يوم اربعا بول عشر من جماده=جاني خبر كنه صواعق وزلزال
قالو عمود الشفت شالو اوتاده=ظلا مريف فوق ربعه عن اللال
الله يجازي من سعى في ابعاده=بأمراض مايلقى دواها وسلال
راح ابو صالح راح عصر القياده =شاعر حكيم وعند قوله ليا قال
عبس لهم بالطيب مبدى وعاده=صغيرهم فعله تقل فعل رجال
فيهم كرم يفوق وصفي زياده=ورث لهم منجد لاعم لاخال
ارجو السموحه عن قصور الاشاده=بولاد عبس مطوعه كل عيال

ماهي غريبه منك من روس قاده=شيوخ (فدك)اللي لهم يرجع المال
الجابر الهم بالمواقف شهاده=طيب وكرم تشهد لهم كل الاجيال
وطبع الوفاء يحتاج صبر وجلاده=وعز الخوي في عبس مضرب للامثال
وهذي يابوخالد ظروف القياده=اليوم معك مقيم والصبح رحال
وفرقا"على طيبه وعز وسعاده=حلات عمر المرء والعمر لو طال
لابد من يوم يواجه نفاده=ويهل فوقه من ثراء تربة الجال
واللي على الله حط جل اعتماده=يعيش من هم الدهر رايق البال
وربك لطيفا"مايضيع عباده=سبحانه اللي عالم كل الاحوال