قبيلة بني رشيد - محاورة سوار الذهب و مصلح ابن عياد الحارثي

ابن عياد :

مرحبـا فـي حلـة الشـدادي الله لايهيـنـه = من بني الحارث صلاب الروس خطلان الايادي
المطيـري لايحيلـون العـرب بينـي وبينـه = عنده اجيوش وعتاد وعندي اجيوش وعتادي

سوار الذهب

البقا بك وانت منته سور مكه والمدينـه = بس فيكم خير والحرّث منزحة الأعادي
من هو اللي من بعد ياخذ كتابه في يمينه = ايتلفت في بلاد الناس والا فـي بـلادي

ابن عياد :

ليه يوم انك تصير اكبر بطل واكبر رهينه = بين سيل وبين ليل وراس ضلع وجال وادي
كن في عينك سراب وكن في صدرك مكينه = من مقابيس الشرار اللي تناقلها الايـادي

سوار الذهب

الله اكبر وش يهم الصابرين امن الغبينـه = بعضنا من بعضنا لو وضعنا ماهو بعـادي
لي صحيبن يوم اشوفه كن عين الذيب عينه = له ضلوع وله فزوع ( ن ) كثر عمدان الجرادي

ابن عياد :

يعرف اللي في يسار الدرب واللي في يمينه = لاعليّه بالحرام أني مااجنب عن مـرادي
امش فالدرب الصحيح وخذ زياره للمدينـه = واخذ في مكه ثمان ليال واخضع للجهـادي

سوار الذهب

الوجيه الضاحكـه مستبشـره والا حزينـه = وانت مايقطعك من نقل الصميل الا البـرادي
حسب مااسمع عنك عند البدو منت ثقيل طينه = وانت يالمفتي قريب أعطيك من شربي وزادي

ابن عياد :

وين عبدالله عن الميزان والميزان وينـه = اصقه(ن) ماعاد يسمع لاصياح ولا منادي
زادكم ماهو بحلـو ولا تغشاكـم سكينـه = تشربون امن الحليب وتاكلون امن التوادي

سوار الذهب

انت ابن عياد مانته لايقين ولا جهينـه = عدها لو الجواد المنعثر ماهـو جـوادي
قالوا العريف مظهار الفتى قـدام حينـه = وانت لو يعرفك ابن حثلين يجهلك المهادي

ابن عياد :

انت رجال متعلم مار في صـدرك ضغينـه = يوم تومي بك حدور ويوم تومي بك سنـادي
ماسبحت امع البحور ولا تعليـت السفينـه = وان نشدنا عنك قالوا من حصى الحره وغادي

سوار الذهب

يالله ارحم والديّ ويالله ارحم والدينـه = البسيطه كلها ريش ومخاليب وثنـادي
صاير البحّار عيا يتفق دينه ودينـه = بس انا رجال اصيد الا عليقه ماتصادي

ابن عياد :

الحسايف يوم قدمتـك علـى راع الدفينه = وانت وجه ( ن ) لاش نار ولاشرار ولازنادي
ان صدق حلمي لسان الرجل زايد عن يدينـه = ليت حمران النواظر طيـروه امع الحنـادي

سوار الذهب

انت وش دخلك مابين الثلاثـه والثنينـه = حارثين منقسم نصك فحمك نصك رمادي
مابقي من لمة الجهـال غيـر مصدقينـه = والا انا رجال يحكي لي لساني عن فوادي

ابن عياد :

هيه يالخباز ياللي ماتعـرف الا العجينـه = ملتوي وجهك تقول انك عن الدرب متحادي
ماطلبنا منك نقـد ولاطلبنـا منـك دينـه = البطولة للهلال وللنصر والاتحادي

سوار الذهب

اثر بعض الناس مكتوب الخطيه في جبينه = يمكن انه من عرب بين ام رابع وام حادي
لاتقلطنا ليا جينـا علـى غيـر السمينـه = وانت هذا الوقت ماينقصك غير انتل ورادي