[منصور غنيمان]

محاورة عميدالشعراء والمنقره



منيف المنقرة




مرحبا عند ربعي مزبنبن الدخيل=ربعي اللي تعز الراس وقفاتهـا


بعدها يالرشيدي وش تحط وتشيل=كل حاجه تراها زيـن باوقاتهـا





ناصر مرسال



البقى والعرب ماذكر فيهم بخيل=وانت من عالمٍ ياطيـب نياتهـا


مانقصنا كثير ولا نقصنا قليـل=والعلوم الجزيله كلهـا هاتهـا





منيف المنقرة


ارعدٍ المراعد والمخايل تخيل=وانت ياطيب نيتكـم بغراتهـا


والله اني لاعالج كل قلبٍ عليل=دقت الساعه وتوحون دقاتهـا




ناصر مرسال




ارعدت وامطرت والسيل يلقى مسيل=ياعساهـا تحشـد التـرك قواتهـا


نعرف الآدمي مايصنـع المستحيـل=والعرب ماتخرع الناس باصواتهـا



منيف المنقرة




لوغزينا على السلمان تفزع هذيل=الرجاجيل مبطي هذي سواتهـا


خابرٍ ناصرالمرسال شاعر حليل=يتبع البدو ويـدوّر لبـن شاتهـا



ناصر مرسال




اعلن الحرب وتعرف البطل والذليل=وانتبه من بـلا بقعـى وصكاتهـا


وانت وسط الدواير ماتفك الشليـل=والعـرب يمكـم ياكثـر نظراتهـا



منيف المنقرة




لانزلنا عليكـم ولمـو للرحيـل=حاجتن طبع باحياء الناس وأمواتها


الدليله غدى نحتاج واحـد دليـل=والعرب مانكبها غيـر هقواتهـا





ناصر مرسال





ان حفرت القبور اللي عليها النثيل=الجنايـز تقـدم لـك تحياتـهـا


لاتعذرب بطعم الهيل والهيل هيل= اقتدو بالرجـال وسـوو سواتهـا



منيف المنقرة




انت يامكلم الموتى ياراع الاصيل=العرب لاكذبت تنشاف كذباتهـا


قرّب النار ياناصروشب الفتيـل=الرجاجيـل خربانـه علاقاتهـا




ناصر مرسال




تحسب الذيل راس وتحسب الراس ذيل=مانحسـد اليمانـيـه عـلـى قاتـهـا


شبّت النار شبّت وانت ليلـك طويـل=وأم حـيـلات ماتنـجـح بحيلاتـهـا



منيف المنقرة




ماسمعنا هدير ولا سمعنا صهيل=غير كويه بجبهتهـا وعلباتهـا


والله اني ماثوّر بالقطيع الجفيل=حافظٍ بندقي واعـرف زماتهـا



ناصر مرسال




انت عادل وحقّاني وهرجك جزيل=شاهـدة كويـه العلبـاه بمراتهـا


من يقول المربع يشبه المستطيـل=لاتغرّ العـرب وتقـل هوماتهـا





منيف المنقرة






لو حسبنا لها بالخط ستين ميـل=كل من لحقها في دربها فاتهـا


تو حمل الجمل شقران توه يميل=وانا ماقول حاجه غير بثباتهـا




ناصر مرسال






زوّد الكيل ياكيال ياللي تكيـل=ليلتك خرمسيه عـد ساعاتهـا


ماتميل الرجال وعمرها ماتعيل=والمساكين تخطي درب سكاتها





منيف المنقرة




من ورى حقل هجره يعرفوها حقيل =تختلف فـي مناظرهـا وعلاماتهـا


ابرهه لوغزى راكب ثلاثيـن فيـل =ناكبـه ربنـا بالطيـر وسواتـهـا


ناصر مرسال


من ورى حقل غزّه والبلح والخليل =كان ضلعك متين انطـح معداتهـا


ياعميل انتبه تنقص حقوق العميـل = شفت الارض ارصفتها كبر صباتها
.

الموضوع الأصلي: محاورة العميد = والمنقره | | الكاتب: منصور غنيمان | | المصدر: شبكة بني عبس

[المحامي خالد]

تسلم يامنصور غنيمان على النقل الرائع
بيض الله وجهك
تقبل مروري

[المشعل]

يعطيك العافيه منصور على النقل

محاوره راائعه

تحياتي لك

[مرشدالمظيبري]

تسلم يامنصور غنيمان على النقل الرائع
بيض الله وجهك
تقبل مروري

[رياح الشرق]

تسلم يامنصور غنيمان على النقل الرائع
بيض الله وجهك
تقبل مروري

[ناصرمرسال]

منصور غنيمان الله يبيض وجهك

[عويض بن شامان بن خلف]

منصور غنيمان الله يبيض وجهك
شكرآللاختيارالرائع

[شاعر عبسي]

منصور غنيمان الله يبيض وجهك
شكرآللاختيارالرائع