[عمران]

مسا الخيرات وان طال البطا يا المنزل المهجور
ترى ما ابطى بي الا حالةٍ مثلك يقدرها
اذا عندك عتب لا مانع من معاتب المذكور
واذا عز الرضا تفداك الاعذار ومقابرها
انا اللي جيت لك والريح تعوي والشتا مسعور
ولا به من دفا والمربعانية باواخرها
تغير وانطبع دربك بلون المسك والكافور
وهذي رعشة كفوفي ولا به من يدثرها
بعد ما كنت اجي بابك بدستور وبلا دستور
ولا ادري الا وذك الدرفه اليمنى على آخرها
طموحي عارضته اللي معاها كل شي يبور
وجاء كسر الطموح اهون علي من كسر خاطرها
سنة ما اقبل نذير الشيب كانت باول الطابور
وكنت احلامها ذيك السنه واول سرايرها
لقت قدامها فوضى وقلب وشاعر وجمهور
وجات ورتبتني من جديد وصرت شاعرها
بقيت اسري لها لا همني وحشه ولا ديجور
اشيل احلامنا تحت النجوم وهي تفسرها
سقا الله يوم جابت لي قبل يومين من عاشور
هذاك العسجد اللي جابه الله من عشايرها
غلاها كان تحويشة عمر بشعور فوق شعور
ايلين اكتظت الاشواق والهاني تكاثرها
ربت ما ه يتحت ريشة نعام وفي بلاط قصور
ولكن لاترف له قيمة الا تحت اوامرها
يحملن امهات البيض تسع شهور تسع شهور
على رجوى بشايرها ولا لاحت بشايرها
تقل بدرٍ ولا بايات بدر تقول بدر بدور
ولا بايات بدر بدور .. يعني ما انت خابرها ؟!
لو استقصوك عنها ما انت محتاج لشهدة زور
تحت سقفك سحايب ملحها وامواج سكرها
ما ارق المتحف اللي من ورا ضلوعك فدتك الدور
وانا ما اقوى نظر مافيه بعد غياب ناظرها
حديقة بيت اهلها .. سورها العالي .. حمام السور
زخارف بابها .. شباك غرفتها .. ستايرها
ورق جدرانها .. سجادها .. تقسيمة الديكور
خزاينها .. هدايها .. رسايلها .. خواطرها
تحفها .. مزهريتها .. قصصها .. شعرها المكسور
صورها .. مكتبتها اقلامها .. لمة دفاترها
زمام السيف .. شال الليل .. حنا الكف .. كحل الحور
حلقها .. عطرها .. فستانها الابيض .. جواهرها
مرايتها .. فصوص الساعة البيضا ام خمس سيور
خواتمها .. قلايد جيدها .. نقشات اساورها
ملابسها .. بروق الوانها .. دولابها الممطور
من ازرقها الى احمرها الى اخضرها الى اصفرها
نسانيس الهوا اللي ترتشف يشمومها المنثور
صخيفات المناديل اللي احتضنت عبايرها
مصابيح المكان اللي خذا منه النهار النور
سنون امشاطها اللي ما نست عشرة ظفايرها
بطاقاتٍ طرزها صغارٍ يحملون زهور
رحيل الدبله اللي ما تهنت في خناصرها
زوايا كنها بلور في بلور في بلور
مسا رزنامةٍ غاب الحرير اللي يغيرها
وش اقول ليتاماها الكثير الممتلين كسور
وانا اشياها تحاصرني واحسب اني محاصرها
بكيت وصارت الدنيا قفص واستوحش العصفور
ضحكت وملت شبوك القفص من كذب طايرها
عرفت شلون الارض تدور وايام الزمان تدور
والاعيان ان صفت كيف ومتى تذبح محاجرها
ومتى تصير القبور بيوت وتصير البيوت قبور
وكيق الذكريات يذوب ما ضيها بحاضرها
على الله .. وانت ابيك المتحف اللي للعرب معذور
الى جتك العيون وصدت ابوابك نواظرها
تمر اجيال وتصدر سواليف وتعيش عصور
وتروي سالفة عمري من اولها الى آخرها


ناصر القحطانى

الموضوع الأصلي: سالفة عمرى | | الكاتب: عمران | | المصدر: شبكة بني عبس

[بنت النور]

مشكور على النقل



وصح السان الشاعر

[ذيبان الرشيدي]

لاهنت

ياالمير

على النقل الراائع والجميل
والرجاء من المشرف المختص تنسيقها بالشكل الاجمل

نظراً لجمال لجمالها


ولاهنت

[ابو محمد العريض]

مشكور عمران على النقل



تحياتى

[برق الوسم]

مشكور على النقل



وصح السان الشاعر