[size="3"]السلام عليكم ورحمة الله وبركاته
اخواني اخواتي اعضاء شبكه بني عبس اسعد الله اوقاتكم بكل خير......
اقدم لكم بعض قصائد و روااائع الشاعر الكبير مساعد الرشيدي.....
علي امل ان تنال استحسانكم......[/size]
[size="3"]وردتين حمر
ـــــــــــــــــــــــــــــــــــــــــــــــــــــ[/size]
جت في يدها وردتينٍ حمر
قبل الشفق والشمس محمره
النق نافر والسوالف خمر
والموت بين العنق والغره
والريح تاخذ من شعرها غمر
تلعب معاه شوي وتثره
ذاك الثليل اللي جمرني جمر
اللي بغيت اموت من حمره
قلت انورت كل الدروب السمر
والعيد جا يمشي على الجره
برق السنين ومجهمات وقمر
جيتي وخفاقي نفض شره
الليله ليله من ليالي العمر
واحلى ليالي العمر بالمره
قالت غيابك وانتظارك جمر
وايطت تعاتبني وتتشره
قلت ابشري والرمش يا مر
أمر يالول وجداني ويادره
واللي جمعنا يا انتظار العمر
ما اعود هالفرقا ولامره
؛
رماد الشوق
ــــــــــــــــــــــــــــــــــــــــــــــــــ
ولع رماد الشوق يامعذبي نار
!!من كان يحلم باشتعال الرمادي ؟
ماكنت احسب انه يكون اللقا حار
لين التقينا واشبكتنا الايادي
وقامت لنا الذكري تغني على الطار
تنساب باسماعي نغم حب هادي
حسيت شي لفني مثل الاعصار
واستيقظت نشوة غلاك بفؤادي
اخذت لي سجه وانا شبه منهار
بين الخيال وبين علمٍ وكادي
وفزيت يوم انى تنبهت وش صار
مثل الذى توه صحي من رقادي
تغير الموقف بلا سابق انذار
وغيرالمشاعر جت مشاعر جدادي
رديت لك عقب التجافي والانكار
وطويت صفحات الزعل والعنادي
وتبددت ذيك المبادي والافكار
ايه جنون افكار وايه مبادي
تراي انا مليتها لعبه النار
ما احد لعبها قبلنا واستفادي
من رد للجنه عقب صالى النار
حتى السموم يصير عنده برادي
؛
حمرة الشمس
ــــــــــــــــــــــــــــــــــــــــــــــــــــ
هذا انت والا حمرت الشمس واليم
ريح المطر ولا نسايم حنينك
يومك ضحكت وبش باوجانك الدم
قبل الغياب وكلهم حاسدينك
كن النهار اللي رسم للشفق فم
ضحكه ثغرك اللي سماها جبينك
هذا انت ولا من يضم الحشا ضم
هذى يدين البرد والا يدينك
ثلجي نحرك ... أدفي من غفاية الهم
عن خاطر ٍ صحوات همه تدينك
بأعانق احدود الضما والغلاجم
وأبقي معك سيد هواك ورهينك
صب لي شمس
يانهار البشاير ... صب لى شمس
باتقهوى وانا والله ...حياوى
يكفي اني فداوى عندك امن امس
وانت تشره على ثقل الفداوى
احسب انك قبل لاتمد لي ... خمس
تحتضني ... وانا امد الرهاوى
لاتعجب ... تلمس خاطري لمس
لاتغرك من بعيد ...الكساوى
جايز اضحك لو انه خاطري عمس
نوب ضحكني مثل طبعي نحاوى
يمكن انى قريب ومبعد .. الرمس
كل لونٍ لبس جسمي سماوى
جيت اقص الزمان وجرته طمس
قلت ابا انشد ... قنب بالرجم عاوي
؛
الطريق المظلم المهجور
ـــــــــــــــــــــــــــــــــــــــــــــــــــــ
تخوفني مشاوير الطريق المظلم المهجور
واليامني ذكرتك قلت طولي يامشاويري
عزاي انك رجاي العذب لو كل الدروب عثور
وصلت اوماوصلت اعرفك ما انته منتظر غيري
حبيبي ..وكل الله لاتحسب إني بليد شعور
لو انت المستحيل الصعب .. ماابدي لك معاذيري
احبك ..رغم تجريح الليال لقلبي المقهور
اشوف الجرح يكبر وانت تكبر وسط تفكيري
احبك .. لو يموت الحب وتصير القلوب قبور
احبك كلمة لو حرموها .. حل تفكيري
احبك من هنا حتى طلوع الفجر ..حد النور
صحيح انك قدر محتوم بس اجمل مقاديري
بعذر اللي يحبك لو يصير الشاعر المشهور
لأنك تنهمر حلو القصيده في تعابيري
احد ربي يحطك له حبيب ..ومايجيه غرور ؟
وانا مهما بغيت استوعبك ياقل تقديري
هلا بك من قدمك ... لغرتك لي شعرك المنثور
هلا في كل شيٍ فيك وانت اغلي مساييري
أثر صدق الغلا يجبر حطام الخاطر المكسور
وانا مهما منحتك من غلاي اشعر بتقصيري
ولو طالت مشاوير الطريق المظلم المهجور
انا لامن ذكرتك قلت..احبك يامشاويري
؛الليالي تموت ببردها
ــــــــــــــــــــــــــــــــــــــــــــــــــــــــ
في زمان كنه البرد .. شبيت القصيد
قلت ابدفا والليالي تموت ببردها
في طريق كنه الموت والحالي وحيد
قلت ابحيا والمنايا تبوح بسدها
أتقارب هقوة العمر لو كانت بعيد
واتغني بالمقابيل واخطب ودها
لاقديم الجرح يقوى ولاجرح الجديد
يخلف الناس العزيزه عن اللي ودها
والله اني ماتنازل .. لي رايٍ عنيد
لين أداعب غرة الشمس ..والثم خذها
وانزفي ياوردة الشعر .. من دم الوريد
لاتجفي في عروقٍ .. تراجف يدها
ياقصيدي كان الأشعار سادات وعبيد
والله انك من بحور ..غريبٍ جدها
ماتقاود مهرة الحرف للقلب البليد
ياقصيدي خذ رسنها ..وخلك قدها
في طريق كنه الخوف سليت القصيد
قلت ابحيا والليالي تموت ببردها
؛
تبدين مثل المستحيل
ـــــــــــــــــــــــــــــــــــــــــــــــــ
؛
آخر عباراتي وداع ..وآخر مشاويري رحيل
جيتك وبي لفحة ضما واقفيت كبدي ناشفه
اصعب كلام أصعب خبر صرخه عقب صمت طويل
مثل الهدوء اللي سبق لحظة هبوب العاصفه
وأنتي بمتناول يدي ... تبدين مثل المستحيل
في عشرتك صوت العقل يقتل طموح العاصفه
الحب ماهو كل شي إليا وقف حظٍ بخيل
قلوبنا مثل العسل بس الظروف مخالفه
لاللندم ..لاللعتب .. أوشي من هذا القبيل
وانتي ماجا منك خطا حتى تقولي اسفه
من غير ليه .. استسلمي ..واستلهمي صبرٍجميل
ولاتسأليني وش جرى مالك بطول السالفه
قولي لهم ياعزوتي ماعابنا موت النخيل
اللي يوافيها الأجل وتموت لكن واقفه
آخر عباراتي وداع آخر مشاويري رحيل
جيتك وكبدي ناشفه واقفيت كبدي ناشفه