وين أنت ياللي كل ماقرب الليل=يلفي خيالك وأسهرك للصباحي
مل الخفوق ومل شوق المواصيل=وينك؟ تعبت وهاجسي ماأستراحي
أسأل عليك الليل وأقول ياليل=متى تجيب اللي يضمد جراحي
من النكد ومن القلق والغرابيل=لاني بمجنون (ن) ولاني بصاحي
تعبت واتعبني ولاعاد بي حيل=لكن تعب تفكير لاتقول طاحي
ياليل قبل تروح قله بتفصيل=عليه وجه الله يطلق سراحي
قله يجي يروي عروق مماحيل=واغفر له اللي صار وأقول راحي
واذا يعاندني عناد المهابيل=والله لأهبل فيه لو كان صاحي
واني لأسوي فيه كل التهاويل=واقول له هذا من ابسط مزاحي
واعطيه أمل واحسسه بالمقابيل=من العطش يشرب هماج وملاحي
واليا نشف دمه وذوقته الويل=وضيقت صدره من جميع النواحي
وخبلت فيه وصار ضمن المخابيل=تركته لحاله كسير الجناحي
ماله سوى بالليل غير المواويل=يشمت بنفسه عقب ماكان صاحي
واللي زرع له شوك يجني المحاصيل=ومن يقطف الازهار له عطر فاحي