لهيب الوجد

واكبدي اللي لهيب الوجْد محْرقها = أونس لواعيجها معْ حَرّ الانفاسي
اشرب عليها من البارد ومغـْرقها = لاشك عيّا يطفـِّي حَرّها كاسي
على هنوفٍ شعاع الشمس ناشقها = خمْريّةٍ لونها من لون الاطعاسي
الزين فيها حقيقه لو تحقـّقها = الراهب الملتزم سبَّح وهو ناسي
لا كحْل لا رَوج لا مكياج لاحقها = الزين فيها طبيعي مثل الالماسي
الخدّ شمس العصر يطربك شاعقها= ما كنـّها يا عرَب مـن طينة الناسي
والعين عَكشا هَدَب .. نجْلاً يسارقها = من زايد الغنـْج خدْرة نوم ونـْعاسي
والشَعْر الاكثل خطير يتلّ عاتقها = لى فـَلـّته وانهمر لأعطافها كاسي
والكشْح هافي وضامر .. ما تعَلـّقها = طفلٍ .. وَلا مَسّها جـنٍّ وَلا ناسي
والعُود من شجْرةٍ غضّه مطارقها = طلـْع الثمَر فيه لا ليّن ولا قاسي
الى حكت حِسّ نبْرتها ومنطقها = هدِيل ورْقاً تهيّض كلّ حَسّاسي
والعُود والمسْك ينضح من مَعَارقها = والورْد والزهْر من نفحات الانفاسي
حَسْبي على الشِعْر فرّقني وفرّقها = وأمسَيت انا غارقٍ في بحْر هُوجاسي
ما ادْري وش اللي دعاني يوم احمّقها = قصيدةٍ قلتها لعْب وتونـّاسي
والعين قالوا بحَر .. والنفْس يطرقها = ما هيّض الشعْر واثر الشعْر دسّاسي
غارت وراحت وخفـْت اقوم والحَقها = في زحمة الناس .. لكنْ ردّني باسي
مِسْكانها بين مغْربها ومشْرقها = من دونها سُور وجْنودٍ وحُرّاسي
سلطان سلطان .. ما تقضي لعاشقهـا = من قبل يقضي عَليه الهَمّ والياسي
إشعَب ركاب الفكر والسابقه سقها = إفزع لعلـّك تليّن قلبها القاسي
قصيدتك ما انت شاريها وسارقها = في غبّّة القاف تتعِب كل غطّاسي
غيمة بحَر لا اقبَلـَت يدهشـْك بارقها = يشفي مطـَرها جميع السقـْم والباسي
اشرح لها الوضع يا كـُودك ترقـّقها = وغضّ البصَر وانتبه يا الشاعر الراسي
احذر ترى من لمَحْها غصْب يعشقها = أخشى تزلّ القدَم وتطيح متـْواسي

حَيّ الله المزنه اللي لاح بارقها = غرّاًعليها عروق القلب يبّاسي
تدفـّقت واثلج فوادي تدفـّقها = وأنا ما بين الرجا والهَمّ والياسي
لكنّ وصْلت بنا الطرْق لمفارقها = واظن جمر الغضا ما هوب ينداسي
والعشق كم له ملفاته مغلـّقها = أحيان ناسي وبعْض احيان متناسي
يا كثْر الأصوات يزعجني تصاعقها = وأحطـّها مثل حرْفٍ بين الاقواسي
والعذر اقول :إذْن مشغوله واذن صقها = أبَا اتمشـّى واداعب كل نسناسي
شكوى هَلَ العشق اكذّبها واصدّقها = تطـْرق بحور الشعِر وتدقّ الاجراسي
يا كـُود شكوى خذتني في حقايقها = لا هنت يا امير خالد يا بَعَد راسي
شكواك يوم اتمعّنهـا وأدقـّقها = شكوى خبيرٍ بعِيد انظار وسْياسي
وإنْ كان دنياك شايقتك وشايقها = انته وريث الفخر والدرع والطاسي
قومٍ على قمة العليا بيارقها = مقياسهم يختلف عن كلّ مقياسي
والعشق له مُرّه ولذّه .. وذايقها = يعيش بين الرفاهيه والاتعاسي
والعاقل اللي بمعناها يطبّقها = ويضحك على الجاهل اللي يطبخ الفاسي
عزي لكبدٍ فراق الشوق فاتقها = ما غير الاسِيه لو ما هو بمتلاسي
عشَقت من ثبّت طعونه ووثـّقها = عانيت منها وانا في راس مرواسي
قدام أعرّج عليها وأتطرّقها = أعُود لك يا طويل العمر واواسي
روحٍ شعاها الغلا والحُب وارهَقها = على الذي قدّها بالوصف مَيّاسي
قبّاً من اجمل بنات الريح واسبقها = فرَس فرَس فارقه عن كل الافراسي
إن دبّرَت كنّ نصْـف الجسـم عايقها = وإنْ اقبلت كلـّها عنـْج وتغطراسي
وإن عَرّضت يسْبي الخافق معَنـّقها = وانْ وقـّفت خلـّت الوقـّاف جلاّسي
وشُقـْرٍ على الجـِيد الاتلع يوم يفهقها = شلاّل نافورةٍ من فوق الاكباسي
حفـّانةٍ حَومة الحايم تضايقها = بيّن عليها من بْعِيدات الارماسي
الحُرّ لا لحْقها في الجوّ علـّقها = وانْ كوبَرت لاحهـا بالمخلب القاسي