قصيده كتب لها ان تكون
قصيده ، هي بينكم
كما هي ،
اللي بقى بالبوك تسعة ريالات=كل الذي باقي معي من رصيدي
ياراعي الوقفات يابو الجمالات=ياصاحبي . . يامسندي .. يا عضيدي
جتك القصيده رغم طول المسافات=واحكم على كيفك وباللي تريدي
مامقصدي سلفه ولا ابغى حوالات=حبيت اوضّح واقعي في قصيدي
ابتنفس ضاق صدري معانات=وابتحرر واقطع حبال قيدي
تعبت هم وحلم واتعبني الذات=عنيد وانا مثل طبعه عنيدي
مابين خيبات الأمل والطموحات=ضيعت مدري ويش ابيه واريدي
متجمعٍ كلي وانا كلي شتات=ومتشتتٍ وانا لحالي وحيدي
اضحك واقول العمر كله سهالات=دام القدر واقع ولاهو بأيدي
رغم اتساعات الفضاء والمساحات=إلا ان ضيقي دايمٍ في وريدي
ياكم يخون الوقت مره ومرات=وياكم قنصت وياكل الغير صيدي
وياكم على صدري تجمع تنهات=وياكم بكيت وقلت للحزن سيدي
غربة حياه اعيشها ببتسامات=اهم شي ... اعيش عمري سعيدي
على شواطي حزن تنبت مسرات=على نغم عزف الهوى للجريدي
حياه تبنى بتساع العلاقات=ومع من تحب يكون حبك وطيدي
بالرغم من قل العدل والمساوات=وتصنيف خلق الله شيوخ وعبيدي
وركض البشر خلف الترف والشهاوات=وحب الأناء .. والنرجسيه وليدي
صار التفلسف بهرجه والسياسات=ضحله .. ومحصول المفكر زهيدي
المجتمع لو يزدهر بالحضارات=وترابطه معدوم .. وش يستفيدي ..؟
تبقى سذاجات التخلف سذاجات=يتوارثوها من حفيد لحفيدي
الواسطات اساس علم السخافات=والتفرقه ماهي بعلمٍ جديدي
والأسئله مفتاح كل الأجابات=ويبقى الغباء علم وسياسة بليدي
الله يلعن والدين الحزازات=حسّبتها تنقص واثرها تزيدي
نعيشها ظلم .. ونسير بمتاهات=دروبٍ رسمها قاهــري لصعيدي
ودام التناحر في جميع الديانات=يامحترين العيد مافيه عيدي
ومادام حنا اموات وابائنا اموات=وش ينفعك لو عشت عمرٍ مديدي ؟
إلا عمل صالح وخمس الصلاوات=والذكر يبقى كان رايك سديدي
واللي طرالي ضمن ماجاء من ابيات=إلا ماعمره غاب علمٍ اكيدي
شطرٍ لخوي وحافظه من سناوات=(يكفيني آصل لعتزيت برشيدي)