محابيس الطيور اللي على ريح المطر تنساق = حبسها الليل لين الصبح صحاها على بابي
وخلت عشها .. للريح والأغصان والأوراق = الد الشوف فيها والهبائب تذري اترابي
أقلب نظرتي عرض السماء .. وتضيع بالآفاق = أنا ماكني إلا طير فاقد بالسماء اسرابي
على الرجم أترقب والخفوق المتعب الخفاق = ليا تل السبوق أبرقعه (بشتي ) و ( محرابي )
حشمته لو نتائجها على القلب الصخيف افراق = وسترته بالحيا اللي له ثيابٍ تشبه أثيابي
منعته عن مشاوير الطريق اللي بدون أفاق = اخاف أرسم طريقي بالخريطه ويتعدوابي
سنين من السبات ببيت ماله بالخبوت ارواق = تقلبه ( الفصول الأربعة ) في فترة أغيابي
ولفى الحب النزيه اللي دعاه من المنام وفاق = ولاناوي عليه يبات لين تنوخ ركابي
عليك الله ياشعرٍ تغرد حوله الأذواق = لاتتركني لحالي تلعب الأيام بأعصابي
تعبت ولابقالي غير قلب الجافل التواق = هجوج من الظلال ومن نسيم الليل يرتابي
تعاتبني على قل الكلام وندرة الأشواق = وهو مايدري أن الشوق ناره بين الأهدابي
ينام وتسهر عيوني وكن الشوك بالأحداق = وأخاف تحول الدمعه وجفن الصبح يصحابي
وكفكفها على حد الضلوع وللحيا براق = مخاييل العيون اللي تخيله نظرة أحبابي
( خوافقنا خضر ) لو كان مافيها غصن و أوراق = خضر تغري طيور الشوق لو الدم عنابي
وطيري ياطيور وكل قلب لرغبته ينساق = وأنا هذا (هواي) اللي فواتيره من حسابي