[الجنبلطى2000]

قصر الحاكم

نادى الحاكم على كبير ياورانه فدخل اليه مسرعاً:

- أى أوامر ياجناب الحاكم ؟

- طبعاً فيه أوامر ...أمال جايبك أتبارك بسحنتك؟

-اؤمرنى يافندم...

- أنا ملاحظ ان عيد ميلادى مابيجيش غير مرة واحدة .فى السنة... ازاى الكلام ده ؟

- ماهو كل الناس كده يافندم

وهو انا زى كل الناس ياحيوان !!

- العفو يافندم .. مش قصدى طبعاً ..... بس هى الشهور كده.. نعمل ايه يعنى ؟؟؟

- تخيل أن أو ل مرة آخد بالى ان انتيكا ماشية على نفس التقويم بتاع بلاد بره ؟

- ودى فيها ايه يافندم ؟ ماهو العالم كله كده!!

- ماينفعش ... لو عاوزين نبقى دولة عظمى بجد لازم إحنا اللى نعمل التقويم اللى نمشى عليه .. ماحدش يفرض علينا التقويم بتاعه ، " من لا يملك تقويمه لا يملك عيد ميلاده"

- يعنى سيادتك عايز تعمل ايه بالضبط ؟

- والله أنا لسه ماقررتش .. بس هى دى الفكرة العامة .. استدعى لى وزير البيئة و( عبده الترزى)

- بس ياجناب الحاكم وزير البيئة ماله ومال الموضوع ده ؟

- أمال نجيب مين ؟

- فيه عندنا وزير اسمه وزير الحكم المحلى ، مابيعملش أى حاجة فى حياته ومرمى على القهوة طول النهار !

وزير الحكم المحلى!!! دا مين اللى عينه دا ؟؟

سيادتك يافندم .. لما لقيت وزير اسمه كده فى اليابان ، وقلت احنا مش اقل من اليابان ورحت معينه

- حكم محلى!! ..دا عمره مابعت لى هدية ولا اكرامية ولا أى حاجة ! ماشى .. ابعت استدعيه

- حالا يافندم

بعد فترة يدخل الوزير و ( عبده الترزى)

- صباح الأناناس ياجناب الحاكم ....

- أهلا يا( عبده) ( ويوجه كلامه للوزير) أهلا ياخويا .. حبيبى اللى نايم فى الدرة ومسقع للحاكم اللى معينه وبيدى له لقمة عيشه .. اتفضلوا

خير يافندم

- بقى ياجماعة بلد بحجم أنتيكا لازم تكون منفردة .. وباختصار أنا بفكر فى عمل تقويم خاص بأنتيكا

- تقويم خاص بأنتيكا!! ازاى يعنى يافندم؟

- يعنى نغير اسامى الشهور ، نغير السنين ، نلعب فى التاريخ والشهور والأيام .. يعنى بمعنى أصح نقلب الأجندات والنتائج

- وايه الهدف يافندم؟

- الهدف ان الايام تعدى بسرعة ، وعيد ميلادى يجى كذا مره فى السنة : ودا معناه انى أقفش الابيج من الرؤساء والملوك والوزراء والمستشارين اللى زيكم كدا كذا مره ودى لقمة عيش بغاشة ... ( للوزير) فاهمنى يابتاع الحكم المحلى؟

- (عبده) دى فكرة جديدة يافندم

- الحاكم : هى لها كمان بعد قومى..

- ازاى؟

- لما السنة تعدى بسرعة هانقبض المعونات كذا مره فى السنة .. وسلم لى على البنك الدولى

- وزير الحكم المحلى: أنا شايف اننا نبدأ بتغيير الساعة

- ازاى؟ يعنىالساعة تبقى اتناشر دقيقة

- أديك ابتديت تفهم قصدى أهو

- والدقيقة عشر ثوانى .. وبكده الوقت يعدى بسرعة

- ( عبدة): وممكن كمان نخلى الاسبوع ثلاث أيام بس الأيام الكثير الى لخبطتنا دى اشى حد واشى تلات

- تلات ايه تف من بقك

- على رايك ليه يعنى يبقى سبع ايام؟ .. من كثر الأيام فى النتيجة ! دا سوء استخدام للايام

- هما ثلاث ايام يافندم يوم شغل ويوم أجازة ويوم احتياطى ..

- احتياطى لايه ؟

- عشان لو يوم الشغل طلع أجازة رسمى

- كلام جميل ، وفائض الأيام دا نبيعه لأى بلد تانية بالدولار

- فكرة ممتازة .. أنا رأي ان اسبوعنا يبقى يومين خميس وجمعه

- الحاكم : وبالنسبة للشهور ياجماعة لازم اساميها تتغير تماماً

- فيه اقتراحات معينة يافندم؟

- مثلا يناير وفبراير واغسطس نضمهم على بعض ونسميهم مثلا ينفبطس

- بس ينابر وفبراير شتا واغسطس صيف!!

- خلاص ياابنى مفيش صيف ولا شتا .. دا هايبقى كلام قديم السنة هاتبقى فصلين بس الشتا ينضم على الصيف ويبقوا فصل( الشيف) والخريف ينضم على الربيع ويبقوا (فصل الخريع)

- ونضم كل ثلاث شهور على بعض ونسميهم اسم مختصر

- بس تسيبو ا شهر سبتمر لوحده ..دا الشهر اللى فيه عيد ميلادى يفضل زى ماهو

- (عبده) حيث كدا بقى بقترح نسميه شهر الفاتح لان دا الشهر اللى اتفتحت فيه عيون الحاكم على الدنيا

- الوزير: لا بعد اذنك يااستاذ عبده انا شايف ان الشهر ده دا شهر خاص بالحاكم يبقى نسميه شهر الحاكم .. يعمل فيه اللى هو عاوزه

- فكرة هايلة ياابنى .. انت لازم تترقى هاخليك عميد

- عميد ايه بس يافندم؟ انا وزير أد الدنيا

- ايه .. مش عاجبك رتبة عميد .. خلاص هاخدها انا .. من النهاردة انا الاخ العميد الحاكم

- طيب بالنسبة للاجازات ووالاعياد القومية ؟

- بص خليها مفاجاة ، يعنى نصحى الصبح ونشوف مزاجنا ايه لو جايب على شغل يبقى يوم عمل ، ولو مالناش مزاج يبقى عطلة رسمية

- ( عبده) كمان يافندم لازم نغير فى المراسم الدبلوماسية

- يعنى ايه

- يعنى مثلا لو فيه اى رئيس دولة جاى عندنا ، مش معقول نحجز له فى فندق خمس نجوم احنااولى بالفلوس دى كلها

- أمال نعمل ايه؟

- عودة للأصالة وعراقة الاجداد .. خيمة من جلد الماعز يترمى فيها هو والحاشية بتوعه لحد مازيارته تخلص ويابخت من زار وخفف

- فكرة ممتازة .. ونقول له ان هو دا الفلكور بتاعنا وطبعا مش هيقدر يتكلم

- وزير الحكم المحلى:بس كده هايبقى فيه مشكلة ياجناب الحاكم

- خير؟

- لو احنا سافرنا لبلد الرئيس ده بعد كده هاينزلنا فى خيام تنفيذا للفلكلور اللى احنا قلنا عليه وساعتها هنتبهدل احلى بهدلة

- ( عبده) ساعتها نقول له اننا غيرنا الفلكلور واللى خلانا نغير التاريخ مش هنغلب فىشوية فلكلور

- الحاكم : كمان ياجماعه عايزين نختار لانتيكا اسم عظيم يليق بيها

- ايه رايك يافندم فى ( جمهورية انتيكا العظمى)

- يعنى مش قوى

- طيب ايه رايك فى( الجماهيرية الانتيكية الحزبية الشعبية الديكتاتورية الطعمية العظمى) لصاحبها ومديرها حاكم أنتيكا المبجل

- اهو كدا تملى العين .. انا موافق..طيب ياجماعة القرارت دى كلها تتنفذ من النهاردة

- الوزير وعبده الترزى فى نفس واحد: حيث كدا بقى عن اذنك يافندم

- على فين

- بالتوقيت الجديد النهاردة الجمعه اجازة ..سلامو عليكو

- ستنى انت وهو

- خير يافندم؟

- بالتقويم الجديد النهاردة عيد ميلادى .. ايديكم على الهدايا ياحلوين

الموضوع الأصلي: مسرحية ممتعه جدا ومفيده | | الكاتب: الجنبلطى2000 | | المصدر: شبكة بني عبس

[االعويمري]

يعطيك العافيه يااخ الجنبلطى على ها المسرحيه الجميله ولكن ما قلتنا فى اى قارة تقع جمهورية انتيكا العظمى