[البراك]

بسم الله الرحمن الرحيم

سلام ربي على الجميع
أحبابي الأعضاء....

أخواني وأحبابي
هذي الخواطر اسميتها
(أم الخواطر)
وذكريات مع الأم
أبكتني
وأبكت كل من يقرأها بإحساس
.....






من منا يتذكر ماضيه..,,!!؟؟
من منا لايحب ان يعيش حياه هانئه؟؟
من منا كتب الماضي والحب في خاطرة..؟
ونرى كيف تغيرت بنا الأحوال..؟؟
كيف عصفت بنا الأهوال..؟؟

--------------------------------------
يــــــــــــــــــمـــــــــــــــه

يمه أنا ودي أقول للناس!!
عن الشيمة عن الحسرة عن الإحساس

عن العمر إللي ملآه اليأس


أنا ودي أضحكهم,,
ابكيهم ,,,,احكيهم
عن الدمعة وليل الخوف
عن القصة حروف ، حروف
********
عن جروح تسافر بي!! وترقى ثم تحول بي مثل غيري من الأجناس ...

وأنا عمري يقول يمه
وأنا فرحي يقول يمه
وأنا جرحي يقول يمه
اذكرهم افكرهم

اسولف عن جروح وليل ...احبك ياغلآتي حيل
اذكرهم وأنا توي صغير(ن) مرقدي صدرك

لحافي يجمعه صدرك
ضحاكي مبعثه صدرك
وزادي منبعه صدرك
وأداري الجرح في صدرك ...
**
تربينا على كلمة
تجمعنا على كلمة
تحابينا على كلمه
**
تلمي القرش فوق القرش
نبي نشري ثياب وفرش

نبي نجبر خواطرنا
ورب الكون يسترنا

تقولي للولد منا

أبيكم للزمان رجال

أبيكم فارس وخيال
أبى لآصاح فيكم جار
يبيكم والزمن دوار
تفزوا له صغار وكبار...

أبا اشرح بعض قصتنا
وكل الناس قصتنا

ليا أذن مطوعنا
يجي صوته بمسمعنا
تصيحي تقولي يا ولد صلوا
توضينا ..تصابحنا.. وصلينا
رفعنا للسماء كلمه,, تصعدها بواكينا
وبعد نص الملأ ما فاق
الآ يا كاتب الأرزاق
ألا يالله تهدينا
..
انا..أعرف إن الجروح كبار
واعرف إن الزمن دوار

وأنا اذكر وش تغدينا
ومابة شيء بأيدينا

أنا اذكر يوم صار العود
على كفنه وتباكينا

أنا بإذني سواليفه
وممشانا على كيفه
...
وأنا اذكر لدغة الناموس
ولآبه شرح أو قاموس
**
أنا اذكر ثوبي البالي
أشوف الحال بعيالي

وأنا اذكر صيحة الفران
وأنا اذكر ونة الجوعان

أنا اذكر كل ذا كله
ندور للخبز بله

أنا اذكر لآشكى شاكي
صفعتيني وأنا باكي
وأنا اذكر دعسة خطاكي
...
تقولي يا ولد جنيت...
تطارد يا خبل الونيت.

وأنا اذكر كل ذا واسأل ..!!
زماني راح وتبدل ..!!

وهذا القرص من أيدك
تعجنينه !! تلمينه!! تخبزينه !!
وأنا فرحان
وأنا اذكر فرحة الفران

تبدل كل شيء فينا
معاد به شيء يكفينا

أنا اذكر أول بجامه,,,
وثوب(ن) مشترى للعيد
وأنا اذكر أول عمامة ,,
وفرحة خالتي بالعيد
...
أنا اذكر يوم مابه شيء
بعدنا ما عرفنا شيء

ودمعات الفرح منك
تعبر بالفرح عنك

عيالي ياهنا قلبي
تعالوا خلكم قربي

أنا اذكر شايبي المرحوم
اشوفه مرتكي لليوم

يصيح بنا يعذبنا ..!!عيالي ولموا الدلة
أناظر وافتزع يمه..!! عطيني البيز يايمه

تسمي ثم تقول لي ,,ترفق لا تطيح يمه

ولا من قعد رآسه
تمدد صابه نعاسه

زعق فيني ,,علامك ما تغطيني
أقول ابشر !!
أحس البرد..
وازيده من بطاطيني

وأنا اذكر مامة الدافور
وربعي وخاطري المكسور

أنا اذكر حارتي تبكي
بعضهم يشتكي جوعان
وأنا اذكر دخلة الضيفان
وخالي وعزوتي جمعان ..

أنا اذكر صيحة العسه
ووجوع الليل مندسه

تبي ندفا على الكانون
ولابة حضر أو قانون
ولا به رأفت الهجان
****
وانا اذكر موضة القيطان
وصوت العنز واللبان
رواية في زمان كان
***
أنا اذكر يوم قالوا عيد
وأنا عيدي بزنوبة

وأنا احفظ سورة الإخلاص
وأرتل سورة التوبة

أنا اعرف حظي المسكين:::::: كبار القوم هجوا به
وأنا احلف لو بيارقنا :::::::::على التاريخ منصوبه
يباريني نزيف الجرح :::::::ويسأل وين ودوا به

أقول له وش تبي يا جرح..؟؟
تبي تاخذ علي نوبه!!

تبي تحرس معاناتي:: وكل الأرض مقلوبه
تبي تسكن على قبري:: وأنا المدفون في ثوبه
وعمي مات في بيتة:: وخالي قد تغدوا به
وانا جرحي يسافر بي:: وليت الناس حسوا به
..
انا اذكر كل ذا يمه
انا اعرف حاجتك يمه
انا اذكر جرحنا يمه

انا اذكر يوم سقيانا من الزفة
انا وعيالك الحلوين ملتفة

نبي ندفا من الكانون
نبي نشرح وساع عيون
نبي نملا جياع بطون
نبي نصرخ ونملا الكون
...
انا اذكر كل ذا مدفون
تبين الصدق يايمه
انا بذاك الزمن مجنون
...
عرفت اشلون لا صحتي
احب رأسك
عرفتك زين لاصمتي ولا فطرتي
ولا باعك بعض ناسك!!

انا اذكر يوم نتبارى
ولا حدن موذي جاره
ولنا قانون بالحاره
**
يفسر قصة الدنيا
غريبه قصة الدنيا
...
انا اذكر دمعتي بعيني
وثيقة بينك وبيني
تعذبني:: تكذبني:: تعاتبني
تبي تقبض على رمشك وتسحبني
ليا صحتي انا ويني
***
أشوف الدرب بعيونك
أشوف البرق بسنونك
انا منهو وانا بدونك
انا حظك
وانا منك
وارد المايله عنك

تذكرني سواليفك
وانا أراقب مذاريفك

بذاك الجرح في الكتمان
وانا إلى بكى انسان
دموع إنسان
...
انا اذكر قصة الشراب
تحول بيدنا كوره

وانا اذكر قصة الطلاب
وأستاذي وباكورة
**
انا اذكر لعبة الشرعى
وبعض أغنامنا ترعى

كبرنا في العمر يمه
تغربنا !!
تباعدنا!!
تعذبنا!!

نبي نلحق بباقي الناس
نبي نشيلك بباقي الراس
نبي نطرد من الوسواس
جروح القلب والإحساس
...
بعضنا غادر الديره
بعضنا غاص في الحيره
ولكنا حفظنا الروح
ومعنى الحب والغيره
**
بعضنا ما قرأ كلمه
وبعضنا فر من حلمه
وبعضنا طاح به علمه
**
ندور وين..؟؟ وش صرنا ..؟
ولآبه نو يمطرنا
وصرنا مثل كل الناس
نصارع في كلآم الناس
نعاين في وجوه الناس
تغير كل هاك الناس

انا ودي اصارحكي
وعيني ما تبارحكي

ابيكي تسمحي (يمه) ..
جعل ربي يسامحكي
...
أبا احكي للملأ يمه
!!
احكيهم عن أوجاعي
وكم داحوس بصباعي
وكم حزن(ن) على اشراعي

زماني ما عرف دكتور
زمان القاز والدا فور
زمان العجن والتنور
زمان لو تعيشونة
بكل العمر تشرونة

زمان الفكس والحنا
زمان الجرح والونا
..
زمان لآبكى واحد
تشوف الكون في واحد
تحس الآه من واحد
وان الدار به واحد
....
زمان التضحيه شيمه
وقول الصدق له قيمه
عيون الناس تسليمه
ونفرح لابدت غيمه

انا اذكر فرشة الشمله
وانا اذكر دبة النمله
وحولي الناس كانوا ناس
ولابه شيك أو عمله
...
انا اذكر لاتجمعنا
نغمس من طرف ماعون
انا اذكر عمق ضحكتنا
وتشهد للجروح عيون

وش الي يجبر الدنيا
تبادلني الضحاك طعون
تصبرني على جرحي
وانا اطلب من جراحي العون
...
وذا يحكي وذاك يصيح
ولابه حارس وخدام
وذا يبكي على حظة
وذا يسبح مع الأوهام
...
وفطور العيد بيازة
ولآبه ناس منحازة
ولابه ناس تغتالك
وتبكي لاجت جنازة

انا يمه عرفت إن الكبار كبار

وهرج الغيب اشوفة عار

وعرفت إن الزمن دوار
**
أنا اذكر طاسة الحنا
وخواتي ضاحكات اصغار

انا اذكر يوم ماكنا
عيون طافحات غبار

تبدلنا ولاكنا نناظر
مامضى ونحتار

زمان(ن) راح ... ولااحد مرتاح
يبدل جرحنا بجراح ..

الايالغالية وينك
تلميني من احزاني
تدليني لعنواني
تشوفي وين جرحي صار..؟؟
وانا ويني ؟؟ووش جاني..!!
...
انا يمه غريب ببيت
تدور حرقتي عن بيت
اداري الآه.. بكلمة ليت
واجفف دمعتي بياليت

والى منى نصيت القوم
يجيني ردهم ياليت
...
انا يمة اسير هموم
ولولآ دعوتك ما قوم
جروح الناس خلتهم
وانا جرحي معي لليوم
.....
جروح الناس عافتني
وانا كني جريح اليوم
هموم القوم في صدري
وانا همي نساه القوم
...
انا يمه.. وكم مثلي!!
غريب(ن) غربتة بيتة
زماني راح من عيني
وأحسب اني تعديته

تشوفي من انا بغيرك
ومنهو؟؟ حبني غيرك
ومنهو؟؟ أعشقه غيرك
ومنهو؟؟ افقده غيرك
....
تشوفيني أدور لك
أدوور بعيد...
أفتش في ثياب العيد
اردد آهتك وأعيد
بغيرك وش يكون العيد

انا منهو..!!؟؟ ليا..رحتي
وكم من جرح ..كم شفتي؟؟

انا يمه تمنيتك
خذيني عمري وعشتي
...
انا يمه بعد صدرك
أدور في زمن قاهر
أدور عن لبن طاهر
أدور عن فرح ظاهر
أسامر حزنك الساهر
********************
على جفني ...وليل صار يعرفني
يعذبني!! ويسعفني!! يهاودني
يكتفني!! يوديني!! ويجرفني
...
انا يمه أعيش بجرح,,, ليا لديت يزهمني !!
وإذا ما غفيت يدهمني ,,

ولابه حد يرحمني
سكوتك بس يفهمني
...
سكوتك بس يفهمني ....
سكوتك بس يفهمني.....
.................................................. ..
أخووووكم
البراك

الموضوع الأصلي: ((مسابقة اجمل خاطرة)) أم الخواطر اسميتها. | | الكاتب: البراك | | المصدر: شبكة بني عبس

[رواية]

اخي البراك
خاطره في منتهى الروعه
تعيد بذاكرتنا الى الوراء
كلمات متناسقه جمل جميله
لا استطيع الا ان اقول بالتوفيق
تقبل مروري
اختك طيف المشاعر

[البراك]

مشكوره طيف المشاعر

على المرور ك المعطر

وشكرك على التواجد

[المغرم اليائس]

لو اقدمنا على رسم لوحات ممزوجة بروح الفرح00!!

واشعلنا شموع الامل في ليل الآسى00!!


وكحلنا تلك الاعين الحسيرة بشلالات دموع السعادة00!!

تتوافق الطرقات لكي نعود من حيث الالم والحزن00!!

ليغرقنا الحزن بسخاته الممزوجة بالألم00!!


البراك,,

يجب على الكُل الالتزام بالصمت تحت سقيفة هذه القاعة00!!

التي اعتلى بها صوت الناي وطغى00!!
*
*
وفقك الله

[فواز الدواي]

اخي الكريم / البراك

لقد ابحرت حروفك في بحر الابداع

تقبل مرروي

[الهنوف]

كلمات وعبارات منسقة بشكل رااائع

البراك

الله يعطيكِ ألف عافية وتمنياتي لك كل التوفيق

دمت بخير
أختك الهنوف

[بنت العبسي]

كلمات في غاية الروعة الله يسلم يدينك يارب

[البراك]

المغرم اليائس

فواز الدواي

الهنوف

الله يعطيكم العافية على تواصلكم معنا

وشكرا على مروركم الكريم