[هداج]

مساجله شعريه بين الشاعر مرشد البذالي رحمه الله والشاعر الامير السامر ..
قال مرشد البذالي

الله مـن قلـبٍ بـدت بـه طـواري=قامـت عظيمـات الطـواري تفـره
سوت بي أفكار الهجـوس العـزاري=شفت الكدر منهـن كفـى الله شـره
يا دحيم أنا جسمي من الحال عـاريٍ=لو أن صوتي زيـن جسمـي مغـره
كل الجسد من كثر ضـرب الأبـاري=ومن الحبوب أحتـاج باليـوم صـره
ومن النوى جسمي على السهر ضاري=جربـت نـوم الليـل حلـوه ومـره
صار التعب عنـدي خـويٍ مبـاري=وفتـور عظـمٍ راحتـه مـا تسـره
كن العضـا تفصـل بحـد الشبـاري=لوني علـى الديبـاج جنبـي مقـره
كني على وجناً من الهجـن سـاري=مذهب وأدور لي مـع القـاع جـره
ما همني مـا كـان للحـال جـاري=قنعـت بالمكتـوب نفعـه وضــره
ما همني يـا كـود ضـد المثـاري=شيـخٍ طلـب والحـق منـا نمـره
عيني علـى شوفـه تهـل العبـاري=عبـد العزيـز اللـي بعرفـه مسـره
ولـد سعـود اللـي بفعلـه نمـاري=شيخٍ كبيـر ومـن أهـل الجـود دره
ودي بشوفـه فالمـدن والـبـراري=نأخذ مـع الأشـراف بالعمـر مـره
لاشـك قالـت لـي ليالـي عثـاري=آخذ مثـل غيـرك مـن العجـز وره
ياخوي هرج الصدق ما بـه مـزاري=وإلا كـلام الكـذب عنكـم نـطـره
ياخوي أنا بالحـال كنـت متـواري=والعلـم منـي خابـرك مـا تـغـره
لـو تنشـرى جياتكـم بالمصـاري=بعـت العقـار اللـي غذانـي بـدره
يا خوك قـل الشيـخ يقبـل عـذاري=لين العضا تصبح مـن العجـز حـره
هـذا وسلـم عـد نبـت الصحـاري=على الأميـر ولـك مـع الشيـخ ذره

ورد السامر

بيني وبين الرأي بايـع وشـاري=وما ضعت أنا من بين فره وكـره
سجل يا بن بذال مرشـد قـراري=شهـادةٍ لله مـا هــي مـبـره
قصايدي ما هي قصايـد عـواري=قرّيتها من جوهـر الشعـر قـره
وكتبت لك مردودهـا باختيـاري=بيومٍ فضيلٍ عقب شعبـان غـره
فـي رأس مرقـابٍ رفيـعٍ وذاري=ما همني بـه بـرد نجـدٍ وحـره
واضحيت به وأكهف برأسه نهاري=وقبلك إركابي بالضحى ما تمـره
ياريف هجنٍ تشتكي ما لسمـاري=ضرايب عماني على بطـن حـره
عن حالكـم والله مانـي بـداري=وإلا علـي الحـق أزورك بحـره
ونبي الوعـد لا ربعـن الديـاري=وتليت سبـق الحـر تـلٍ بجـره
في جو مربـاعٍ لرتـع الحبـاري=دم الخروب اللـي تكوبـر هـدره
ننقل طيور مـا نقلنـا سـواري=نوسع الخاطر على قنـص بـره
ما فالطيور اللـي نقلنـا تجـاري=طرح الشبـك يزرهـا مـا تـزره
وخلاف ذا يومك تشوف النكـاري=من وجد شوقٍ لاجيٍ فـي مـذره
بعيونك الثنتين شفـت المـواري=حقٍ على جـور الليالـي تشـره
وكلٍ يقول القا عمـاري دمـاري=وغوج الهوى كلٍ شكا من مكـره
وإن كان جرحك يا بن بذال باري=اجمـع دواك وجـوّده لا تـثـره
درس الهوى ما بين كاتب وقاري=وسطرٍ محي تكتب حروفه بسـره
كتبـت لـك مردودهـا بقتـداري=والوقـت عنـدي لـه ذرورٍ أذره
في عين لدت لك بعسر وعسـاري=وإن الله أحياني لقيـت "المسـره"
مني سـلام عـد نبـت القفـاري=وعداد ما تظهر نجـوم المجـره

وسلامتكم

الموضوع الأصلي: مساجله شعريه بين الشاعر مرشد البذالي والسامر | | الكاتب: هداج | | المصدر: شبكة بني عبس

[ابو براك الرياض]

الشكرك
الشكرك
الشكرك

[مرزوق العجوني]

صحت السنتهم ولا هنت على نقلها لنا هداج

[الغالي]

أخوي هداج
للتصحيح الأسم الشاعر الكبير أسمه مرشد البذا ل وليس مرشد البذالي

للمعلومية لكي لاتقرن أسماء شعراءنا بعوائل آخرى
وشكراً

[الوافي]

اشكرك اخوي على الابداع الجميل ام الشاعر هو مرشد البذال تصحيح وليس البذالي

[ثنيان العجرمي]

الله يعطيك العافيه على النقل الطيب
الف شكر لك

[الزعيم..]

صح لسان الشاعر مرشد وصح لسان الشاعر السامر
شكرا على نقلك الرائع