[أبن حديجان العجرمي العبسي]

اقتباس من مشاركة سالم النرجسي عوَافي أخَوي علَى هالموَضوعُ الرائَع

هلا وغلا أخ سالم منور الموضوووووع

والله يعافيك ياغالي والرائع أيضا مرورك العزيز ولاهنت ياغالي .

[راعي السفاري]

بيض الله وجهك يا العبسي على الرحله الممتعه والشيقه والله يعطيكم العافيه

[(ابوعواض)]

ربي يعزك جعلهااا عوافي

[أبن حديجان العجرمي العبسي]

اقتباس من مشاركة راعي السفاري بيض الله وجهك يا العبسي على الرحله الممتعه والشيقه والله يعطيكم العافيه

هلا وغلا راعي السفاري منور ياغالي

ووجهك أبيض ياحلووو والله يعافيك يارب .

[أبن حديجان العجرمي العبسي]

اقتباس من مشاركة (ابوعواض) ربي يعزك جعلهااا عوافي

الله يعزك بطاعته يأبوعوض ولاهنت ياغالي

وأنتظر ختام الرحلة إن شاء الله .

[سند الداموك]

متااااااااااااااابع وعيونه للمرقه والكبسه هههههههههههههه بالعاافيه يابن حديجان

ومتااااااااااابع للرحله حتى النهااااااااااايه

تحيااااااااتي لك

[أبن حديجان العجرمي العبسي]

صباح الخير على الجميع صباحكم عسل وأفراح وجووووووري وفل وياسمين

أخبــــــــــــــــاركم ياعبس لبا قلبوووبكم وزوار شبكة عبس الكرام حياااكم الله

من جديد مع أخر جزء من رحلتنا << من قلب وربي ماودي أخلص من الرحله ههههه

اليوم صورنا غير الصور إلي شفتووها نعم غير جبنا لكم آخر صور الرحلة علما" آن الصور القادمة بطريق العودة إلي العاصمة أديس أبابا
وحنا بطريق العودة جرالنا ليل أقشر مع شملز << لأخر لحضة مع مرتفع ضغطنا منه أول شي من ناحية قيادة السيارة بطريق العودة والمشلكة الأدهي من ذالك مشينا والوقت روعة قبل الغروب بساعة تقريبا" أبك ياشملز توقع تكفا أنتبه الله يرحم والديك توقع << أنواع الهبال بطريق العوده بنهار أشوا نشوووف المشكلة يوم أمسانا الليل وحنا بعيد عن العاصمة
وهذي الصور بطريق العودة إلي أديس أبابا

وهذي صوره ثانية

مايعرف يتصرف مع السيارة بنهار دووووب الليل !!! طفشنا والله طفشنا
والمشكلة الأكبــر من هذا يوم وصلنا والله الحمد بسلامة طلبنا فندقنا إلي نزلنا فيه يوم نوصل لأثيوبيا ,, يوم جينا الفندق نزلنا عزبتنا وشناطنا بحوش الفندق يوم ناديت شملز قلنا نبغا نعطية حسابه ونخليه يطس الله لايرده << آآآمين
صوت عليه ياشملز تعال جتك المصيبة تو << أخذتها من الشيبان ههههه
قلت كم باقي علينا لك حسبناها طلع الباقي له 5500 بر مقدم معطينه حول 3000بر وفوقها حلاوه ,, المهم عزلنا حسابه وسم الله لايردك دوووك قروووشك ياشملز أخذ الفلوس وعطانــي أبتسامة عريضة مررررررره قال أوكي مستر أحمد << بدأ اللعب معه ,, قال أوكي حساب السيارة وصل هلحين حسابي أنا 7 أيام معكم غير حساب السيارة !!! << خوياي كلهم أتفتم عليه وقلت وش قلت ؟؟ قال حسابي أنا غير حساب السيارة !! ولاتغشمر ياشملز قال لا هذا حسابي أنا جالس معكم 7 أيام وحسابي غير ؟؟!! قلت حسابك من حساب السيارة قال مررررررره مالك لوا يأحمد حسابي غير قلت تضحك علينا ولا وش السالفه ؟؟ قال لا هذا أتفاقنا !! ؟؟ << يوم قال أتفاق قلت من إلي أتفق معك طبعا" مع شد وجذب بالكلام قال جمال متفق معكم أن حساب السيارة غير وحسابي غير !!!! صابتنا الدهشة قلنا جمال قال كذا قال أيه وأذا ماعطيتوني أطلب الشرطة << أنطح الصوت بصووت قلت شرطة شرطة وش المشكلة أنت نصاب وملعووون أبوجد << تمنيت أقووولها له بالأنجليزي هههههه
أبونايف قال الله يعلن إلي مايسجن على شانك ياملعون الوالدين أرتفع ضغطنا من جمال , جمال واحد يتكلم عربي فهم الملعون قال أنا كلمتهم وقلت حساب السيارة غير وحسابك غير نكبنا مع بعض مع أن الأتفاق مع السيارة حسابه مالنا شغل بحسابه ,, المهم بعد شد وجذب معه وصياح أتصل على أخووه وطلع أبن حلال تفاهمت معه وقلت جمال نكبنا مع بعض وحسابه عند جمال ماهو عندي تفهم الوضع وشكرنا على أستأجار سيارته وقال مره ثانية أطلبو شملز قلت زين أبشر مره ثانية نخليه يحترينا عن باب المطار << أييييييييييييه هين ههههههه

وعلى طول جانا شملز وعطا كل واحد منا طخمة على الخد وقال انا أسف وأسمحولي على الازعاج ومره ثانية اتصلو فيني قلت أبشر بس زال تطلع من باب الفندق نبا نبكي عليك << أنواع المجاملات ههههههه

المهم مشا شملز وعلى طووول كل واحد أخذ الأرض من التعب والمشوار الطويل مع شملز هههههه

أصبحنا وأصبح الملك لله وصلحنا القهوا والشاهي تقهوينا وكان صباح ممطر والجو بديع لأبعد الحدوووود الأمطار والخير من الله

بعد ماتقهوينا وأفطرنا وجلسنا نستمتع بسوالف مقناصنا وشملز ماغاب من جلسة الحوار أبونايف يقوول يالله جاني نوووم والسبه إني ماكسرت خشم شملز هههه
المهم عاد معنا من الصيد حبــرو وعنز سلمي قلت الكبــــسه على أنتم أرقدوو

والكبسه جاهزة الساعة 2 الظهر إن شاء الله ,, اليوم هذا بذات كان ضايق خلقي
لأن طيارة خوياي بكرا قبلنا الساعة 8 مساء" وحنا نطير بعدهم الساعة 10ونص مساء" قافله معي الأخلاق وكان همي الأكبر أني أأكد حجزي أنا والوالد لأني ماأكد الحجز قلت العصر نرووح نأكد الحجز عقب مانتغدا ونرتاح ,, قلت أقوووم أجهز الغدا أزين خوياي متباطين المرقه

وبسم الله توكلنا على الله دشيت المطبخ (( أذكرو الله ))
هنا جمب العنز سلمي والبصل والطماط والثوم المقشر والغير مقشر

وصورة أخرى

هنــا أبدع وأبدع لازم لأنقل لكم كما الحقيقة

نضيف اللحم لمدة عشر دقايق على نار متوسطة مع التقليب المستمر << زين زين يأبن حديجان كمل هههههه

بعد التقليب المستمر وتغير لون اللحم نضيف البزار مع التقليب

بعد التقليب من عشر دقايق إلي 15 دقيقة نضيف الطماطم والفلفل الأسود

[أبن حديجان العجرمي العبسي]

نغسل الرز جيدا" عدة مرات وبعدها ينقع بماء مع الفلفل الأخضر للنكها الجيده

بعد أضافه الطماطم والفلفل الأسود أضف الماء الحار على اللحم ويكون أرتفاع اللحم 2صانتي تقريبا" مع اضافة الملح ,, يقفل الكاتم جيدا" ويرفع على النار لمدة عشرين دقيقة بعد مايصفر السفتي (( حسبة 20 دقيقة بعد مايطلع الصوت تس تس تس هههه))
بعد العشرين دقيقة نفتح الكاتم وهذي نتيجته << أنتبه لاتدش بشاشه يصير فيك كذا هههههه

خوياي كلن بفنجاله تكفا يأحمد عطنا لاتخلينا أبشروو بدووور يارجال ههههه

بعد مارتشفنا وكلن أخذ قسمه من المرقا جا وقت الرز

بعد ماضفت الرز قلت أخذ وقتي مع المزيون هذا وشرايكم لحد يبلشني يقول أبغا
ناظر الفلفل مدفوووون ههههههه

بعد أضافة الرز يترك على نار عاليه إلي وقت تصفير السفتي تس تس تس
نحسب 7 دقايق للرز كاااااااااااايف من قلب الرز يفتح النفس بقوة

بعد ماطلع البخار المتبقي داخل القدر رجاء خاص أذكرو الله

صورة أخرى لرز لحد يمد يده يكســـر شاشة جهازة

وش رايكم تقلطووون معنا ؟؟ !!

وهنــــــا أيضا شرايكم ؟

بعد ماتغدينا وعينا من الله كل خير قلت لخوينا أنا والوالد نغا نأكد حجزنا علي الخطوووط الأثيوبية قل متي رحلتكم قلنا بكرا بعد خويانا بساعتين تقريبا" قال محل الخطوط قريب من هنا عطني جوازاتكم والتذاكر وأروح أنا وأبونايف نأكد الحجز قلت توكل على الله ,, بعد ماطلعو من الفندق أتصلو علينا قال الله يرجك بغت تطوووفكم الطيارة !!! ؟؟؟ أفا ليه قال حجزكم الليله تطيرون الساعة 8 التواجد بالمطار تطيرون الساعة عشر !! قلت بالله عليك يأبونايف قال ولم أغراضك الله يرجك ,, لأن خويانا مستانسين لأنهم يطيرون قبلنا وأنا قافله معي والله كريم عكس السالفه عليهم ولا بعد قبلهم بيوم ههههههههههه هلحين صارت أخلاقهم مااااااش يوم أبغا أمشي أنا والوالد
المهم قلت يالله أنا أبجهز أغراضي أنا والشايب وبقسم العسل ناديت أبومبارك وعلمته بسالفه قلت الليله طيارتنا أنا والشايب وماصدقني إلا يوم وصل أبونايف من مكتب الحجز وقفلت مع الشباب ههههههه
المهم قلت عطنا حقنا من العسل مع النحل طبعا" << فيه نحل ميت هههه والباقي عاااااااافيه على قلوووووبكم
ولكم الصوووووووووور

رجاء خاص أذكور الله

عطنــــا من الشمع ولاتهوووون كثـــر يأبومبارك

أبومبارك ذبحه العسل ههههههههههههههه يقول والله مافي أزين من عسل الطلح

بنهـــــــــاية نقسيم العسل شلنا أغراضنا أنا والشايب وتوجهنا المطار الساعة 8 إلا عشر وادعنا خويانا على أمل أن نلتقي برحلة أخرى على خير وخلنا المطار وطرنا الساعة 10 من الليل ونزلنا البحرين ساعة وبعدها وصلنا أرض الوطن بحفظ الله ورعايته وبعدها خوياانا وصلم بحفظ الله ورعايته سالمين غانمين إلي أهلم

وبنهاية الموضوووع أهدي لكم الصورة التالية من قلب أخوكم لكل من تابع الموضوع من أوله إلي نهايتة وأرجو أن تتقبلو الهدية وأسمحووولي على القصور
على أمل أن نلتقي معكم علي خير وبركة مع رحلة جديدة إن شاء الله .

مع تحيـــــات أخوكم/ أحمد حديجان العجرمي