الشهره اللي وراها الناس منجرفه=ماهوب اكبر طموحي مصافح ايديها
مانيب جاهل بها انكانها حرفه=اعرف مداخيلها واعرف خوافيها
اعرفك يادربها واقول ماعرفه=وان مر طاري لها صديت طاريها
الشعر لولا عيون الجادل الترفه=والله لانسى القصايد مع قوافيها
ضيقات صدري كثيره مالها صرفه=من كثرها ماعرفت شلون ابحكيها
اشياء منها تبات النفس منقرفه=ياكثر ماحطمت نفسي وامانيها
القدس راحت إناظرها من الشرفه=وابن اليهودي يدوّج في ضواحيها
وحنا العرب ساكتين اسكات معترفه=نشوف بالعين ارض القدس وش فيها
والدمعه اللي من المسكين منذرفه=ماحركت شي بالظالم معانيها
الجوع .. والبرد .. ومسكن يشبه الغرفه=تقتل احلام الفقاره .. قبل تحييها
والناس صارت بجرح الناس محترفه=يارب سترك من الدنيا وبلاويها
والحب تطعن بصدقه .. بنت منحرفه=من كثر ماكذبت .. تنسى اساميها
وبعض السوالف تغثك مابها طرفه=تدبل كبودٍ تدور من يسليها
مثل البشر بعضهم ماودك تعرفه=زودٍ على ضيقتك وجهه يطّريها
ثامر شبيب