[ابن جحيل]

السلام عليكم ورحمة الله

قريباً ، انهاء علاقة المرور بحوادث السيارات


خلال الاشهر القليلة الماضية وبعد ان تم أقرار النظام الخاص بشركات التامين وتم منح 13 شركة تراخيص رسمية بالعمل في السعودية تبلورت فكرة بقيادة مدير شركة التعاونية للتامين سابقاً ومدير شركة نجم (الاستاذ موسي الربيعان) بإنشاء شركة تحت اسم (نجم) ، وتم دفع راس مالها من قبل كل شركات التامين اللي تم الترخيص لها.

الشركة هذي وبعد اخذ الموافقات الأزمة من الجهات الحكومية المختصة بيكون دورها الأساسي هو اخذ مكان المرور وشركات التأمين في ما يخص حوادث السيارات بكل جوانبها.

يعني مثلا:

- اذا لا قدر الله وحصل لك حادث مرور واتصلت على الرقم 993 و المخصص للحوادث المرورية فلي بيرد عليك هو رجال او سيدة بشكل لطيف ومهذب ويأخذ منك المعلومات المتعلقة بالحادث (الموظف او الموظفة هذي يتبعون لشركة نجم).

- بعد ما تنهى مكالمتك عبر الهاتف وتبلغ عن الحادث المفترض وفي الظروف العادية المفترض تجيك سيارة المرور بعد كم ساعة ، لكن اللي بيصير هو ان اللي بيجيك هو مندوب من شركة نجم في سيارة خاصة بالشركة و بملابس رسمية خاصة بالشركة وبدون ان يكون للمرور أي علاقة او تدخل في خلال 15 دقيقة كحد اقصى في الظروف العادية (بيكونون مندوين الشركة موزعين في شوارع المدينة اللي انت ساكن فيها وسياراتهم مجهزة بروادو تجيهم بلاغات الحادث من غرفة عمليات الشركة فور اتصالك عليهم) ، الشخص هذا هو اللي بيقرر من يكون الخطاء عليه في الحادث و يسلم طرفي الحادث تقارير خاصة يراجع بموجبها كل طرف اقرب فرع لشركة نجم (في حال كان احد طرفي الحادث او اثنينهم غير مؤمنين فنا بشرح لكم النقطة هذي بعدين).

- عند مراجعتك لاقرب فرع لشركة نجم على مستوى السعودية بيكون في انتظاركم مندوبين من الشركة و بيعملون تقييم شامل لتلفيات سيارتك ويسلمونك تفويض تقوم بموجبة بإصلاح سيارتك عند أي ورشة تنتمى لفئة سيارتك (السيارات عند التأمين عليها بتكون مقسمة الى فئات حسب نوعها و موديلاها وما شابه ذلك و بتكون ورش الإصلاح ايضاً مقسمة الي فئات).

- عاد انت خذ التفويض اللي بيعطيه لك مندوب شركة نجم و ود سيارتك للورشة المناسبة وتابع أصلاحها بنفسك.

وهذي هي الخطة اللي بتقوم عليها الشركة ، طبعاً التفاصيل كثيرة و التخطيط طويل ، لكن أبشركم ان الشركة بتبدى اول مشوارها بشكل تجريبي بمدينة الخبر بعد تقريباً 6 أشهر من الان.

اعود للنقطة الخاصة بعدم وجود تامين مع احد طرفي الحادث او كلاهم ، في الحالة هذي و في المراحل الاولي بيتم استدعى المرور لمحاسبة المخطي في الحادث اذا كان غير مؤمن ، لكن القرار الخاص بمن يكون الخطى عليها بيكون بيد مندوب الشركة.

طبعاً المرور بيتولي الحوادث للغير مؤمنين في البدائية فقط لأنه بيتم وحسب الخطة المعمول بها عمل حمله مرورية مكثفة يتم فيها محاسبة الأشخاص الغير مؤمنين بالإضافة الي انه بيتم البدء في إصدار استمارات السيارات بمدة صلاحية سنة وحده بحيث ما يتم إصدار الاستمارة او تجديدها الا بوجود وثيقة تامين طرف ثالث كحد ادنا.


المشروع مثل ما انا قلت كبير جداً ولكنه ماهو جديد ، فعلى مستوى العالم يتم تطبيق نظام مشابه للشي هذا و اكثر لدرجة ان بعض الدول الغربية تسلم شركة مثل شركة نجم صلاحية اصدار استمارات السيارات و رخص القيادة ، و قد يكون هذا من ضمن خطط الشركة في المستقبل.

مميزات الشركة و الخدمات اللي يتقدمها للمواطنين اقدر اختصر بعضها كما يلي:

- اذا اتصل اللي صار عليها الحادث على الرقم 993 ما يحتاج يوصف موقعه لانه تم الاتفاق مع شركات الاتصالات المحلية بتحديد موقع الشخص المتصل بالضبط (يعني معاد يحتاج توصفون وين الحادث فيه).
- الشخص المؤمن يتعامل مع جهه وحده فقط في حال حصل عليها حادث لا قد الله (يعني معاد يحتاج تراجع المرور وبعدين تروح للصناعية وتقدر تلفيات سيارتك وبعدين تروح تقدر قطع الغيار وبعدين ترجع للمرور وتطالب بفلوسك او تروح تمرمط عند شركة التأمين)
- اذا فيه اصابات بشرية في حادث السيارة فموظفي شركة نجم هم اللي بينسقون بشكل مباشر مع الاسعاف و الاطفاء.
- مندوب شركة نجم وعند حضور السيارة المصدومة بيقوم بعمل كامل تكاليف الاصلاح من اجور يد وقطع غيار بشكل دقيق لانه بيشتغل على برنامج الّي مخزم فيه تكالف الاصلاح بالساعة بالاضافة الي ارتباط البرنامج باقسام قطع الغيار في وكالات السيارات.

- بيتم الغاء شي اسمه تقدير شيخ الدلالين وبيتم عمل كتيب موحد تكون فيه اسعار جميع السيارات بمختلف موديلاتها (انبسط يا راعي السيارة اللي قيمتها في السوق قليلة لانه اذا لاقدر الله وصار لك حادث معاد انت خايف شيخ الدلالين يخفس بقيمة موترك).


هذا التفاصيل اللي عندي الان وانا حرصت اطرح الموضوع في الجادة عشان اعرف وجهات النظر المختلفة للموضوع وفي حال ورود تعليق او اقتراح مفيد انا بقوم بنقله للشركة فقد يكون في بال المواطن العادي شي غفلت عنه الشركة.



في النهاية اكيد بيجي احد يسأل و يقول وين مصدرك يا اسبيرانزا ، وانا طبعاً برد و اقول انا مصدر نفسي بشكل مباشر و غير مباشر ، الشكل المباشر هو لاني اعطيت مجموعة من الاقتراحات لكيفية عمل الشركة لاحد موظفي الشركة بصفتي موظف سابق في شركة تامين وكنت مسئول عن تقدير تلفيات السيارات ، و العلاقة الغير مباشرة هو ان موظف الشركة هذا هو احد الزملاء و اشوفه بشكل شبه يومي في الاستراحة.

لكم اجمل تحية
(رسالة في بريدي)

الموضوع الأصلي: قريباً ، انهاء علاقة المرور بحوادث السيارات | | الكاتب: ابن جحيل | | المصدر: شبكة بني عبس

[عابد الرشيدي]

الله يعطيك الف عافية