[العالم الفلكي]

بسم الله الرحمن الرحيم

السلام عليكم ورحمة الله وبركاته

هذه المحاروة جرت اليوم19/2/1430 هـ بين الشاعرين الكبيرين عبدالله الاشرم و محمد بن حوقان في موقع الشاعر محمد بن حوقان نخبة المثقفين


الاشرم

سلام تسليم الرسول اللي ماجاء بعده رسول=الله و مصلي على صفوة قريش الهاشمي
نبغى ولد راع الشداد اللي على ظهر الذلول=لاهو بلا عتيبي ولا عبسي ولا هو بسلمي

ابن حوقان

يا مرحبا ترحيبة الاسلام واصحاب العقول=اللي لهم تاريخ في بدع النشيد الملحمي
اللي بغيته جاك يا العبسي وقدر ما تقول=الباغي اللي ما يشوف الناس شوفه ينعمي

الاشرم

لولا القضايا ماوجد قاضي ولا توجد حلول=مير الجريمه ماتــبين الا بوجه المجرمي
انته ولد حوقان ابن زربان وتقول وتـطول=والموت روحه ماتروح الا بروح الادمي

ابن حوقان

لولا القضايا ما تذكرنا الرجاجيل الزحـول=اهل العطا والمد اليا ثار الرصاص المحتمي
كلً يشوف انه عقيد القوم فراس الخيول=والحضرمي لو لبسوه التاج يبقى حضرمي

الاشرم

ترى الزحول أهل العقيدة والمواقــف والفعــول=يومنها دنت طبول الحرب وأشتد الرمي
أحسب حساب اللي يعن الخيل ويصول ويجول=يمكن تنزل محزمك لاقمت أفتش محزمي

ابن حوقان

اهل العقيدة علموكم كل شـي فـي وصـول=اخذوا مرابط خيل عبس وروحة منهم ضمي
جاكم حروب اشد من حرب النصارى والمغول=ماسلم منها غير راس الخايف المستسلمي

الاشرم

هذا كلام اللي مع الشارع يدقون الطبول=يفكرون أن المعارك شرب مويا زمزمي
عبس العريقة دولتن مايهم فيها ألا مهبول=أجيوشها ماتنكسر وقلوبها ماترحـــمــي

ابن حوقان

ونعم في عبس وجعل راسك يا الرشيدي ما يزول=لو ما حكيت الصدق قلنا يا ارض عبس تكلمي
تكلمت في عهد بن شداد من باب الفضول=في ملحمة ( هل غادر الشعرا من متردمي)

الاشرم

الحب وسوس بالملوك وعذربت فيها الخبول=ولاهو غريب أن ورط العالم بحربن عالمي
أهبل منه شيخن يقود الجيش والمخ مغسول=وانشد بجيله يالبجيلي وانت منهـــا تـنتـــمي

ابن حوقان

لو الله الا قمت تهرج هرج ماهو بمعقـول=كلً يقول انا ولد حاتم وجدي حاتمي
اللي مايعرف كيف يخرج لا يفكر بالدخول=احيان ما يجرح مفاصل كفي الا خاتمي

الموضوع الأصلي: عبدالله الاشرم و محمد بن حوقان | | الكاتب: العالم الفلكي | | المصدر: شبكة بني عبس

[العالم الفلكي]

ارجو من المشرفين التثبيت

[معجب المهنا]

محاوره لاباس فيها طيبه لكن لم ترتقي الى المستوى المطلوب مع انها في منتدى وبالامكان افضل مماكان ع العموم مشكورع النقل اخوي العالم الفلكي

[ناصر خنيفر]

الله الله هذه المحاوره المتعوب عليها عاشو الشعار وعاش من نسقها

[العالم الفلكي]

اقتباس من مشاركة معجب المهنا محاوره لاباس فيها طيبه لكن لم ترتقي الى المستوى المطلوب مع انها في منتدى وبالامكان افضل مماكان ع العموم مشكورع النقل اخوي العالم الفلكي

وانت مشكور على المرور والتعليق

[العالم الفلكي]

اقتباس من مشاركة ناصر خنيفر الله الله هذه المحاوره المتعوب عليها عاشو الشعار وعاش من نسقها

عاشت ايامك يالعمده لكن ليش ماتثبتها

[العالم الفلكي]

اقتباس من مشاركة راشد رباح ونعم في عبس وجعل راسك يا الرشيدي ما يزول لو ما حكيت الصدق قلنا يا ارض عبس تكلمـي تكلمت في عهد بن شداد مـن بـاب الفضـول في ملحمة ( هل غادر الشعـرا مـن متردمـي) الاشرم الحب وسوس بالملوك وعذربت فيها الخبول ولاهو غريب أن ورط العالم بحربن عالمـي أهبل منه شيخن يقود الجيش والمخ مغسول وانشد بجيله يالبجيلي وانت منهـا تنتمـي محاوره رائعه من عمالقه الشعر شكرا على التنسيق

وانت مشكور على المرور والتعليق

[سعد الشقل]

الله الله يالاشرم وابن حوقان محاوره قويهـ وجميلهـ ../

صح اللسان شعرائها وتسلم يدين ناقلها ..//

تم التثبيت ../