[مرشد الصقعان]

هذه القصيده وجهها لي الشاعر/ عياد دخيل الله العتيبي ورديت عليه أتمنى ان تعجبكم كلا القصيدتين:

الله من قلب(ن) للأحزان مسكان=يلوج كنه في مخاليب تنين
اله ثلاث اسنين قاسي ولا لان=صامد وتومي به رياح الخماسين
وانقادللهاجس على عكس ماكان=قود الاصايل بالرسن فا الميادين
هذا وانا أجزي راع الاحسان باحسان=وادمح اليا جتني من الربع الادنين
ماكفتني الدنيا نكدها والأحزان=ازرع وفاء واحصد عذاب وعذابين
وش خانة المعروف في روس رديان=عساك يادنيا الفناء ماتفيدين
ماتنفعين الا مقرد وجابان=ولا الشجيع يذوق منك الأمرين
يقتات منك العزر في كل الألوان=تلوعينه باليسر والميامين
يافهيد قم ود الكتاب ابن صقعان=اللي يرد الصاع لاجاه صاعين
وده ورد النا الخبر ياكحيلان=حيثه شجيع وقد بداله براهين
والتجربه يافهيد هي خير برهان=وهي ساس مفعول الدواء للمداوين
أما يبين لي سبب جور الازمان=ولا يقوم وفزعته عن ملايين
ونضرب على الكايد ومن غير حسبان=وأصير انا وياه ضمن المفادين
أما نجات(ن) عقبها شانا شان=ولا الممات ولاحياة المساكين
وصلاة ربي عد براق الامزان=على نبي قوم الناس للدين


هذا ماقاله الشاعر /عياد العتيبي ورديت عليه فقلت:

حي الكتاب اللي لفابه بليهان=وراعيه يشكي ميلة الوقت والبين
يافهيد هاك العلم وده لذيبان=يافهيد لاترجع خذه معك هلحين
بلغ سلامي للخوي طير حوران=اللي مخاويني على العسر واللين
يبشر بفزعة صاحبه وين ماكان=اللي مراسيله على الراس والعين
لكن ياعياد من غير جحدان=اللي تحكمنا اسلوم ودواوين
لو انها وقت(ن)مضى دونه أزمان=يوم الشجاع يجيب حقه با الايدين
في ذمتي لطلع مطاليع راكان=اللي فعوله مثبته بالدواوين
لكن هاك الوقت يالذيب سرحان=القرن من فوقه حوالي ثلاثين
أصبر ومن يصبر يبي يصير كسبان=وخاو الرجال اللي على الطيب ضارين
وصل الصلاه اليا بدى صوت الآذان=والآدمي ماله سوى ربه معين
وحنا بظل أخوان نوره هل الشان=آل السعود مرجحين الموازين
في ظلهم دايم على الحق واخوان=ياما جمايلهم على الشعب والدين
وأختامها شكراً جزيلاً وعرفان=وصلو على محمد نبي المسلمين

الموضوع الأصلي: مساجله شعريه | | الكاتب: مرشد الصقعان | | المصدر: شبكة بني عبس

[قسورة الغاب]

صووت رائع واصدا اروع صح الله السنتكم جميعا

وشكرا جزيلا ابن صقعان

[(ابوعواض)]

صوت وصدي

شعار رائعين اشكرك يالغالي

[محمد2009]

صح الله لسانك على القصيده

[هيون]

صح الله السنتكم مبدعين

[مرشد الصقعان]

شكراً على المرور
تقبلو تحياتي....

[مداروفلك]

صحة السنتكم

رائعين

[أثير الشوق]

أصبر ومن يصبر يبي يصير كسبـان
وخاو الرجال اللي على الطيب ضارين


احييك اخي الكريم على القصيده الرائعه
صح لسانك ممد بلا عدد
دمت بخير ولا تحرمنا جديدك