[ناصر عبدالله]

هذى المحاور جرت بين الشاعران عيدبن مربح الرشيدي والشاعر رجالله الحربي رحمه الله

عيد

يامرحبا بضيوفنا اللي شرفونا بالوقوف / والناس عادتها ياطرقي ماتخلي اسلومها

عيني تطالع يارجالله مير مدري وش تشوف / وان عدتها والله لازودكم واغلق سومها

رجالله

تسلم وتبقى ياولد مربح معازيب الضيوف / وانا ليا جيت العرب عيبن علي ألومها

انا خويك في طريق الخير وأحدود السيوف / والا العلوم الثانيه غابت علي انجومها

عيد

تعرف ظروف الملعبه مابين خاطف وأمخطوف / وأضيوفنا الليله عليْه وارمات أخشومها

فريتها بسنونها وألينها حول النصوف / يارب لاتحرم قلوب أهل الهدف مقسومها

رجالله

تاريخك اللي من قديم الوقت ياعيد امعروف / والناس لو خلتك في كيفك نهبت اقسومها

تبغى تربع بالشداد وزيد حطك بالردوف / ومن الزعل تشمت ضيوف البيت قبل اعلومها

عيد

تاريخنا غصبن على الحساد ياعيون الكسوف / يوم أن بعض الناس ضيقتها تزيد اهمومها

قبله يبين الكيف وأنت أتمز من شين القطوف / ويوم المغازي كل قوم امفسرين احلومها

رجالله

ياعيد فيك الخير لاكنك من الخير أمخفوف / وام الكباير من مصيبتها تشق اهدومها

أليا خرب موترك وقف به وركب له بلوف / وان خرطمت لك رز مشعابك على خرطومها

عيد

حذفني الحذاف لاكنه يحوذف وأمحذوف / وانا الجنايز من فضل ربي ماحب ألحومها

يقول لك راعي المثل يتفاهمون أهل الشفوف / ترى القراده نوخت سوم القراده سومها

رجالله

ياصاحبي مشلحك فيها خيط قطن وخيط صوف / والقوم ناشبتن طعامتها على حلقومها

انا على المقفين لوحسفت مابيله حسوف / الورد يحصد ورد وأهل الثوم تحصد ثومها

عيد

السالفه طافتك ياشاطر ولاحسبها تطوف / وانا الصقور اعرف مواريها بخلق أزقومها

وش هو مصيرك يارجالله كان صفقت الصفوف / يارب تستر عورت الاجواد وسط أهدومها

رجالله

ماطافني علمك لاكن انت ماتقرى الحروف / حتى عراويكم ليا مرت قريت أرقومها

ان كان بتعمر ومن ضيقتك صفقت الكفوف / أسجد لوجه الله وصوم اربع ليالي صومها

عيد

ياصحابنا ياللي تحطون الرسايل بالزروف / مالي ومال الدوله اللي مانجح مرسومها

أنت تبيها يارجالله مير حدتك الضروف / كون ادمي معك ادمي وأحفظ برمي أسهومها

وانشاء الله تعجبكم

الموضوع الأصلي: عيد مربح الرشيدي ورجاء الحربي | | الكاتب: ناصر عبدالله | | المصدر: شبكة بني عبس

[ابو براك الرياض]

الله لايهينك
على النقل المميز

[سعد المظيبري]

بيض الله وجهك يا ناصر علي نقل والاختيار الموفق


وعلي انتظار جديدك

وتقبل مروري

[نــوآف الــعــويــمــري]

والله انك ماقصرت وبيض الله وجهك

[ابو بيان]

بيض الله وجهك يا ناصر علي نقل والاختيار الموفق


وعلي انتظار جديدك

وتقبل مروري

[@كحيلان@]

صح لسان الشاعرالكبيرعيدابن مربح ورجاءالحربي
على المحاورة الرائعه
والله لايهينك على النقل الرائع