عز الله إني جلست وطال مجلاسي =يالله عسى كل تأخيره بها خيره
وإلا سنتين مضن لي شيبن راسي =ياما خذن من صديق وطلعن غيره
لولا الشدايد وش اللي يفرق الناسي =لاكنها تطلع الصفرة من النيره
قدامها أخذت لي بالدرب مرواسي =وأزريت لأفرق ورده من مصاديره
لين أخلف الوقت مرماعي وهوجاسي =مال الزمان ولقيت أكبر مخاسيره
رفقة رفيق تشيدها على ساسي =واليا أدبر الوقت هدتها معاصيره
وأقفيت عنها رجاي معادل الياسي =حيث البنا صعب هده عقب تعميره
أسباب ما أذهب عزاي وثور احساسي =ماهو غشيم هدم بيره بتدبيره
أنا ليا شفت فتقن صار من ياسي =أخفيه ما أبديه خوفن من مداويره
والتايه اللي بعضده رد الأمواسي =أغضي عنه لو كشفت أخطاءه ما أذيره
أخلف هدف رمعة يفرح بها سياسي =ماني غشيم يصيد ببندقية طيره
واليا اعترض في نحاي وحد الأضراسي =ماني زهوت قضيفات معابيره
باللين ليّن وفي وقت القسى قاسي =لا كشر الناب والطايش صقع زيره
يبشر بخصم يهد المبنى الراسي =في ضربة كسرها يتعب جبابيره
ما جاب غيضي وتكديري وعوكاسي =إلا احتمال الخطأ لا ضاع تبريره
أبا الندواي يذب الدرب متواسي =قدام أخبط الشجر وأظهر عصافيره
طالت وعرضت هبوب ليلها دماسي =يجرح صداها لبيب العقل ويثيره
الصبر جوهر وهو له حد وقياسي =والطق قفل العجم خل بمساميره

نشرت بئسم شاعر رشيدي في جريدة الرياض