[الاجهر]

يامكثرين الهرج لااسمـع ولااجيـب =تريحوا من فضلكـم واسمحـوا لـي
تريحـوا لاتلحـقـون المشاهـيـب =على الردى مانـي شفـوق عجولـي
بالعقل والصبر ادب النفـس تاديـب = والا لهـا مـده تصـول وتجـولـي
خلج ترازم فـي سيـاج المحاديـب =مافيهـن اللـي بالعقـال معقـولـي
اشد وطية زور مـن شمـخ النيـب =اليا ضاع مفعو ل الحيـل والحلولـي
انـا لاقلـت ارتـب القـول ترتيـب=حتى يجي كـي علـى فـك قولـي
اليا ارسلت لافكار القريحـه مناديـب=ترايعن مـن عقـب ماهـن جفولـي
لكن مالـي مـن وراهـا مكاسيـب =لو كان عشاق القشـر صفقـوا لـي
مامستفيـد الا العـدو والاجانـيـب =ولانـي مطيـع مقرقعيـن الطبولـي
خليتهـا تعطـي فجـوج مجاديـب =جربا تجـود فـي رسنهـا مهبولـي
والله لااجنب دام لـي درب تجنيـب =من شرهة حشـام الرفاقـه خجولـي
لـو انهـا بيـن النحـر والتلابيـب =من الحيا وجهـي مهـوب مغسولـي
طبـع لنـا نشـب عليـه ونشيـب =وطبيـعـةٍ لعـلـهـا مـاتـزولـي
على الجماعـه للجماعـه مواجيـب =الا جهلـوا قـدر الرفيـق الهتولـي
ماني على ربعي قريـب محاضيـب =نـاة مايخلينـي اسـرج خيـولـي
ان جات من طيب شقاها على الطيب =ولونها اعـوج مـن رقبـة الذلولـي
وان جات من مسكين منطق واساليب = حطيتها بين الثرى والنعولي
لاحركت شعـره ولاطلعـت شيـب =لاضيقت صـدري ولاطـق جولـي
وان كان في صبري على ميلهم عيب=العيب تفتيـش الصـرر والحثولـي
لاقمت تذكر في رفيقـك عذاريـب =تبيـن عيوبـه لـذولـي وذولــي
صبرك على ربعك علاج وتطابيـب =قصـر حبـال السالفـه لاتطـولـي
حتى مايلقا فـي طرفهـا مقاضيـب =كـراه خيـر وللمشاكـل ميـولـي
واليا بليـت بتايـه شـره وصعيـب =قول انا العـراف وانـت الجهولـي
قـل الله الله ياحصـان الاطالـيـب =الفاهـم العالـم عطيـب الفعـولـي
هذا الكلام اللي مافي صحته ريـب =انيـب لاحولـك ولانتـاب حولـي
حصان وبن حصان طيب مجاذيـب =بالمعرفـه رجـل محلـي ودولـي
خله يروح يخطي الدرب ويصيـب =قول مابالنـاس عرضـي وطولـي
والفرق ماهـو باللحـى والاشانيـب =لفرق بيـن النـاس فـرق العقولـي
كم واحد تحسن به الظـن ويخيـب =لسـن يضحـك والفـواد معلولـي
واللي غدت به كلمـة مالهـا غيـب =اهو من اطيب ربعي اللي غود لـي
يالله عساها صيحة فـي قفـا ذيـب =قلـع النيـا بينـي وبينـه يحولـي
الرجل مايغصب على الطيب تغصيب =ليا صار ماهو دل ضمـن الدلولـي
ومن عادة اللي طيبه يحضر ويغيـب =اطالـت الرفقـة زهـوق ملـولـي
واليا بلنـك غبـر الايـام بصحيـب =ي مستوى طيبـه صعـود ونزولـي
اعرف ترى الدنيا دروس وتجاريـب =الكامـل الله والنـقـا للرسـولـي
لاتصير مشـذاب يقـص العراقيـب =لـه وراع الاولـه وش يقـولـي
اخذت حكمه مـن كـلام اللواعيـب =لطيـب نـاس وللعـذارى فحولـي

الـــشــــاعـــر : لافـــــي الـغــيــدانــي

الموضوع الأصلي: ان جات من طيب شقاها على الطيب | | الكاتب: الاجهر | | المصدر: شبكة بني عبس

[عيون مؤمنة]

صح لسانك وصح لسان الشاعر لافي الغيدانى
قصيدة رائعة يعطيك العافية ومشكور

[فلاح الرشيدي]

مشكور على القصيده صح لسانك ولسان لافي الغيداني
لك ودي وتقديري

[فهد العوضه]

قصيده جزله تحكي عن الطيب من شاعر قوي
وفيها من الحكم الثمينه ,, والثمين اختيارك في القصايد دائماً الله يطيب فالك ابو سعود تقبل مروري ولك اغلى تحيه

[الاجهر]

اقتباس من مشاركة عيون مؤمنة صح لسانك وصح لسان الشاعر لافي الغيدانى قصيدة رائعة يعطيك العافية ومشكور

مشكورة عل المرور والتواجد الرائع

[الاجهر]

اقتباس من مشاركة فلاح الفلاح مشكور على القصيده صح لسانك ولسان لافي الغيداني لك ودي وتقديري

اشكر مرورك ياغالي

[مروض الصعب]

صح السان الشاعر ولاهنت على النقل

[المشعل]

الاجهر يعطيك العاافيه

قصيده جميله وذائقه شعريه اجمل

لاهنت على الاختيار والنقل الراااائع

تحيااتي لك