[رشيد]

.


يا قلب هذي سيرة الدنيا من البعد السحيق

والنفس لاضاقت على رب البرا مخراجها

يا طير ياللي فالهوا تمد جنحانك طليق

خذني معك وابعد بنا فارض الخلا وفجاجها

أنا تحمّلت وصبرت وفالحشا جرحٍ عميق

والعين قد لي مدةٍ نوم الهنا ماساجها

سئمت حتى صارت الدنيا على نفسي تضيق

وان كبر ضيق النفس عند الله كبير أفراجها

ياللي تلوم النفس لو انّك على صدري تويق

عرفت ويش اللي طنا نفسي وزاد ازعاجها

غديت في دنيا التعاسة والشقا مثل الغريق

اللي وقع في غبّة تصفق عليه امواجها

واليا بغيت اعبر معا دربي وشقيت الطريق

لقيت لي ناسٍ على دربي تمد سياجها

وعجزت في ذا الوقت لا اميّز فريقٍ عن فريق

الوقت نفس الوقت والناس اختلف منهاجها

والخنجر اللي بالظهر لاصار من كف الصديق

تبطي وهي تنزف وتبطي ما لقيت علاجها

وتهون لامن جات من لعدا ولاهي من رفيق

وان جات من لصحاب يصعب حلها وادراجها

وتحسها أثقل من جبل يذبل ومن هضبة طويق

وتشب نارٍ فالحشا ما ينطفي وهّاجها

-

للشاعر/ عبد الهادي سعيد المسعودي

.

الموضوع الأصلي: سيرة الدنيا #شعر | | الكاتب: رشيد | | المصدر: شبكة بني عبس

[صويلح الصالح]

صح لسانك

والخنجر اللي بالظهر لاصار من كف الصديق

تبطي وهي تنزف وتبطي ما لقيت علاجها

وتهون لامن جات من لعدا ولاهي من رفيق

وان جات من لصحاب يصعب حلها وادراجها

وتحسها أثقل من جبل يذبل ومن هضبة طويق

وتشب نارٍ فالحشا ما ينطفي وهّاجها



الله الله عليك ابيات في قمه اروعه سلمت اناملك