف=طلعت سطح القمر وابدأ معك فرفشـه
ارسلتلي ما دريت إنك بـدار الجلـوف=ابيك تمشي معي عن ناس متكوبشـه

سلمان:

ليش ابن لادن تخبا بين ذيك الكهوف=مايقدر يواجه اللي لا لقـاه إكرشـه
لقيتك البارحة بالبيت الأبيض تطوف=والليله تسب فيـه السبـه المدهشـه

معيوف:

ما ودي اعلمك ما خوذ مني حلوف=وإن كان تبغاه أنا ابا أمسكه واكلبشه
احيان ينزل شداد اشعيل تحت الردوف=لاستجفل اشعيل من صوت آهل اللولشه

سلمان:

مادام خنت العهد ماينفعن الحسوف=أنت إطرح العمده الخاين وأنا أفتشه
حاول تعدل شداده كان مامن كلوف=حتى إنها تستقيم وتصفي الوشوشه

معيوف:

لاتعرب الواو بين الحارتين معطوف=العمده اقوم دونه سيب هالقروشه
ما باقي إلا على المجرم نسل السيوف=ونطش رأسه على وحوش الفلا تنهشه

سلمان:

تقولها بعـد ماصابتـك بيـن الكتـوف=عز الله إنك حبيـب ونكبتـك منعشـه
مايرضي ابن خنيفر غير راس الخروف=الله يعينـك تجيـب النجـدي وتفرشـه

معيوف:

اقولها كان تسمعها وعينك تشوف=عز الله إن الحبيب بنابك تعرمشه
صليت عن ناصر خنيفر صلاة الكسوف=والحق يلزمك ياللي قمت بالخرفشه

الموضوع الأصلي: معيوف و سلمان و طريق شقراء!!! | | الكاتب: عبدالعزيز الخياري | | المصدر: شبكة بني عبس

[معيوف ابن زهيميل]

مشكور على التنسيق مشرفنا الغالي عبد العزيز الخياري ، اخي عبد العزيز اسمي فيه تكرار
لك التقدير والاحترام

[محمد العبسي]

محاورة رائعة

بيض الله وجهك يامعيوف أنت وسلمان


مشكوووووور ياعبدالعزيز

[عبدالعزيز الخياري]

الشـــاعر

معيوف ابن زهيميل أشكرك على ملاحظتك

وتم التعديل..... تقبل تحياتي

====================================

الاخ العزيز
محمــد العبسي

شكرا لك على المرور

[نايف العجوني]

اشكرك اخي عبد العزيز على النقل وتنسيق الجميل