قالت تملكت
القلب هاضت هجوسه وانشغل باله=والعين هلت عباريها لغاليها
والنوم للعين عيا ماتهياله=سبة رساله لفتني صوب راعيها
قالت تملكت خل القلب في فاله=والحب الاول ترى ماعاد نحييها
ارجوك تمسح رسايلنا وجواله=تنسى جميع الغلا حتى لياليها
قلت ابشري ما طلبتي جاك مرساله=الروح والعين ترخص لو بغيتيها
لكن جروح الهوى والحب وافعاله=امنتك الله امانه دوم تطريها
القلب وده بحبك بس ما ناله=والروح يمك اقديها و وديها
ياقلب مدري شسوي عقب ترحاله=اكذب على النفس لامن قلت ناسيها
يالله طلبتك بعز الملك وجلاله=عسى السعاده لمحبوبي يباريها
آخر تعديل بواسطة فهد المويسه ، 03-12-2007 الساعة 05:04 PM.
|