وجد روحي يالزمان اللي من الدنيا مضالي=وجد من زلة قدم رجله على درب الخطيه
بين عدوانٍ على الزلة وتقصير الحوالي=تشفق اشفاقه على علم الردى روحه وجيه
حده الحظ الردي ولفته غبر الليالي=لف حبل الدلو الأملح في زرانيق الركيه
طاح من عقب العزوم اللي تعديه الطوالي=طيحةٍ تهدم ظنون وغاية النفس الأبيه
أشهد أنه ضايقٍ صدري ولا يرتاح بالي=غير في شوف الخلا الخالي والأرض الجرهديه
لاعطينا مع خطوطٍ تقطع الجو الموالي=من ورى عرق النفود ومن يمين الجندلية
نتبارى مع طمان الجو والممشى عدالي=وأن تخالفنا معشانا فياض الحاصبيه
من حقوق الوسم مسقيها مراويح الخيالي=السحاب اللي رعوده تلتحم في مقدميه
كل مازادت رعوده برقه يزيد أشتعالي=يشتعل بين الكواكب والنجوم الموسميه
أوله وبلٍ دقاق ويتبعه وبلٍ ثقالي=وآخره ديمة وتاليها يجي ضرب بردية
هلت الوبل ومفيض الروض فالقيعان مالي=ميلةٍ عقب الدهر تروي ضماها في شويه
وأشتبك عود الشمطري والشجر سبل وطالي=كل ماذعذع هوى الغربي تمايل في نحيه
ناخذ السجه بها عشرة ليالي بالكمالي=ماسمعنا علم ثورات الشعوب اليعربيه
ولانخاوي غير رجالٍ تنصاه الرجالي=يجذبه طلق المحيا عن محيط الجاذبيه
كل فعله طيب وعلومه ثمينات وجزالي=الخوي اللي ولا مره تردى في خويه
والردي ماهو رفيقٍ لي ولا فيها جدالي=بايعه بيعه ولاني من وراه أرجي عطيه
يانديمي سوق لي فنجال من صفر الدلالي=القصيد يزين مع لعب اللحون السامريه
كم شربنا كاس مر وكم شربنا كاس حالي=عايش الدنيا على حسب الحياة الواقعيه
واتصبر لوزماني بالموده ماصفالي=والتمني يقطعه حبل الرجا والنار حيه
واتعزم وأن وقفت أوقف على ساقي لحالي=ماشكيت الجرح والغربال وعزومي قويه
تقدح الدنيا شرارتها فالأيام التوالي=بين عميان البصيره والعقول العبقريه
سيرةٍ فيها يضيع الفكر قافيها الزوالي=مالها عندي وعند الناس غيري قابليه
الليالي ضيمها يبيد عفاريت الرجالي=كان ماوسع منك للمضيوم يانجد العذيه