[رواية]

(البارت الواحد والعشرون)

سألت نوره نوف "ندى وينها؟تأخرت!"

تطلعت نوف حولها إلى مجلس النساء والذي لم يكن فيه سوي عائلة عمها أبو طلال وأبو ماجد.

قالت هامسه "هي قالت لي قبل ساعه إنها بتنزل وللحين ما بينت"

اقتربت هند قائله "انتم ايش تقولون؟"

التفتت نوف إلى هند ثم قالت" نوره كانت تسأل عن ندى"

تنهدت هند قائله "يا قلبي عليكِ يا ندى...اليوم زواجك وكأنه يوم جنازتك"

صرخت نوره بصوت خافت"بسم الله عليها"

قالت نوف بحزن"تكفين يا هند لا تذكريني باللي صار"

هند"كلنا غلطانين لما تركناها تنفذ اللي براسها"

نوره"ندى فاجأتنا بزواجها...أصحى من النوم الا وألقى رساله من نوف تقول فيها ان زواج ندى الليله"

همست نوف"هي قالت لأبوي أنا موافقه بشرط ان زواجي يكون باليوم الثاني"

هند"هي على ايش ناويه"

نوف"صدقيني تساوت عندها الدنيا"

نوره"جدتي تدري بالموضوع؟"

نوف"لا طبعاً..ندى كانت حريصه انهم ما يدرون..حتى انها ما ردت على مكالمات جدتي"

نوره"الله يكون في عونك يا ندى"

هند"اعذروني لكن أبو سلمان ضغط عليها شوي وما أعطاها فرصه..وسلمان ما اهتم لتوسلاتها ما تقل انها

بنت عمه ويتيمه"

نوف"سلمان هذا انسان معقد...وهو ما يصدق الا اللي يشوفه قدام عيونه"

نوره"اتركونا من سلمان...أنا خايفه على ندى من سلطان"

هند"ليش ما عندها أهل؟!"

ابتسمت نوف باستهزاء"وينهم أهلها؟! اللي رموها عليه أول ما سمعوا بالخبر..كل واحد هامته مصلحته"

هند"حتى ردت فعل لصالحها ما سمعنا"

غمزت لها نوره قائله"يقولون ان فيصل عطاه كف ما ينساه طول عمره"

غضنت هند جبينها قائله"كنت أحسبه ما يعرف يذبح دجاجه"

نوره"انتبهي أخوي وأعرفه اذا عصب ما يندرى ايش ممكن يسوي"

هند"ما يهمني ..."

نوف"عرف الحبيب مكانه فتدللا"

همست أم فيصل لأم سلمان قائله"أقول يا أم سلمان..ما أشوف أحد من أهل المعرس بس حنا اللي جايين..ما تقل

زواج"

قالت أم سلمان بهدوء"هذا شرط البنت ما تبي فرح كبير..والولد أبوه ميت..وأمه عجوز ما تقدر تطلع من بيتها"

قالت أم فيصل بتشدق"ايه الله يستر على بناتنا...وزين اللي سوته"

قالت أم سلمان بغضب"أم فيصل..ندى انتي تعرفينها أكثر مني...مستحيل تخون أهلها"

همست أم فيصل"أجل اللي سوته ايش تسمينه..ومن اللي قابلها بالسوق خيالها"

أم سلمان"الدنيا هذي مليانه فتن....والله أعلم من بلاها...ندى ما كانت تطلع الا الى كليتها أو مع نوف للسوق..

والبنت مؤدبه وخلوقه...من دخلت هالبيت ما شفنا منها إلا كل خير"

أم فيصل"أنا أشهد ان البنت عاقله...لكن الشيطان شاطر"

أم سلمان"انتبهي لكلامك يا أم فيصل"

أم ماجد"حرام عليكِ يا أم فيصل...والله ان ندى أحسن البنات خلق"

أم فيصل"لو كانت بريئه مثل ما تقولون...ليش رضت تتزوج سلطان"

أم سلمان"لأن ما أحد عاطاها فرصه وما أحد صدقها...عرفت انها لو رفضت بتطاردها عيون الشك بكل مكان..

حبت انها تحفظ ماء وجه عمها...وما حبت الفضيحه انها تطلع خارج بيتنا...كانت تعرف انها اذا رفضت

ممكن انه يشهر فيها وفي عايلتها...ندى وأعرفها أهم شي كرامتها ولو كان هذا بمقابل حياتها"

أم ماجد"الله يكبرها بعقلها...طيب وجدانها ليش ما شفناهم؟!"

أم سلمان"كان هذا شرط ندى الثاني إن جدانها ما يدرون باللي حصل"

قالت أم فيصل بتشدق"ايه خايفه عليهم من الصدمه"

أم سلمان"الا أقول يا أم فيصل...نهى ليش ما جات معك؟!"

أم فيصل"نهى تعبانه...وما تقدر تجي"

أم سلمان"وانتي كيف تتركين بنتك لوحدها بدون رقيب؟!"

أم فيصل"عندها الخدم"

همست أم سلمان"هذا بلا أبوك يا عقاب"

أم فيصل"والله بنتي وواثقه فيها...وبعدين هذا حرصك ما جاب نتيجه"

أم سلمان"ما أقول الا حسبي الله على من كان السبب"

أم فيصل"وانتي للحين شاكه ان ندى فيه أحد متبلي عليها"

أم سلمان"الا متأكده..."

رن جهاز أم سلمان النقال فأجابت قائله"هلا أبو سلمان"

أبو سلمان"محمد..تراه وصل قبل شوي من السفر"

أم سلمان"والله...يا هلا فيه...هو عندكم الحين"

تنهد أبو سلمان قائلاً"لا..من شاف الضيوف طلع على طول...الظاهر ضايق صدره على بنت عمه"

قالت أم سلمان في نفسها"يا ويل حالي كان اللي بقلبك صحيح يا محمد" ثم أردفت"انت ما تدري وين راح؟"

أبو سلمان"وهو عطاني فرصه أكلمه أصلا"

أم سلمان"الله يستر يا أم سلمان لا يكون ظلمنا البنت"

أبو سلمان"أقول لا يكثر...يالله بسرعه استعجلي ندى...زوجها يبي يمشي"

أم سلمان"ان شاء الله الحين"

التفتت أم سلمان إلى نوف قائله"يمه...روحي لندى استعجليها...زوجها يبي يمشي"

نهضت نوف قائله"ان شاء الله"

وقفت نوره وهند وقلن جميعاً"خذينا معك"

طرقت نوف الباب ثم فتحت الغرفه ودخلت معها نوره وهند وحين وقع بصرها على ندى شهقت.

كانت ندى ترتدي تيور أسود وقد خلا وجهها من المساحيق..كما أنها رفعت شعرها إلى أعلى باهمال.

نوف"ندى..ايش مسويه بعمرك"

صفقت هند متحمسه"تعجبيني"

نوره"ندو...بسم الله عليكِ..وين فستان الزواج؟!"

اقتربت نوف من ندى ثم مسدت ظهرها"ندو...حياتي ..تكفين البسي فستانك"

ندى"ألبس فستان الزواج عشان أخدع مين؟! أنا مت يا نوف واليوم جنازتي"

شهقت هند قائله"بسم الله عليكِ يا قلبي..انشاء الله بسلطانوه ولا فيكِ"

نوف"ندو..لا تقولين كذا..لا تذبحيني"

ندى"وأنا ايش أقول وكل ما شفت وجه سلمان أو وجه عمي أموت باليوم ألف مره"

نوره"ندى..انتي إلى الآن في بر الأمان..راجعي نفسك..واذا ما تبينه..لا سلطان ولا عشره من أمثاله يقدرون

يوصلون لكِ"

تطلعت إليها ندى ثم ابتسمت برقه"هذا قدري يا نوره وأنا راضيه فيه"

هند"ندوش علميه قدره...خليه يعرف ان بنات الناس مو لعبه"

ندى"انتي تعتقدين يا هند انه راح يعطيني بال أو يأتمني على بيته وحلاله وقلبه..انسي"

نوف"حسبي الله عليك يا سلطان وعلى أمثالك"

هند"ريحي نفسك يا نوف..وكما تدين تدان...الله مطلع على كل شي..ومثل ما سلطان وغيره يبحثون على هتك

ستر البنات الغافلات صدقيني بيجي من يهتك سترهم"

نوره"أصلاً قذف المحصنات يعتبر من الكبائر"

ابتسمت ندى بشماته"هذا بالنسبه للمحصنات..لا تنسين ان فيه بنات من نفس نوعية سلطان...حياتهن غزل

ولعب وضحك.. وممكن يرمن بلاهن على غيرهن...لكن الله حسيبهن"

التفتت ندى إلى نوف قائله"تدري يا نوف ان نجلاء طلعت اخت سلطان"

نوف"معقوله؟!"

ندى"ايه ..لكن هي ما تدري عن شي..حتى زواجي اعتقد ما تعرف عنه شي"

نوف"الله يعينك يا ندى ما أدري ايش بيصير لك"

ندى"وايش بيصير أكثر من اللي صار...أنا مكتوب علي الشقى من ولدت"

اقتربت نوف هامسه"ندو"أبوي اتصل قبل شوي ويقول اطلعي سلطان يبي يمشي"

أخذت ندى نفس عميق ثم قالت"اللهم آجرني في مصيبتي واخلفني خيراً منها"

أغمضت هند عينيها بألم وبكت نوره..اقتربت نوف هامسه في أذن ندى" محمد وصل"

أحست ندى بخنجر يغرس في قلبها...تناولت قلم وكتبت عدة كلمات ثم طوت الورقه وأعطتها نوف.

قالت ندى هامسه"سلميها محمد"

ربيت بالهم والهم ربى بيا أبعد عن الناس وتلحقني الأذية

رجيت فرحة وأحلام وردية لقيت الأحـــــــــلام مني بــــرية

رضيت القسمة رضيت الهدية وهديتي عذاب وقلوب جفيـــــة

ارتدت ندى عباءتها وطرحتها ثم نزلت للأسفل استقبلها الجميع وحياها بتحفظ..

التفتت ندى حولها ثم قالت"وين نهى؟!"

أم فيصل"ما جات...كانت تعبانه....لكن تسلم عليكِ"

ندى"الله يعينها على نفسها"

التفتت ندى إلى أم سلمان قائله"سلميني على سلمان وقولي له زوجتك دكتوره واحرص مو كل ما شفتها تكلم احد

في مجال العمل قلت هذا حبيبها...وتذكر شي واحد ان ندى مستحيل تنسى وقفتك معاها...أما عمي فقولي له

كثر الله خيرك قدرت تحافظ على الأمانه اللي عندك..والمهر اللي ارسله سلطان على حساب عمي

ما راح تنمد ايدي له وخليه يعتبرها ثمن اقامتي هنا" اهتزت الكلمات من بين شفتيها ثم خرجت إلى السياره

حيث كان ينتظرها سلطان بالداخل.

دخلت ندى إلى الشقه ومن ثم إلى غرفة النوم الوحيده نظرت إلى الفوضى حولها وإلى الأثاث القديم..كما أن

رائحة الشقه كانت كريهه أصابت ندى بالغثيان.

قال سلطان مبتسماً بتفاخر"يا مرحباً فيكِ في بيتك..ما عليش الشقه مو قد المقام"

قالت ندى بكلمات ذات مغزى"هذا بس اللي انت تعتذر منه؟!"

سلطان"بدينا...احمدي ربك...والا وين تحصلين واحد مثلي"

تطلع إلى وجهها الخالي من الماكياج ثم قال مبتسماً"سبحان الخالق...فعلاً جمال رباني"

نظر إلى ساعته ثم اقترب من السرير.أخذ وساده وشرشف ثم ابتعد وقبل أن يخرج قالت ندى"سلطان"

التفت إليها سلطان ببطء ثم قال بهدوء "نعم....ايش عندك؟"

ندى"انت ليش تزوجتني؟"

هز سلطان كتفيه ثم قال" بصراحه ما قدرت أقاوم جمالك...بعدين كنتي تحدي بالنسبه لي وكان لازم احصل

عليكِ بأي ثمن...ولا تنسين انك توفرين لي ثمن المطاعم...يالله تصبحين على خير..ولا تحاولين تصحيني"

ندى"انت وين بتروح؟"

سلطان"للمجلس....مكاني الدائم"

همست ندى"درب يصد ما يرد"

كانت الساعه تشير إلى الرابعه فجراً حين نزلت نوف ووجدت محمد جالساً في الصاله وحده بينما

كان يخبئ وجهه خلف يديه.

همست بتردد"محمد"

رفع محمد رأسه ببطء.تطلع إلى نوف بوجه جامد ثم أنزل رأسه مره أخرى..انصدمت مما تراه فقد هرب

الدم من وجهه وانطفأ النور من عينيه وبان على محياه التعب والاعياء والهموم.

اقتربت منه قليلاً ثم رمت الورقه على الأريكه وولت هاربه.غضن محمد جبينه وهو ينظر إلى الورقه المطويه

بجانبه .شعر بقشعريره في بدنه لا يعلم ما سببها ولكنه أحس أن تلك الورقه لها صله بندى.

امتدت يده بتردد وقد جف حلقه وتسارعت ضربات قلبه.فتح الورقه وحين قرأ ما بها لمعت الدموع

في عينيه...(آسفه محمد على كل اللي حصل...لكن مو بايدي..وكل اللي سويته أنا عشانك..لكن تأكد اني مظلومه

لا تحزن عشاني وفكر بنفسك...انساني يا محمد)

جعد محمد الورقه وكان يتمنى أن رأس سلطان بين يديه بدلاً من الورقه.

تنهد بألم وهو يقول في نفسه"سبحان الله يا دنيا مالك أمان في لحظه تضحكينا وفي لحظه تبكينا"

تطلع إلى الظلام من حوله وقد تراءى إليه وجه ندى الضاحك وعينيها الواسعتين.

همس محمد بألم"الله يهنيكِ وين ما كنتي"

سمع محمد صوت وقع أقدام خلفه إلا أنه لم يتحرك من مكانه ولم يلتفت.

سمع صوت سلمان يقول"محمد...انت للحين ما نمت؟!"

قال محمد في نفسه"من وين يجيني النوم"

سلمان"تكلم قول شي؟"

تنهد سلمان قائلاً"البنت وشافت حالها...وانت فكر بنفسك الحين"

نهض محمد بهدوء ثم التقط (شماغه) وجهازه النقال.مر من أمام سلمان بدون أن ينبس ببنت شفه بينما

الاخير أخذ يتابعه مندهشاً.

************************************************** ***************

نظرت هند إلى ساعتها بملل بينما كانت الدكتوره تشرح مسأله مهمه في علم الحاسب.

همست هند"نوير...ايش عندها الدكتوره اليوم رايقه على الآخر المحاضرة منتهيه لها نصف ساعه والاخت ولا

على بالها"

قالت نوره بهدوء"انتي تدرين ان الامتحانات النهائيه باقي عليها شهر..."

هند"ومن وين جاها الحماس مره وحده...شكلها شاربه ريد بول على الصبح"

نوره"أجل ليتها تطير وتفكنا"

هند"هههههههههههههه وين تطير وسي مرسي زوجها عندنا بالكليه..الظاهر عندهم واسطه قويه..ماشاء الله

كلهم أساتذه بالكليه عندنا...لا وهو يدرس قسم التاريخ ...الله يعينهم يقولون يقرأ عليهم المنهج"

نوره"هههههههههههه تصديق بنات التاريخ شاكين انه ميكانيكي وانه شاري الشهاده"

نادت الدكتوره بصوت عالي"هند نوره...مالكم تتكلموا في ايه"

نوره"لا دكتوره سلامتك ولا شي"

هند"الا والله يا دكتوره...أنا جيعانه ومثل ما تعرفين لنا ساعتين لازقين بكراسينا"

نظرت الدكتوره إلى ساعتها ثم قالت"يا خبر...أنا آسفه ما انتبهت..يالله مع السلامه ونكمل بكره ان شاء الله"

بعد أن خرجت الدكتوره قالت احدى الطالبات"مشكووووره هند والله شوي وأبكي"

قالت هند بغرور"المفروض الفطور اليوم عليكم...لأني أنقذتكم"

قالت أخرى"تسلمي يا قلبي...تستاهلين هنوده انتي دايم تنقذينا"

دخلت نوف إلى القاعه وحين اقتربت من هند ونوره قالت"وينكم؟لي ساعه انتظر بالكافتريا"

هند"ايه...... لو كانت ندى موجوده كان ما سألتي ولا جيتي"

قالت نوف بألم "ياه اشتقت لها"

نوره"ما كلمتيها اليوم؟"

قالت نوف بحزن"دقيت عليها لكن جوالها مغلق"

هند"الله يوفقها...ما أحد يدري وين الخيره...يالله على الكافتريا"

وصلت الفتيات الكافتريا وجلسن على احدى الطاولات .هند"يالله نوفوه اليوم عليكِ تشتري لنا"

اتسعت عينا نوف ثم قالت"انا فعلاً اشتريت لكم...حطيتهم على الطاوله...ياربي من أخذهم"

تطلعت هند حولها ثم قال"بنت ابليس هنا...لا والله قولي على أكلنا السلام"

تطلعت نوره ونوف إلى حيث كانت هند تنظر فوجدتا شذى تنظر إليهم بكبرياء.

قالت شذى بصوت عالي"تعيشوا وتاكلوا غيرها"

نوره"وبعين معاها هذي لمتى تبي تفهم"

نوف"حسبي الله عليها...درس هند ما علمها"

نوره"والله ما اسكت على اللي سوته"

هند"بالهداوه...كل شي يجي 1بالهداوه"

نوف"على ايش ناويه يا هند؟!"

ذهبت هند إلى سلة المهملات ووجدت بقايا الاكل مرميه فأخذت العلب وهي تشتم في سرها.

أخذت العلب واتجهت إلى حيث كانت شذى تجلس مع ريم"هاي..أنا عازمتكم اليوم على أحلى ساندويش"

ابتسمت ريم باستهزاء قائله"مشكوره ...حنا طلبنا وبيجي الحين"

نادت هند على أم جاسم(احدى اللاتي يبعن في الكافتريا) "أم جاسم فطورنا أنا ومجموعتي على شذى حبيبتي"

شذى"هذا اللي ناقص بعد....ضفي وجهك..واحلمي تاكلين على حسابي"

قالت هند بهدوء"اسكتي ولا كلمه..والا اقسم برب البيت ان الاكل اللي قدامي..واللي رميتيه بالزباله..راح أخليكِ

تطفحين منه لين تشبعين"

شذى"تهدديني يعني"

ابتسمت هند قائله"يس أهددك....وانتبهي يا شذى لا تحطين راسك براسي...انتي ما انتي قدي"

ريم"شذى هذي مجنونه...لا تحتكين فيها"

هند"ما عليكِ زود"

اقتربت أم جاسم تحمل الطلبات.أخذت هند طلباتها ومجموعتها وأخذت معهم طلب شذى وريم .

همست ضاحكه"الأكل اللي قدامكم عليكم بالعافيه فيه..ترى ما جاه إلا شوي صراصير..لكن عادي خواتكم

بالرضاعه"

ريم"الا يا قليلة الادب"

هند"تدرين...أحس انك ما تعرفين ايش هو الادب أساساً"

ريم"انتي ما تربيتي"

قالت نوره والتي كانت تسمع حديثهن"هيه...حنا متربيات أحسن منك يا بنت البقره"

نوف"هههههههههههههههه وصايبها جنون البقر"

ريم"أنا ما أسمح لكم تتكلمون عن أمي كذا"

هند"يوووه..وانتي عادي تقولين لها يمه....هذي داينصور لكن ما انقرضت تدرين ليش"

نوف"اكيد عندها مناعه من الانقراض"

نوره"ههههههههههههههه هذي يبيلها قنبله ذريه هايدروجينيه يالله تنفع معها"

قالت ريم باستهزاء"أقول نوره...كيف ساره مع وضعها الجديد"

قالت نوره بتحدي"تحمد ربها وتشكره انها افتكت من وجه النكد أخوكِ"

شذى"ايه..الله يعينها لا مطلقه ولا متزوجه...تاركها تركي معلقه"

هند"علقوكِ ان شاء الله بحبل المشنقه...وصلبوكِ عشر سنين...تاكل الطيور من لحمك وما تشبع"

نوره"عقبالك شذى"

شذى"بسم الله علي....أصلاً تروكي ندمان على انه ما أخذني من أول"

نوره"اكيد أعمى...أو حاطه له شي"

هند"انتي اللي يشوفك تصيبه الحصبه ويجيه شلل"

نوف"ههههههههههههههههه شوف وجه العنز واحلب لبن"

قالت ريم"الكلام معكم ما فيه فايده يالله شذى المحاضره بدأت"

قالت نوره باستهزاء"والفطور من بياكله"

هند"لا مالكم حق...الحين أتعب نفسي وأجيبه من الزباله عشان يقعد بالطاوله كذا"

شذى"ما نبي شبعنا"

حين همت شذى بالذهاب استوقفتها هند قائله"وين يا حلوه" ثم أخذت محفظة شذى وسألت أم جاسم

التي كانت تقف بعيداً تراقب الموقف "كم حسابك يا أم جاسم؟"

أم جاسم"اربعين ريال"

أخذت هند خمسين ريال من المحفظة ثم قالت"خوذي يا أم جاسم والباقي خليه لكِ"

بدأت شذى تهذي بكلام غير مفهوم ثم خرجت مسرعه من الكافتريا تتبعها ريم.

جلست هند,نوره ونوف يتحادثن ويضحكن فقالت نوره"عندي سر أبقوله لكم"

هند"ايش هو بسرعه؟"

ابتسمت نوره قائله"أنا حامل لي ثلاث أسابيع"

صرخت نوف قائله"وااااااااااااو مبرووووك...والله وكبرتي يا نوير"

هند"يعني بصير عمه"

نوف"اعذريها يا نوره..توها تستوعب...الارسال عندها بطئ"

نوره"ههههههههههههه عقبالك يا هنوده"

التزمت هند الصمت والالم يعتصر قلبها...الا أنها نفضت عنها الحزن بسرعه وقالت بفرح"مبروك يا نوره"

نوف"ياليت ندى كانت بيننا...كان فرحت من قلبها"

هند"حنا لازم نسوي لها زياره لشقتها"

نوره"انتم تعرفون وين ساكنه؟"

نوف"تصدقون ما أدري...ما أحد سأل هو وين يسكن...الزواج حصل بسرعه"

هند"مو مشكله دام معها جوال...راح نتصل فيها وتوصف لنا مكانها"

نوف"مشتااااقه لها"

نوره"يا حبي لها.."

هند"الله يسعدها"

كانت كل واحده منهن تسأل نفسها عن ندى ووضعها وهن يعلمن أنها تحيا أتعس أيام حياتها ولكن

لم يكن يتجرأن على الافصاح عما في قلوبهن.

تعبنا نرسم البسمات ولو فينا حزن وهموم ..
ونضحك ضحكة التزييفونكتم همنا فينــا ,,
شكينا الهم والحرمان ولكن القدر مكتـــوب ..
نصيح .. ونحترق // نتعب .. لكن وشــ بــ يدينـآ ,,
صبرنا والشقــا وآضح .. ترآهـ بـــوجهنا مرســوم ..
وهـــ الدنيــا من اللوعــات ... نستنــا أسآميــنــا ,, !

************************************************** *************************

يتبع

[رواية]

خرجت نهى مع صديقتها من المدرسه كانت تتحدث بسعاده . ودعت صديقتها ثم اتجهت إلى حيث كانت السياره

تنتظر.

صعدت نوال السياره ثم قالت"ماشاء الله....سامي اللي بياخذني اليوم! معجزه"

سامي"لا معجزه ولا شي...أبوي مسافر للشرقيه ..وأخوي عبدالله عنده عمل..وما فيه الا أنا اللي مجبر أجيبك"

نوال"لكن تأخرت علي نصف ساعه"

كان سامي ينظر إلى سيارة الجمس والتي صعدت فيها نهى ثم سأل أخته"من صديقتك هذي؟"

تطلعت نوال إلى حيث كان سامي ينظر ثم قالت"هذي صديقتي نهى"

سامي"ماشاء الله...جمس أخر موديل وسايق...أكيد بنت عز"

نوال"يس أبوها مدير شركه كبير...وساكنه بقصر"

سامي"غريبه..ودامها بنت عز ليش تدرس بمدارس حكوميه"

هزت نوال كتفيها قائله"أبوها رافض انها تدرس بمدارس أهليه"

تحرك سامي بسيارته يتبع الجمس فسألته نوال مستنكره"انت وين رايح؟"

سامي"أبشوف وين تسكن بنت العز هذي...شكلها تكذب عليك"

وصل سامي إلى أحد أرقى الأحياء في الرياض وسار خلف السياره التي تقل نهى حتى وصلت إلى منزلها الضخم.

قال سامي مبتسما"والله وطلعت بنت عز صدق"

قالت نوال بانتصار"قلت لك"

سامي"دامها تسكن في الحي الراقي هذا...ليش تدرس بمدرسه في حي بسيط وبعيده عن بيتها"

قالت نوال بغرور"كله عشاني"

قال سامي بعد تفكير عميق"أجل هذي نهى صديقتك من أيام الابتدائي...أكيد مكالمات مع بعض"

نوال"طبعا...وأنا بعد مسجلتها عندي بالماسنجر"

سامي"أها...كنت أحسب الماسنجر فيه بنات خالتك بس"

نوال"ونهى فيه بعد...هي الصديقه الوحيده طبعا...وتحب دايم انني أدللها وأقول لها نانسي"

سامي بابتسامه شيطانيه"ليش؟"

نوال"لأنها تشبه نانسي المغنيه..وهي مولعه فيها"

سامي"ومن زين نانسي عشان تتشبه فيها"

نوال"كل البنات يتمنون انهم مثل نانسي...وحنا في المدرسه نسمي نهى نانسي"

سامي"آها...الله يخليكم لبعض"

ابتسمت نوال مسروره"آمين"

وصل سامي ونوال إلى منزلهما .طلب سامي من نوال أن تصنع له عصير فراوله المفضل لديه.

اتجهت نوال إلى المطبخ بينما اتجه سامي إلى غرفة نومها.شغل جهاز الكمبيوتر ثم دخل على ماسنجر أخته

فقد كان يعرف كلمة السر حيث أنه هو من أسسه لها بعد الحاح منها ووعد بأن لا تضيف سوى قريباتها.

نظر إلى القائمه ثم ابتسم بانتصار حين وجد اسم نانسي .أخذ الايميل ثم أغلق الجهاز بسرعه.

************************************************** *******************

قالت نوره بحزن"أنت تو جيت...وتبي تروح"

ماجد"حياتي هذا العمل..وحنا عندنا مهمه الليله"

نوره"انت لقمتين على بعض ما أكلت"

ابتسم ماجد وقال هامساً"شوفتك تشبعني"

قالت نوره بألم"يعني ما راح أشوفك الليله"

ماجد"يمكن أجي آخر الليل...وبعدين ما أبيكِ تتضايقين...مو زين عشان ولي العهد"

ابتسمت نوره ثم قالت بدلال"هذا اللي هامك"

قال ماجد برقه"لا والله انتي اللي أنا أهتم لها...صحتك عندي بالدنيا"

نوره"الله يخليك لي"

ماجد"آمين ويخليكِ لي...يالله أنا تأخرت"

نوره"ما تبي أسوي لك شي بعد ما تجي"

ماجد"ما أبي الا سلامتك..أهتمي بنفسك وبخالد الصغير"

نوره"من الناحيه هذي لا تشيل هم..لكن نفسي أسوي لك شي"

ابتسم ماجد قائلاً"اذا ولا بد...كيكه بالفانيلا...اللي أحبها"

ابتسمت نوره قائلا"من عيوني"

ماجد"تسلم لي عيونك...ولا تسوين شي انتي اجلسي على الكرسي مثل الملكه وخلي الخدامه هي اللي تجهز كل

شي"

نوره"مستحيل....الكيكه ما أحد يسويها غيري"

ماجد"الله لا يحرمني منك...تصدقين يا نوره ما أبي من هالدنيا إلا إني أشوف ابتسامتك"

نوره"وانت معي الابتسامه ما تفارقني"

تطلع إليها ماجد ثم قال"لا تناظرين لي بعيونك الحلوه والا ترى بتأخر على العمل"

ضحكت نوره ثم قالت"أجل بسرعه روح...الله يحفظك"

خرج ماجد بينما ذهبت نوره إلى المطبخ وهي تدندن بسعاده.

************************************************** ******************

كانت مها بمكتب سلمان تتحدث معه عن ترتيبات الحفل.

مها"الحلويات من سعد الدين والقباني"

سلمان"أوكي راح أعطيكِ الفلوس واشتري اللي تبين"

تطلع إليها صامتاً ثم قال "يالله يا مها..أنا عندي شغل..وانتي أكيد يبونك بقسمك"

قالت مها بألم "تبي الفكه مني"

ابتسم سلمان ثم قال"احنا ايش قلنا...العمل عمل"

مها"والله ما توقعتك معقد يا سلمان"

سلمان"خلاص ولا تزعلين...أمري يا عيون سلمان"

ضحكت مها قائله"ايه...الكلام الرومنسيه بالغصب تطلعه"

سلمان"راح تسمعين أحلى كلام لكن بعد الزواج"

دخل اثنان من الرجال ومعهما شرطي ثم قال أحدها"أنت سلمان الـ( )"

وقف سلمان ثم قالت متعجباً"نعم أنا...أي خدمه"

الرجل"عندنا أمر بالقبض عليك"

شهقت مها بينما قال سلمان"ليش؟! فيه شي ضدي"

قال الآخر"أكيد يا دكتور والا ما شفتنا عند مكتبك"

سلمان"ايش اللي صاير بالضبط"

أحد الرجال"أنت أعطيت أوامرك بفتح الأجهزه عن أحد المرضى وبكذا عجلت في موته"

مها"هذا ميت دماغياً أصلاً"

صرخ بها سلمان"أنتي اسكتي ولا كلمه"

سلمان"مستحيل يا أخوي أعطي الاوامر بكذا...وبعدين أي مريض تقصد..أكيد مو في قسمي"

قال الرجل"المريض موجود عندك في غرفه (15) كان يعاني من غيبوبه وانت أعطيت اوامرك

برفع الاجهزه عنه بعد شهر من توقيع الورقه"

صرخ سلمان مستنكراً"مستحيل أسوي زي كذا..وبعدين أنا ضد رفع الأجهزه عن مريض

أياً كانت حالته"

الرجل"الكلام هذا تقوله عندنا مو هنا"

دخل المدير العام للمستشفى ثم قال"سلمان انت ايش سويت؟"

سلمان"علمي علمك...اتهموني الرجال بشي أنا ما أدري عنه..."

المدير"مسؤول قسم بكامله ما تدري عن اللي يدور حولك"

سلمان"أكيد الموضوع فيه لبس...يا مدير مستحيل أعطي أوامر برفع الأجهزه وانت تعرفني زين"

مها"يا دكتور أبو بندر سلمان كان باجازه أمس وما داوم"

أبو بندر(المدير) "كان المفروض يطلع على الأقسام من بدري مو يجلس في مكتبه هنا"

سلمان"عذرا يا أبو بندر...انت من قال لك الخبر"

أبو بندر"الدكتور أحمد كان عندي قبل شوي هو اللي قال لي"

سلمان"أها دام فيها الدكتور أحمد...أذن الموضوع فيه لبس"

أبو بندر"لا ترمي بالتهم حواليك...انت غلطان"

قال أحد الرجال"التهمه ضدك قويه...ممن يكون فيها سجن..هذا اذا ما تدخل أهل المريض"

سلمان"انت ايش تقول؟! والله ما عندي خبر بالموضوع...صدقوني انا ما وقعت على أوراق بالموافقه"

أحد الرجل"عذراً حنا مضطرين اننا ناخذك الحين..."

أبو بندر"ممكن يروح بسيارته...عشان سمعة المستشفى"

تطلع إليه سلمان ثم قال في نفسه"هذا اللي هامك بعد ما اشتغلت اربع وعشرين ساعه عشانك وعشان

المستشفى"

قال أحد الرجال"طيب ما عندنا مشكله...لكن يمشي الآن ما يتأخر ولا دقيقه"

خرج الرجال وقال أبو بندر"أنا اعتمدت عليك واعتبرتك من أفضل الدكاتره عندي..وهذي النتيجه"

رمى بتلك الكلمات ثم خرج من مكتب سلمان.قالت مها بتردد"انت ايش بتسوي الحين؟"

تنهد سلمان قائلاً"بروح وراهم طبعاً"

مها"مشكله حتى لو بانت براءتك مستحيل ترجع للكرسي هذا"

سلمان"وهذا اللي هامك....الكرسي"

تطلع إليها بنظره ملؤها الازدراء ثم خرج من مكتبه فتمثل أمامه خيال ندى وهي تبكي بألم وتدافع عن شرفها.

************************************************** ************************

نزلت شذى من السلم عابسة الوجه ولم يغب عن بالها ما قامت به هند في اذلالها.

وصلت إلى المجلس فوجدت خالتها بانتظارها.

أم تركي"هلا والله ببنت أختي"

قالت شذى بكراهيه"أهلين...غداي وينه؟"

أم تركي"حطيته لكِ بالحافظه"

شذى"أنا كنت تعبانه من الكليه اليوم وما كان لي نفس أتغدى"

أم تركي"عادي يا بنتي..عساكِ الحين أحسن"

شذى"ماشي الحال...بناتك وينهم؟!"

أم تركي"ليلى بالدوام للحين..وريم نايمه من جاها ضعف الدم وهي بس نايمه ودايم دايخه"

شذى"من قلة الأكل والسهر قدام الأفلام"

أم تركي"والله نصحتها لكن ما تسمع لي.....تركي وينه؟"

شذى"والله ولدكِ هذا ما أدري عنه...ماله موعد محدد بالبيت"

أم تركي"من تركته هالنسره وهو منقلب حاله"

شذى"وأنا وين بيوصل حالي معه...تراي طفشت يا خالتي"

قالت أم تركي برقه"ما عليش يا بنتي أصبري عليه"

صرخت شذى"لمتى....ما كأننا متزوجين كل ليله ينام بغرفته تحت...ليش تزوجني ولدك دام ما يبيني"

تنهدت أم تركي"والله ما أدري عنه"

شذى"وبعدين ليش ما أنام بالجناح اللي كان لساره والا هي أحسن مني"

أم تركي"ساره ما تسوى ضفرك....لكن البنت ما أدري ايش مسويه بولدي"

شذى"طيب المفتاح وينه؟"

أتاها صوت من خلفها"ايش تبين بالمفتاح يا هانم"

قالت شذى بألم"أنا من حقي أعيش مثل غيري...أنا أبي اسكن بالجناح اللي كان لساروه"

تركي"تحلمين...الجناح هذا ما أحد يدخله"

شذى"وليش يعني...عشان ريحة المدام للحين فيها"

تركي"مالك شغل...ولا تتعدين حدودك"

قالت شذى بألم"أنا من عرفتك وأنت حاط حدود بيني وبينك"

تركي"والله اللي مو عاجبه؟؟؟؟؟؟؟؟؟"

أم تركي"تركي...ايش فيك والا بنت حصه غاسله مخك"

تركي"يمه لا تتدخلين"

أم تركي"أجل أشوفك تذوب قدامي وأسكت...سهر بالليل وبالصبح بالعمل..حتى على الأكل ما نشوفك"

قال تركي بهدوء"هذي حياتي الخاصه"

أم تركي"انت تبي تموتني ناقصه عمر"

تركي"سلامتك يمه...لكن أنا تعبانه..وأرجوكِ خليني كذا أنا مرتاح"

أم تركي"ما يصير يا وليدي..وبعدين حرام عليك...شذى ايش ذنبها"

تركي"وايش ناقصها شاربه ماكله..مصروفها يجيها كل شهر وزياده وأفضل الملابس تلبس"

شذى"الللي ناقصني أنت"

تركي"عاد هذي مشكلتك....يالله مع السلامه"

شذى"شفتي يا خالتي...أنا من دخلت هالبيت وأنا أعاني...أحس شبح ساره يلاحقني وين ما أروح"

أم تركي"حسبي الله عليها قلبت عقل الولد"

شذى"أنا مستحيل أوقف أتفرج وأشوف زوجي يروح من يدي بسهوله"

أم تركي"ايش بتسوين"

شذى"مفتاح جناح سارة وينه؟"

أم تركي"واحد معها لما طلعت...والثاني مع تركي"

شذى"أنا لازم أحصل على اللي مع تركي بأي طريقه"

أم تركي"انتي ايش ناويه عليه؟!"

شذى"اذا كانت بنت حصه مسويه له عمل..فأنا لها...راح آخذ أي شي من أغراضها اللي بالجناح

وأوديهم عند أكبر ساحر بالرياض...ان ما خليتها تمشي بالشارع ما تدري عن نفسها ما أكون شذى"

أم تركي"يا ليت...وترجعين لي ولدي"

قالت شذى بحقد"يصير خير يا سارة...انتي للحين متعلقه بقلب تركي..وأنا بأنسفك مره وحده"

************************************************** *******************

دخل أبو سلمان ومحمد إلى الفلا وكانت أم سلمان بانتظارهم "هاه بشروا..ايش صار عليه؟!"

قال أبو سلمان بتعب"سلمان محجوز...والقضيه راح يرفعونها للقضاء"

أم سلمان"يا ويل قلبي عليك يا ولدي"

محمد"الشرطي طلع يعرف ماجد..وهو يقول انه ممكن يحصل على خروج بكفاله"

أبو سلمان"لكن ايش الفايده....سلمان مستقبله تدمر"

قالت أم سلمان باكيه"لا تقوول كذا يا أبو سلمان..أهم شي الولد تطلع براءته"

أبو سلمان"المشكله التهمه متلبسته...لكن كل الدكاتره تقريباَ شهدوا ان سلمان مستحيل يوافق على عمل مثل كذا"

أم سلمان"وتتوقع تنفع شهادتهم"

تنهد أبو سلمان قائلاً"والله ما أدري يا أم سلمان...وأهل الميت ماراح يسكتون عن حقهم"

أم سلمان"الله يستر"

محمد"سلمان نفسيته تعبانه وهو شاك بأحد الدكاتره"

أم سلمان"طيب ما فيه تحقيق بالمستشفى"

محمد"هم الآن يحققون في القضيه...لكن المشكله الدكتور راس ماله سمعته..وسلمان عرف بقضيته كل

المستشفى"

دخلت نوف وجله ثم قالت"ايش فيه سلمان؟"

همست أم سلمان بألم"متهمينه بقتل أحد المرضى"

صرخت نوف بينما جلس زياد باكياً ثم قال"ندى وظلموها والحين سلمان"

تطلع أبو سلمان إلى وجه ابنه الصغير وقد أدمعت عيناه وعرف أن هذا كان عقاب من الله على ما فعله

هو وسلمان في حق ندى المسكينه اليتيمه.

خرجت ندى من غرفتها تبحث عن سلطان...لم تشاهده من البارحه فقد حبس نفسه بالمجلس إلى هذا الوقت.

نظرت إلى ساعتها ووجدت أنها تشير إلى السابعه ليلاً...

فتحت باب المجلس بخفه ثم وقفت مصدومه مما ترى.كان سلطان ممددا على الأرض وبجانبه قنينة وابره

استخدمت تواً...ازدادت ضربات قلبها وهي تقلب نظرها في المجلس والرائحه النتنه التي تفوح منه.

نادت سلطان بصوت هامس"سلطان...سلطان"

فتح سلطان عينيه ثم قال"هلا بالنور كله"

ندى"انت ايش مسوي بنفسك؟"

جلس سلطان متكأً ثم قال "عادي...راح تتعودين على الوضع"

ندى"ايش الابره اللي عندك"

قال سلطان بكسل"هذي...آآآآآ. ايه عندي سكر..وأتعالج بالابر"

ندى"معقوله؟!"

سلطان"عندك اعتراض...وبعدين أنا جيعان...سوي لك لقمه آكلها"

ندى"المطبخ ما فيه شي ..."

سلطان"يوووه نسيت أشتري...معاليش جديد على الزواج"

وقف مترنحاً ثم قال"الحين أجيب بعض الأشياء من البقاله"

أتسعت عينا ندى متعجبه ثم قالت"سلطان انت ما شفت جوالي"

سلطان"جوالك معي..وانسي ان عندك جوال"

قالت ندى مصدومه"وكيف أكلم أهلي؟"

سلطان"انسي ان عندك أهل..انتي عندك سلطان وبس"

ندى"سلطان تكفى لا تزيدها أنا ماني ناقصه ..لازم أكلم أهلي."

قال سلطان بهدوء"أنا ما أمزح...انسي ان عندك أهل" ثم مر من أمامها قائلاً"وانسي الكليه بعد"

وقفت ندى مصدومه وقد ترقرقت الدموع من عينيها...فهي لم تتزوج انسان بل وحش.

************************************************** *************

وقف ماجد مستعداً بالقرب من أحد الفلل ينظر إلى العناصر الذين أتوا معه.

سأله أحدهما"هاه يا نقيب ماجد...نداهم المكان"

قال ماجد بهدوء"ننتظر الاوامر أهم شي كل واحد بمكانه"

اقترب منه ناصر قائلاً"ماجد ايش هي خطتك؟"

ماجد"حنا إلى الآن ما ندري كم عددهم وايش معهم من سلاح...لكن بعد ما ندخل راح نكشف..أهم شي توصل

الهلوكوبتر والامدادات بسرعه ما نبي تأخير الوقت مو بصالحنا..."

تحدث ماجد قيلاً إلى أحد المسؤولين ثم أعطى أوامره بدخول المبني.

تقدم هو وناصر بحذر فانهال عليهم الرصاص..اختبأ ماجد ومعه ناصر وهو يعطي أوامره بعدم تبادل الرصاص.

توقفت النيران فهمس ماجد قائلاً"أنا ألاحظ ان الرصاص من جهه وحده...اليمين..وأعتقد ان فيه واحد بالدور

الثاني والباقي بالسطح"

ناصر"أوامرك يا نقيب.."

ماجد"أنا واثنين معي بروح للدور الثاني وانت واللي معك للسطح"

ناصر"ان شاء الله"

أمسك ماجد بيد ناصر قائلاً"انتبه على نفسك يا ناصر..نبيك حي"

ناصر"اذا كان هذا يومي فأنا أفضل الشهاده"

ماجد"لا أوصيك الحذر..هذولا عقولهم مغسوله...ويعتقدون انهم على صواب"

ناصر"لا توصي...يالله على بركة الله"

ماجد"لحظه أنا راح أعطيك وانت اصعد بسرعه للسطح...اخذ الجهه اليسار "

ناصر"حاضر"

صعد ماجد مع اثنين من العناصر وحين وصل إلى الدور الثاني تطلع إلى ناصر وهو يتابع طريقه إلى أعلى.

سمع ضرب النار في الأعلى وأصوات وهتافات...تقدم وهو يذكر الشهاده ثم فتح الباب بقوه ووقف بوسط الصاله

ليباغته أحد الخارجين ..اتسعت عينا ماجد بينما كانت النار تخرج من فوهت الرشاش...

اخترقت النيران الجسد وانفجرت الدماء بينما كانت صور الأحبه تدور أمام عيني ماجد...

ترنح الجسد وعانقت الروح جسدها العناق الأخير قبل أن ترتفع إلى خالقها.

************************************************** ******************

إلى اللقاء ومع بارت جديد

[زهو الايام]

بارت رااائع ومتقن..
احزنتني نهايته ولم اتمناها لماجد خاصه انه شخصيه محبووبه وعاقله جداً <<ياعيني عين نوووره :(

ماننحرم القلم وراعيته..وكل عام وانتي بخير قبل الزحمه ^_^

[أمـــير بـكلمتي]

يسلمووووووووووووووووووووووو
طيوفه

[ألمــــاس]

تستااهل شذى واللي يصير لها
والله يستر من عمايلها

نهى جاها اللي مثلها
مااااجد يا ويل حاالي على نوورة
شنو بيصير
خالد وطلال ما ندري للحين عنهم

بااااارت تووب يا طيووفة
عسااج عالقووة وكل عام وانتي بخير

[ولد الشرقية]

استمتنعنا بهذا البارت وبعض المواقف الحزينه فيه
ويعطيكِ العافيه طيووووفه
وبنتظار البارت 22 ^_^

[شهاليل]

هالبااارت كله حزن ...
ليش ياااطيف ..؟؟
ان شاء الله الباارت الجاي يكون فيه لو لمحة فرح ...
سلمتي يالغلا

[رواية]

اقتباس من مشاركة زهو الايام بارت رااائع ومتقن.. احزنتني نهايته ولم اتمناها لماجد خاصه انه شخصيه محبووبه وعاقله جداً <<ياعيني عين نوووره :( ماننحرم القلم وراعيته..وكل عام وانتي بخير قبل الزحمه ^_^

غاليتي
سلم لي مرورك الدائم