[أنكسارحلم]

أخواني رواد شبكة عبس قلعة المجد والتاريخ
يشرفني أن أضع بين أيديكم المساجله التي جرت بيني وبين أستاذي الشاعر الكبير ابو خليفه
جمعان خلف
وأمل ان تحوز على رضاكم واستحسانكم
وأيليكم القصيده

يانديبي قوم ود العلم وده=قوم وده فوق مومية السفيفه
حرة ٍ تطوى السهال المجرهده=مع تخاتيخ الخلاء مثل القذيفه
لا مشت حتى نظرها ماتلده=فوقها المندوب وسلاحه رديفه
مامعه غير المشوك وأم خده=والشداد اللي مبطن بالقطيفه
من سلايل جيش عبس أهل الاشده=لابة ٍ تفرق وليف ٍ من وليفه
يوم دورات المعارك مستعده=بالرماح وبالسيوف اللي رهيفه
كم وكم خصم ٍ وطت من فوق خده=وعن طويلتها تكفينا شريفه
ويانديبي والرسن بيديك شده=وأرسم الطرقه مثل رسم الصحيفه
من جنوب المملكه والشوف مده=والله يعينك لو الطرقه كليفه
يم دار اللي لهم قدر وموده=لا يحول الليل دون ابو خليفه
شاعر ٍ لاقال قول يصير قده=يحتميها بالثقيله والخفيفه
طيب ٍ من طيب أبوه وطيب جده=ألكرم والطيب مجناه وحليفه
من بني مظبر كعام الخصم ضده=من غزاهم مارجع معه النصيفه
دون أبانات العدو عنها تحده =والفقــي اللي شمال من الحليفه
والله أن الحق لا أهل الحق أعده=ولايغط النور غير أنسان جيفه
ويانديبي لاوصلت الخط مده=مده الجمعان ابو نفس ٍ شريفه
وانتظر حتى تجيني في مرده=لاتعجل يانديبي بالنكيفه
والخبر حوت ٍ طلع من بحر جده=كيف يبغى يعيش في وادي حنيفه
خاوته برق الطيور المستهده=وصار اله من بينها صوت ورجيفه
وصلك العنوان وأسمع من معده=في رموزن مبهمه يابو خليفه
والزمن دوار لابده لابده=ماتقاود في رسنها الا العسيفه
والتحيه عد ورد ٍ فاح نده=وعد براق ٍ سرى يلمع رفيفه
لرجال اللي لهم هده ورده=باليال اللي قسوتها مخيفه

اخوكم الشاعر ناصر صويان الشويلعي

وهذا مرد الشاعر الكبير ابو خليفه

يوم طاب النوم لاصحاب المخده = حضر براق الخيال وغاب طيفه
و مرحبـا 0 مالاحت مزونٍ امسده = برقها يفرا الظلام ومنه خيفه
و مرحبا 0 والبحر الاحمر من يصده = عن طريقه لاغدا الموجه وحيفه
و مرحبا 0 في صاحبٍ لي عنه مده = شوفته ورسالته عندي طريفه
وصلني منه العلوم المستجده = عبر شاشات الجهاز ومستظيفه
والذلول اللي تبي علمٍ ترده = فوقها المندوب ذرعانه نحيفه
من كثر ماتقول له هاته ووده = حالته من وليتك حالٍ كسيفه
ويارسول الخير هاك العلم رده = والمعزب محتفي بأكرام ظيفه
رح فمان اللـه والجاهل تهده = لين تقطع ديرته واحذر تظيفه
الردي لاجيت من عنده تعده = لاتجي بيته ولاتماشي وصيفه
وأخذ من راسي تحيات الموده = والشعور اللي من الشكه نظيفه
ولاوصلت الشاعر المعروف بده = حب راسه واعطه اللي مايعيفه
ولاقرا يلقى العلوم المستمده = من علومه والمظيّف في مظيفه
ويابو خالد مابنيته من يهده = أنت بحرٍ يلتطم بطراف سيفه
بالشعر ورموزه وظمه وشده = وبالكرم والطيب ماعيونك كفيفه
وكل رجلٍ ماقفه من دون حده = ومن تعدا الحد وللعها بليفه
وقيل من ورد الطويل بغير عده = مارتوى والناس ماتمشي بكيفه
والشعر مقبول في مزحه وجده = بس لايقرب ربيعه من خريفه
ومن طلع من جده لجده نرده = مايعيش الحوت بالاجواء اللطيفه
السمك معروف في جزره ومده = والطيور اللي معه مثله ظعيفه
ومن غداله شي لازم يسترده = مايضيع الحق وجباله منيفه
كل عالم بالحياه يشوف ضده = لو بناله برج عاجي من سقيفه
وكل من سافر عن بلاده مرده = يمها يرجع ولو طوّل مصيفه
ومني لناصر تحيات الموده = يتشرف بالمرد ابو خليفه

/

مع خالص التحية
جمعان خلف الرشيدي

الموضوع الأصلي: ناصر الشويلعي وجمعان خلف صوت وصدى | | الكاتب: أنكسارحلم | | المصدر: شبكة بني عبس

[الشاامخ]

صحت ألسنتكم .. شآعرين مبدعين وغنيين عن التعريف ..

وشكرأأأأ

[سعد الرشيدي]

صح لسانك يا أبو خالد

وصح لسان الشاعر الكبير

ابو خليفه

مساجله اكثر من رائعه وتحمل الكثير من المعاني

[مروان الرشيدي]

صح ألسنتكم ولا هنتم

صووووت وصدى روعه


:
:
تحياتي

[مسندالعويمري]

صوت وصدى

الشآعرين مبدعين وغنيين عن التعريف لهم بصمه في عالم الشعر

صح السانكم شعرانا الكبار

[أنكسارحلم]

اقتباس من مشاركة الشاامخ صحت ألسنتكم .. شآعرين مبدعين وغنيين عن التعريف .. وشكرأأأأ

اخي الشامخ اشكرك جزيل الشكر على مرورك وكلامك الطيب

[طلال محمد ناهس]

صحت ألسنتكم .. شآعرين مبدعين وغنيين عن التعريف ..

وشكرأأأأ

[عقيد المدرهمات]

صوت وصدى عالي وفيه من المعاني الجزيلة

صوت وصدى رفيع وفيه من المعاني الكبيرة

صوت وصدى شامخ وفيه من المعاني الجميلة

لأنه صدر من شعراء لهم ثقلهم الشعري الكبير

أبو خالد ( ناصر صويان ) ،،، وأبو خليفة ( جمعان بن خلف )

صح الله ألسنتكم ؛؛؛؛ وبيض الله وجيهكم