[سيوف بني عبس]

عطونا حق الله
يرضى عليكم الله
قدام بيتكم دله
عسى الفقر ما يدله

اعطونا حق الليلة
والا بنذبح عييلة (عجيلة)
قدام بيتكم وادي
والخير كله ينادي

قدام بيتكم طاسة
وعيونكم محتاسة
اعطونا الله يعطيكم
وبيت مكة يوديكم







السلام عليكم ورحمة الله وبركاتــه
وكل عام وانتو بخير الله يعيده علينـا وعليكـم بالصحـه والعافيـه وطولة العمـر

ليلــة القرقيعـان
هالمناسبـة أغلبنـا نعرفهـا , وهي منتشـره في دول الخليج بشكل عـام





تاريخها ليلـة 15 رمضـان , يكون فيهـا احتفـال للأطفـال ووالكبـار. لهـا طقوس معينه راح احكي عنها بعد شوي, بس اول خلونا نشوف من وين جت تسمية الـ "قرقيعان"فيه قولين هما الراجحين في التسميه لكن انا باخذ القول الموافق لمعتقداتنا لان القول الثاني يربطه بولادة الحسين ابن علي عليهما السلام واحنا مالنا بالاشياء هذي , ناخذ بس اللي يناسبنا ولايخالف ديننا ومعتقداتنا :

تقول المصادر بأنو تسمية قرقيعان مشتقة من كلمة "قرقعة" أو "قرع الطبل" لان الأطفال زمان كانو يدورون في الشوارع ليالي رمضان وهم شايلين طبلة صغيرة زي طبلة المسحراتي، يغنون أغاني وأهازيج معينة خاصة بهالمناسبة الحلوة, كل واحد شايل كيسه ويلف الاطفال عالبيوت في مجموعات طلبا للحلويات والمكسرات والقريض,
أحد هالاهازيج اللي يرددونها هو اغنية القرقيعان المشهـورة

قرقيعان وقرقيعان
بيت قصير ورمضان
عادت عليكم صيام
كل سنة وكل عام
سلم ولدهم يا الله
خله لأمه يا الله




ويقول البعض أن معناها لغويًّا هو قرة العين بشهر رمضان, وبمرور الزمان تحورت الكلمة وصارت تُنطق «قرقيعان»..ويرى آخرون أن كلمة القرقيعان تعني السلة الكبيرة المصنوعة من سعف النخيل التي يوضع بداخلها خليط من المكسرات والحلويات لتوزيعها على الأطفال، وقيل الفرحة والسعادة.


هذي كانت مقدمة بسيطة عن هالمناسبة تاريخيــاً

والحين خلونا ننتقل للقرقيعان في ايامنا هذي , والي تحول الى احتفالات منظمة تتناسب مع وقتنا وبيئتنا

التحضيـرات

التحضير لهالمناسبه احيانا يبدأ من قبل رمضان, من تحديد الموقع المناسب لاقامة الاحتفال و تجهيز الديكورات والمستلزمات الخاصه بهالمناسبة . واللي يقوم بهالتحضيرات غالبا الامهات والاخوات الكبار باتفاق بين كذا عائله.

س

وش تحضيراتكم للقرقيعان سواء هالسنة ولا السنوات اللي راحت؟ واذا كنتي شاركتي بهالتحضيرت فـ بايش شاركتي؟


المــكان

غالبـاً القرقيعـان يكـون في استراحـة العائلـة او البيـت الكبير للأهل, يجتمعـون عوائل كثيرة من الاهل و الاصدقاء واهم افراد في هالمناسبه هم الاطفال, بعض العوائل تستأجر استراحات وممكن يكون الاحتفال في مكان عام تنظمه جهة او جمعيه معينه.
س
وين بتسوون قرقيعانكم؟ (نبي نجي ) فيه أماكن عامه تعرفينها للـ قرقيعـان عشان الي ماعندهم القدره على التحضير لهالمناسبه يشاركون هناك؟

الزمـــان

وقت القرقيعان المتعارف عليه هو يوم 14 رمضـان ليلة 15وهالسنة يوافق الأثنين الجايه, بس الآن غالبية العوائل يخلون و وقت الاحتفال بحسب قدرتهم , فيه ناس بتحطه الخميس الجاي او الاربعاء لنهاية الدراسه وناس خلته الخميس هذا نظرا لان الجمعه وقته مزحوم . حنا بنسويه يوم الخميس الجاي عشان يصير قرقيعان واحتفال بالعطله

س
متى بتسوون قرقيعانكم ؟ b094


الـــزي

تتفنن الامهات والبنات باللبس الشعبي ,
ممكن دراعات\جلابيات\بنجابيات\ثوب زري مع البخنق والاكسسوارات الشعبيه مثل الهامه ,والبناجر...الخ,



حتى الشنطه ديزاينها شعبي..







وكل هذولي ينلقون بالاسواق الشعبيه مثل طيبه والعويس..ألخ او وسط المدينه(البلد) باسعار حلوه ومناسبه.
وفي الحين تصميم موديلات حديثه باقمشه من طراز قديـم, بلايز طويله تحتها جينزات , احد يلف الشماغ على الجينز ولا على شكل توب ... وهكذا حسب ذوق الوحده’

أما العيال فلبسهم هو الزي السعودي المعروف من ثوب وشماغ وممكن يكون فوقهم دقله بحيث يكون تغيير عن المعتاد , ممكن خنجر يعطي لوك حلو والطاقيه تكون زري والعقال قصب.



س
وش بتلبسين للقرقيعان ؟ وبزرانكم وش بتلبسونهم (بنات\أولاد)؟ عندك أفكار جديده للزي الشعبي (بنات\أولاد)؟ ووين الاماكن اللي تنصحين فيها لشراء هالاشياء؟

الـــديكــور
يفضل انه يكون ديكور المكان مرتبط بـ رمضان وجوه الروحاني وكمان بالاشياء الشعبيه, ممكن لو بالمكان خيمه تزيينها بالفوانيس والوجار وسلال الخوص المعبأه بالمعمول والكليجا والاقط لتقديمها مع القهوة والشاهي, ممكن استئجار المساند والمراكي واشياءثانيه شعبيه من محلات تأجير الزل والمتوفره بكل مكان والمبلغ مره قليلريال او ريالين عالقطعه. ولو مافي بالمكان خيمه بعد ممكن استئجارها. من الامور الحلوه بالديكور بعد السفر الخوص والجرات الفخاريه والخزف , يعني هيك اشياء تخلي الواحد يحس انه داخل شي قديم

س
هل للقرقيعان عندكم ديكور معين؟ عندك افكار مفيده وشعبيه مبتكره (أومو لازم مبتكره ) للديكور ؟



الفعاليات

ممكن تكون فيه فعاليات كثيره , مسابقات ثقافيه (اسئلة واجوبه) وتكون ممكن تدور حول التراث والماضي.
بعد ممكن تكون فيه العاب شعبيه قديمه , (شريط انشودة القرقيعان يكون مشغل طول الوقت –طبعا من غير موسيقى احترام لرمضان-) , يكون فيه نقش للحناء (اغلب السودانيات يعملونه) , تجديل الشعر, رسم على وجيه الاطفال , ممكن استئجار نطيطه او ملعب مائي , مهم تصوير الكاميرا الفيديو , اما الفوتو العادي ممكن تمسكين معك كاميرا وتصورين هالبزران وبوقت لاحق ترسلين لكل طفل صورته مع كلمه معبره بتكون مره شي حلو. وغيرها من الافكار البسيطه والي تعطي هاليوم معنى مختلف.

س
كيف تجري فعاليات ليلة القرقيعان عندكم؟ براسك حاجه حابه تنفذينها او تفيدينا فيها تملأ وقت هاليوم؟

أكياس القرقيعان




كل عائلـة تجيب قرقيعـانها وتوزعه على اطفالها واطفال العوائل الاخرى, الحين صار فيه فن بهالشي ,
في ناس تستخدم الغضاير الشعبيه القديمه

وفيه ناس تلف بقشه من قماش شعبي اللي يكون الوانه صارخه وعليه ورورد ونقشات حلوه, وفيه ناس تحطه بجرات فخاريه صغيرة


وممكن بقش خيشيه ..


اكياس القرقيعان

موجوده عند محلات العطارين انا شفتهم بعطار الحمود والي عنده ايضا الحلويات القديمه حقت يوم كنا صغار. وتطبيقهم سهل لو عندك وقت ومزاج رايق. وممكن تشترينلك قماش كثير وتودينه الخياط يسويه لك بمبلغ رمزي.تتعبا هالاكياس بحلويات منوعه ومكسرات و(فشفاش او بفك)




وممكن العاب

, وايضا ممكن تتوزع معها فوانيس بهالمناسبه,




او دمى قماشيه على هيئة بنت وولد لابسين الزي الشعبي (ايضا سهل تطبيقها). طبعا ترفق بطاقات للذكرى وللتعريف انه هذا قرقيعان الفلان.
انا فكرت هالسنه بتقـديم قرقيعان للكبار ايضا بس الى الان جالسه افكر وش اقدم.
طريقة تقديمها تجمع بسلة ولا بصندوق مثلا, ولا ببقشه كبيره.. المجال للابداع مفتوح. انتي وفنك.

س
وشو قرقيعانكم وكيف وزعتوه أو بتوزعونه؟ عندك افكـار حلوه لتوزيع القرقيعانات وتقديمها؟ وش الاماكن الي تنصحين فيها لشراء القرقيعان.؟


الأكل والضيافه بشكل عام





بما ان كل شي بهالمناسبة شعبي, فالعشــاء أو السحــور ايضا من الافضل يكون كله شعبي×شعبي من اطباق رئيسيه وحلويات (جريش\سليق\قرصان\مرقوق\مطازيز\رز\هريس\حنيني\محلا\ق شد\تاوه\مصابيب....الخ)

تقدم في حافظات كبيره لها بالشعبي شوي ... الصحون ايضا يفضل تكون شعبيه.. وديكور العشاء ككل يكون تراثي.
حتى المشروبات ممكن قوارير البيبسي والسفن القزاز اللي يعاد تعبئتها و الالبان اللي شكلها قديم (مثل اللبن اللي موجود بمحلات بيع الخضار والفواكه) ,
الشاي والقهوه تقدم في اواني شعبيه هذيك الي تجي عليها مثلثات ملونه, الان تلاقينها على شكل زمزميات حافظه للحراره بفناجيلها , موجوده عند اغلب محلات الاواني واكثر محلات ابو ريالين. التقديم مع الشاهي والقهوه مثل ماسبق وقلنا يكون كله شعبي من تمر معمول وكليجا واقط وكراث وجرجير , يعني اسالو جداتكم وبيعلمونكم

س
وش تاكلون ماهي تحضيراتكم للعشاء بهالمناسبه؟ هل تنصحين باطباق معينه للعشـاء؟ ديكورات عشاء معينه؟ تقديم الشاهي والقهوه كيف تنصحين فيه؟

معاني القرقيعان
• لمة الاهل والاصحاب اللي ممكن من فترة ماشفناهم يعني صلة الرحم.
• زراعة الفرح والسرور في نفوس الاطفال والكبار
• استشعار معنى رمضان واللي يشمل التراحم والموده وصلة الرحم والتقارب
• تعويد الاطفال على سنة وعادة جميله وتربية نفوسهم عليها بحيث يواصلون عليها في الكبر.


أخيـــراً
كل وحده مو من عادات اهلها عمل الـقرقيعان ممكن تبدا هي هالعادة الحلوه حتى لو على نطاق ضيق , بنات وعيال اخوانها واخواتها ولا اعمامها وخوالها ..الخ, تختارلها يوم وتبدا بالتحضيرات من الحين , تحضرات بسيطه ماتكلف وكلها خامات موجوده ومتوفره بكثره. يمكن ماتلاقي ذاك القبول والتشجيع عند الكبار بس الصغار اكيد بينبسطون ولما يشوفون كمية الفرح وقد ايش التحضيرات كانت رائعه بينبسطون ويحبونه وبتكون ذكرى حلوه للجميع وفاتحة خير لتوسيع هالمناسبة في سنوات قادمه.


مو كان الموضوع مو وقته تو ناس ع قرقعنا بس لزام نشطح ع شان الفوز :)
ملاحظه:
برعايه قروب شطحات حفظهم الله ورعاهم

الموضوع الأصلي: قرقيعــان وقرقيعــان بين قصيـر ورمضان --تعالو خوذو قرقيعاناتكم من قروب شطحاااات | | الكاتب: سيوف بني عبس | | المصدر: شبكة بني عبس

[سكره]

ههههههه
يعطـــيك العاأأأأأأأفيه
>‏>كل عأأأم وانتي بخيير<<

ان شـــاء الله نفؤؤؤز>>لاحد ينأأظرني ونا بعد بصير من القروب زي ماوعدتني سيؤؤؤفه


مشششششكووره ع الششطحه ياسيؤؤفه

[سحايب]

كل عاام وانتي بالف خير قلبو
هههههههههههههههههه
يعطيك العافيه

[ماااعندي نك]

الله يعطيك العاااااافيه شكل القروب حمااااااسي

[s&h alrashide]

الله يعطيك العافيه صراحه حماس الله يسعدكم

[سيوف بني عبس]

وانتم بصحه وعافيه
مشكورين ع مرور الكريم

ع طول دشيت بقرقعان

[لسعهـ شقآوة]

يعطيك العااااافيه طرح مميز
.
.
.

[سيوف بني عبس]

وانتي بصحه وعافيه ياغلاتي

يالله قرقعو بنات