السلام عليكم ورحمة الله وبركاته
اهديلكم هذي القصائد المرثته بصاحب السموالملكي الامير عبدالمجيد بن عبدالعزيزال سعود
أمير مكة نظيف القلب
النقيب عبدالرزاق بن مخلد الذيابي
هز القلم حزن قلبي واستفاض الحبر=واقلبي اللي عليه الهم جمرة وقيد
وادمعي اللي من اسباب الوداع انهمر=على فقيد ولا مثله بوقته فقيد
راح ابو فيصل واخو عبدالله المعتبر=امير مكة نظيف القلب عبدالمجيد
حبه بوسط القلوب الطاهرة مستقر=وفي كل ساعة يضخ القلب حب جديد
مكة تماري بحبه بين كل البشر=وحب المدينة لشخصه مستمر ومديد
تكفيه ثنتين في دنياه تبقى ذخر=وترجح بميزان فضله يوم حشر العبيد
انجز ونفذ مشاريع تسر الصدر=واشرف على توسعة بيت العزيز الحميد
ومسجد رسول الله الهادي رفيع القدر=اهتم بعنايته والله رقيب شهيد
مرحوم ياسيدي ندعي بسر وجهر=وفي جنة الخلد لك مأوى وبيت جويد
ويارب تنبت على قبره ورود وزهر=ويوم القيامة تناديه الشهيد السعيد
ارفع تعازي لمولاي المليك الاغر=وجميع الاسرة وكل الشعب وادعي واعيد
الله يحسن عزاكم ياطويل العمر=ويحسن عزا المملكة في موت عبدالمجيد
عساه في جنة الفردوس
مهدي بن مسفر بن عليان الحبابي
ياالله ياحي يا قيوم ياذا الجلال=يا خالق الكون ما يخفاك غيب الصدور
انت العظيم الذي بيدك عدل الميال=وبيدك تصاريف ذا الدنيا وبأمرك تدور
من بعدها يا هجوس الشعر جالي مجال= اليوم يا هاجسي موقف ولا انت معذور
في موقف الجمل جملني وشد الرحال=انت الخوي الوفي اللي معي ما يبور
خابرك واعرفك ما تأتي بغير الجزال=من فضل ربي وتوفيقه تجي بالبكور
وخابرك ما تذخر الطيب وتوفي الرجال=احقوقهم ياخوي في جميع الامور
واليوم يومك ولا يحتاج طول الجدال=ابغيك تنقل عزاي وما بصدري يدور
للقائد وكافة الاسره على كل حال=اولاد عبدالعزيز بمن نزل فالقبور
عبدالمجيد الفقيد اللي يحقق لأمال=اللي له الكل يشهد صدق من دون زور
اللي عطوف على المحتاج لو قال طال=ومدات جوده وفيه ما لحقه القصور
عساه في جنة الفردوس منزله عال=وقبره من أرياض جناته ويغشاه نور
رحل ولكن حبه ثابت ولا يزال =عند القيادة وعند الشعب مافيه زور
يا والدي عبدالمجيد
عبدالعزيز بن سعيد البراق الثبيتي
الله من حزن طواني ياسعيد =والله من هم على بالي طرى
اكبر مصيبة غيبت عنا الفقيد=فقيدنا الغالي فقيد ام القرى
اكبر مصيبة والخبر عندي اكيد=ان الحزن في قلوب اهل مكة جرى
يا والدي مرحوم يا عبدالمجيد= دعيت لك ربي ويدعي من درى
تبكيك مكة كلهم شيخ ووليد=والطائف دموعه على قمة كرا
وتبكيك جدة حاضر وماضي تليد =من الشعيبة لين توصل لأبحرا
يا سيدي في قلوبنا حبك رصيد=محبتك لا ما تباع وتشترى
حفظت امن بيت الإله بكل حيد=وخدمت حجاجه وعين الله ترى
واليوم وافاك الاجل وانت الشهيد=شهيد مكة باذن خلاق الورى
ومهما نظمت من الخواطر والقصيد=ما اوفيك حقك يالجبين الأزهرا
ما انساك انا يا والدي عبدالمجيد=ادعي لك المولى ويدعي من درى
يا سليل المجد
ساعد بن فرج الشلوي
اتبشر عن وصول اهل الاصول=سيدي عبدالمجيد ابن الاصيل
واعلن المذياع قلنا وش يقول=قالوا انه معلن (ن) عنا الرحيل
وانذهلت وصابني رمح الذهول=حسبنا الخلاق يانعم الوكيل
مالنا غير القناعة والقبول=كم فؤاد (ن) من عنا الدنيا عليل
ياسليل المجد يارمز الفعول=يا مطوع كل صعب ومستحيل
ياقوي البأس يانجل الزحول=ياعريب الساس كساب الجميل
ياسديد الرأي ياسيد العقول=ياكريم المد حراب البخيل
تبكي اطلال المعالم والسهول=ولا مشى من بينها عابر سبيل
والبلاد وشعبها عرض (ن) وطول=تذكرك يا مير جيل (ن) بعد جيل
يا عسا مثواك مع مثوا الرسول=في جنان الخلد والظل الظليل
اخوكم / سلطان العايضي