أسلي النفس وأخفف على ناري= وأقول عمر الشقا هذي توافيقه
لاضاق صدري زبنت الحبرو أشعاري= اليا تذكرت أخوي بحزة الضيقه
جاني خبر محزن(ن) من شر الأخباري= تصدع القلب وأدهر من معاليقه
الساعه اللي ترافقني بمشواري= بالموقف اللي يلوع وصعب تصديقه
سمعت شين الخبر وأنشلت أفكاري= أعصاب مخي مراكز نطقها تعيقه
ماأسمع كلام العرب وأسج محتاري= كني فقيد العقل والناس مطيقه
والله لوكان ينفع لقطع أزراري= وأنوح وأبكي بدمع(ن) زاد تغريقه
واليا تذكرت يومن مابه أعذاري= يوم القيامه وكلن حسب توفيقه
يارب ترحمه ياعلام الأسراري= الجنه مطلب وهم النار تعتيقه
يابوي لاتشيل همي دامني ساري= وأنا طموحي صقر بالجو تحليقه
أحدن يموت امتعاف بقدرة الباري= وأحدن نجا من مرض لوصعب تدقيقه
صبري قوي والصبر أساس الأصراري= صابر على بلوتي وأيماني اوثيقه
دنيا تقلب وحكم أقدارها جاري = ناس(ن ) تسره وناس(ن) نشفت ريقه
والمومن المبتلى صبار ويداري= ودنياك لوجمعت ياسرع تفريقه
لابد ماينقضي حلوه والأمراري= الليل يضفي على الشمس ومشاريقه