[جميل مساعد]

اليكم مجموعه من قصايدي عساها أن تحوز على رضاكم والحكم بيديكم ..الأولى: أجتماعيه كتبت في أهالي غزه عسى الله يرحم حالنا وحالهم ويكفينا شر ماأصابهم ..وفيها أقول:

الله وأكبر ياحياة المذله = ماتسعدك لوكان لك بالعرب شان
أما حياتن بالنجوم المطله = والأمماتن يرضي الرب باحسان
غزه تنادي ياعرب مضمحله = تذكر صلاح الدين من خير فرسان
طفل الحجاره والشقا في محله = صارت أسيه والفعل ظلم عدوان
ذروة سنام الدين في خير مله = شعارنا نوفيه ثورة وبركان
والحق واضح كل شخص(ن) يدله = والظلم شفه اليوم في هيئة أنسان
صرنا شتات وشلة (ن) ضد شله = نؤمن بتعداد المذاهب والأديان
صار العدو ياكل ضعيفه وجله = يمشي على كيقه ويفتك بالاوطان
المعتصم يومن سيقه يسله = وين العروبه راحت أروح شجعان

الثانيه : قصيده تتحدث وهي معاناة أسميتها (الجوع والحرمان )أقول فيها:

الجوع والحرمان سبة عوى الذيب = مادام طيفه دايم الدوم وياي
كلما تذكرته غزيت المراقيب = تسرع اخطاي ونوب تمهلبي اخطاي
ماشفت مثله في جميع الرعابيب = طبي حبيب الروح هوداي ودواي
من دار أبو متعب كريم المواجيب = رعبوبتن ماهي من الكرد والهاي
مصيونتن يوم اللقا واللواهيب = محميتن بيدين حكامة الراي
لطامة العايل على الهون ياصعيب = حماية المظلوم لا جاك شكاي
بعيونها سهم (ن) عطيب المصاويب = وصوت(ن) يذكر مولع القلب بالناي
دام الهوى جوه عذي المشاريب = أتبع شقا نفسي وأنا أدرى بدنياي
حلمت بك والحلم ياخذ ولا يجيب = أنك تبادلني شعوري على ارضاي
لك صورتن بالقلب يازين ماتغيب = دامك تقول أنك على حطة امناي
الجوع والحرمان سبة عوى الذيب = مادام طيفه دايم الدوم وياي

الثالثه :وجدانيه : على شان الغلا:

كتبت الشعر لاجل الشعر يوم الشعر عطره فاح = عرفته من قديم الوقت والمعنى على الشاعر
كتبت الشعر يوم الشعر في وقته كثير ارماح = حفظته من صغر والشاهد الله مالنا خاطر
يغير أنا نعبر عن قلوبن همها ترتاح = عساها من عناها عن عماها تصلح الناظر
ولكن ياعيوني للسفر جيه على مرواح = أبطلق من بنات الفكر ماني منتظر باكر
على شان الغلا ماحدن يلوم الخاطر المنساح= أبيها للغزل قمه مادام أن الشقا امسافر
على وقت (ن) مضى مابين فرقى والطريق أشباح = عرفت أنه وفي والجو عنده هادي وماطر
عرفتك مزنتن هلت وعقب المزن خيرك طاح = يشعشع نورك الباهي يجنن زينك الباهر
حبست الدمع من عيني وضيقه داخلي تجتاح = تشقق من جفوني دم والسبه بحر هادر
سألني عن حوالي قلتله شوفتك بالافراح = على رغم الحزن مالي كياني قاللي خابر
معاناتك وصبرك والفرج يوم الصبر مفتاح = تقهويته على جمر الغضا يوم الهوى ساكر
عسى الله يسعد الخاطر عسى الله يجلي الأتراح = وتسعد عيني ابقربك بعد ماكنت أنا ناطر..

الموضوع الأصلي: سقت الفرايد لعيون شبكة عبس .. تستاهلون ... | | الكاتب: جميل مساعد | | المصدر: شبكة بني عبس

[برق الوسم]

شاعرنا جميل مساعد
صح لسانك
فعلاُ فرايد وشبكة عبس تستاهل
بيض الله وجهك
وتقبل خالص الود والتقدير

[شهاليل]

".. جميل مسااعد .."
صح لساانك مدد بلاعدد
قصااائد رائعه ومؤثره جدا

[مروان الرشيدي]

صح لساااانك



قصائد رائعه وطرح اروع


نتمنى لك المزيد والأبداع


تحياتي

[الاجهر]

صح السانك وعلاء شانك شاعر متمكن
تسلم لاهنت

[ابوديما]

شاعرنا جميل مساعد
قصائد جميله
بيض الله وجهك

[مرزوق العجوني]

صح لساااانك اخوي ولا هنت على الروائع وتقبل مروري

[جميل مساعد]

اقتباس من مشاركة برق الوسم شاعرنا جميل مساعد صح لسانك فعلاُ فرايد وشبكة عبس تستاهل بيض الله وجهك وتقبل خالص الود والتقدير

وجهك أبيض يابرق الوسم مشكوووور ولاهنت على مرورك لك مني أجمل التحايا وصادق الود .. ودمت بخير والف عافيه ...