[معيوف ابن زهيميل]

أيها الأعزاء أقدم لكم بعد التنسيق هذه المحاورة التي جرت بين الشاعر المتنبي والشاعر معيوف ابن زهيميل آمل أن تحوز على استحسانكم:

المتنبي

شاعر المنتدى الليله يبى ايطول ليله=لين يضبط معي ويقيم وضع الصداقه
ان بغاها عريضه ون بغاها طويله=ابن عم ورفيق ومن خيار الرفاقه

معيوف

شاعر المنتدى لوح بظهر الأصيلة=سل سيفه على اللي يخرّبون العلاقه
ما نبا إلا سواليف الرجال الجزيله=ابن عمك ما يبغى أهل العلوم الدقاقه

المتنبي

يوم سليت سيفك ونت فوق الكحيله=اهلك ليه ماسموك حمـاي ساقـه
انتبه لاتـدق الهيـل والجنزبيلـه=لاتعدا الحدود ابلاجـواز وبطاقـه

معيوف

الدروب نخبرها ما ستعزنا دليله=اسم معيوف يكفي خل عنك الحماقه
لكن اسمك ما يعرف مع فخوذ القبيله=كيف ندري جمل وإلا مع الابل ناقه

المتنبي

ادري انك دليلـه مايـدور بديلـه=تقدر اتسوق ميحتاج رخصة سواقه
اذهن الزند لايقدح بـراس الفتيلـه=شوف لك راسن اقرع ونتبه للحلاقه

معيوف

كان ودك تخاويني برحله جميله=خلك بجنبي وعطني سوالف رقاقه
لاتحذر خوي(ن) قرح الخد خيله=أرفع الرأس ذوقك لاتكدر مذاقه

المتنبي

عاذنا الله وعاذك من دروب الرذيله=كانها من عسر نعذرك لاتفك طاقـه
يامعيوف ان مجاك الحق لازم تجيله=مايفارق وريـدك لوتـدور فراقـه

معيوف

صاحبي جابلي عيله وأنا جبت عيله=وحده بوحده وكلٍ يخيط رواقه
كل واحد مسجل في كتابه حصيله=يتضح فيه صدقه يا ولد من نفاقه

المتنبي

انت صاحب فضيله ونا صاحب فضيله=والخطا بيننـا ممنـوع والاصتفاقـه
مثل ماقلت كلن يرتوي من صميلـه=انت حرن بماكر حر منته بعاقه

معيوف

شيخ مع شيخ شيختنا مهي مستحيله=خل بعض العرب قلبه يزيد احتراقه
اتكلنا على الله خيل برق المخيله=عاش رأسك غناوي منت عايش بفاقه

وسلامة الجميع
معيوف ابن زهيميل

الموضوع الأصلي: ابن عم ورفيق ومن خيار الرفاقه | | الكاتب: معيوف ابن زهيميل | | المصدر: شبكة بني عبس

[راعي البلها]

المتنبي


انت صاحب فضيله ونا صاحب فضيله
والخطا بيننا ممنوع والاصتفاقه
مثل ماقلت كلن يرتوي من صميله
انت حرن بماكر حر منته بعاقه



معيوف


شيخ مع شيخ شيختنا مهي مستحيله
خل بعض العرب قلبه يزيد احتراقه
اتكلنا على الله خيل برق المخيله
عاش رأسك غناوي منت عايش بفاقه



صح لسان الجميع ولاهنتو على المحاوره الرائعه

[ناصر خنيفر]

مشكور على التنسيق يامعيوف طاروق من اجمل المحاورات

[أنكسارحلم]

الاخ معيوف اشكرك جزيل الشكر على التنسيق الرائع

وصح السانك والسان الشاعر المتنبي..

الحقيقه محاوره جذابه..وجميله..الله يعطيكم العافيه

ملاحضه المحاوره مثبته.تكريمٍ لكم

[معيوف ابن زهيميل]

راعي البلها، العمدة ، ناصر الشويلعي
مشكورين على المرور ، وتشجيعكم نتشرف بكم ، وبيض الله وجهك مشرفنا الغالي ناصر الشويلعي على تثبيت المحاورة ، صاحب جمائل بيض الله وجهك

[الاجهر]

بيض الله وجيهكم

[مساعد عواض]

العمده ناصر خنيفر المشرف ناصر الشويلعي راعي البلها
الاجهر معيوف ابن زهيميل
اشكركم جزيل الشكر ويشرفني مروركم والحقيقه ان جميعكم اساتذه
وتقبلو تحياتي وشكري وتقديري

[عبدالعزيز الخياري]

الـشاعر الرائع

معيوف بن زهيميل


سلمت على نقل المحاوره بينك وبين المتنبي


وبيض الله وجيهكم والحقيقه محاوره تستحق النقل والتنسيق


أشكرك جزيل الشكر على جهودك


تقبل تحياتي