كنا نشوف البنت اذا جت وشعرها منفوش وكأنه منتف
قلنا : استغفر الله ما مشطت شعرها في البيت
شوفوا ألحين ..! تفتخر بهالحركات بين الناس لأن فلانه المشهورة
سوت كذا.
ترى البعض ما فهم وشو التطور ؟؟
للحين مايدري وش معناه ؟
بالعربي احنا فاهمين التطور غلط !
يعني نفسخ لبس الدين ونلبس اللي يلبس الناس بدون وعي ولا تفكير
لين متى نمشي وراهم 
ليه مايصير هم اللي يمشون ورانا ؟
أكيد هذا يرجع لضعف شخصيتنا
والله لو كان الواحد يفكر بعقله كان ما صار ذا حاله ...
شخصيه للأسف ممسوحه ... 
وهذي حقيقه ولحد يزعل ., لازم نوقف مع أنفسنا وقفة صراحه ..
يعني وبعدين ؟ قلّدتي فلانه استفدتي شي ..
صلحتي نفس قصّة شعرها وصلحتي نفس الميك آب وبعدين .!
فادك بشي ؟
ليت ناخذ من الناس الشي الزين ...
لا معروف ماننقي الا الشين ...
وش معنى شبابنا ( الكدش ) مع احترامي ما قلدوا اليابان بالتكنولوجيا والشغل ؟
ليه ما يقلدون المصريين بالدفاره 
؟ لا بس يضحكون عليهم وأي واحد يذاكر ينادونه ( المصريه ) <<<ع فكرة هذي معيارتي ايام الثانوية لاني اشطر وحدهـ بالشلة هع هع
المصري أحسن منك أنت وياه على الأقل قدر يفيد أهله وربعه بتعليمه
وإنت وش أفدت أهلك فيه .؟ بزود الشماته بالعالم !
هو نفعهم وأنت صرت عاله عليهم
والله صحيح صرنا نفهم غلط ...!
لما تقول فلانه لفلانه ليش ناتفه حاجبك كله ..ارحمي نفسك مالك حواجب ؟! تقول لها : يالقرويه
للحين ما تطورتي ؟ هذي الموضه ألحين
اذا كانت القراوه اني أحافظ على ديني يازينها من قراوه
اذا سألت فلان : ليه ثوبك طويل يخط بالأرض أعوذ بالله ولا فستان عروس هع هع
يقول : للحين ما تطورت ؟ ألحين الشباب يمشون كذا
لا حول ولا قوة الا بالله
لما أشوف جوال شخص فيه صور ومقاطع مخلة بالأدب والذوق العام وأقوله:
ليش ما تمسحها ؟ وتحط بدالها مقاطع دينيه <~ بلاش دينيه على الأقل شي عادي
مو حرام ..؟
يقول ليه متخلف أنا.. سقها بس ؟
والله التخلف بتفكيرك الله يرحم حالك
هذولا الناس فهموا التطور غلط ! يحتاجون أحد يرحمهم ويحتاجون أحد ينبههم ويعلمهم الصح من الغلط
ويعلمهم وشو التطور الحقيقي ...
التطور : انك تاخذ الجديد وكل شي نافع لكن ما يخالف الدين ..
مشكلة شبابنا وبناتنا أول ما يوصلهم التطور يقلبونه لإستخدام سيء جداً
في الدول المتقدمه اخترعوا الطيارات والسيارات ويدرسون المواد والمركبّات وقدروا يتطورون
تطور نفع العالم مو بس مقتصر عليهم بس !
وحنا على وتيره واحده وتساؤل واحد : ليش ندرس ؟ الدراسه مالها فايده بالأخير يجلس بالبيت 
لازم نتغير ولازم نواكب التطور لكن الاهم انك تحافظ على دينك وصلاتك
كل شي له وقته ...
والله دائما بعون عبده طالما ان عبده محسن الظن فيه ..
عن أبي هريرة - رضي الله عنه - قال : قال النبي - صلى الله عليه وسلم - : يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر
تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة)
التطور تطور العقل والفكر للشي النافع ..
مو تربية كدش ... ولا نتف حاجب ... ولا اللبس الفاصخ << هع هع
لستُ ضد التطور لكن المهم تحافظ على دينك .. على مبادئك الحميده ..
أسأل الله لي ولكم التوفيق ..والجنة
اذا حصل لكم من موضوعي فائدة فانا لا ارجو الا الدعااء
عطر الرحيل