يابو فهد بالي من الوقت طايب=وروحي تزايد يأبن شافي تعبها
شافت عيوني فالزمان الغرايب=ومطامعي هم الليالي جذبها
دنيا تشيل من التعب والحرايب=ما يزعج العاقل وهو ما قربها
أبليس اشوفه صار بين القرايب=يفرّق الاثنين حتى غلبها
ومن الذنوب اشوف حتى السحايب=ماعاد ترخي للفيافي هدبها
وصار الخوي عن ماكر الطيب غايب=والخوه بحبل الردى قد صلبها
ومنازل أهل الجود راحت خرايب=غدو وأشوف النار يرمى حطبها
وماعاد به واحد من الموت هايب=يطرد ورى الدنيا وهو ما حسبها
يعيش والايام غلب وغلايب=ورى ملذات الحياه وطربها
كلٍ ورى الدنيا يسوق الركايب=كم زمرة تفتل عشانه شنبها
قامت تزايد فالحياه المصايب= وضاقت على العاقل بواسع رحبها
مالي على الامه حقوق وطلايب=مقفي عن الدنيا وقاسي صخبها
مير أبتلتنا بالشقاء والغصايب=ولا استراح اللي تملّك ذهبها
الشختلي ياخوك شاف العجايب=ودلال صكات الليالي شربها
والمستريح اللي مصلّي وتايب=وأعماله لوجه الولي محتسبها