يا ذهب.. يا عقد مرجان.. يا فضه
==============
للشاعر الكبير / جهيم الذيابي
لو عيوني تذرف الدمع وتكضه
* وش يفيد العين من كثرة بكاها
السبايب كلها جادلٍ غضه
* جل شان اللي خلقها وسواها
يا ذهب.. يا عقد مرجان.. يا فضه
* درةٍ لا جيت أو صف حلاياها
يتعب السباح في الموج ويخضه
* يمكن الدره ورا الموج يلقاها
إن لقاها قالت الناس من حظه
* وإن غدت تصفق يمينه بيسراها
ذكريات العين يوم الشعر فضه
* وبان بدرٍ مكتمل في محياها
في ملمٍ وسطه الناس مكتظه
* حارت الأقدام عيت تعداها
قمت أفرك راس الإبهام واعضه
* لحظه لا يمكن الفكر ينساها
ما يلام القلب لو جض له جضه
* كل ما يطري على البال ذكراها
مض سيفك يا مليح البها مضه
* خل عين السحر تكثر ضحاياها