[شامخ الشامخ]

السلام عليكم ورحمة الله وبركاته


عذرا ً .. على غياب .. ليس له مبرر .. :)

على هامش حياتي .. تكبر احزان وتموت آمال = تحت ظل الظروف اللي .. مرابعها .. ورى صدري
صبرت .. وشحت ارضي بالعطا .. والشح فيها طال = وانا ادعي ..يا عسى خيط الامل ما يحرقه جمري!
تموت من العطش غابة ..واردد للشجر لا مال = سقاك الغيث .. يا ظل السباع .. و راحة القمري!
بعد صارت جفاف .. وما لقى قلبي بها مدهال = بعد صارت ..عروش ٍ خاوية .. قلت : اغتنم عمري
نويت ارحل .. مع انسام الهبوب .. ومع سراب اللال = نويت اشطب على سود الظروف .. وحيرتي بأمري
وقفت .. اجمع شتاتي .. والزمن فرقى .. وضيقة بال = وقفت .. ولا قدرت اصمد ..وخفت ابكي وانا ما ادري!!
تقبّلت الظلام .. ووحشة الطرقة بعزم ابطال = تناوشني.. مخاليب الظروف .. و تنتظر كسري
تركت اغلى الاماكن .. تحتضن حلمي .. وراس المال = وانا ادري.. لو قسى حكم الزمن .. تبقى على خبري
رحلت .. اشرب مع انفاسي ضما .. والجوع ما له فال = رحلت .. وقلبي ترفرف عروقه .. تفتقد وكري
رحلت ..اكابد الغربة.. واساير ضحكتي محتال = وحيد .. افرش من احزاني بساطي .. والتحف صبري
بقى لي .. وش بقى لي .. يا ( صدى صوتي ) ولا ينقال = سوى صوت ٍ .. ولو ما له صدى .. ما اتوقعه جهري!
بأجر الصوت في قمة جبل حاطت عليه اجبال = وابي تسمع صدى ٍ يدفع صداك.. ومنبعه نهري
بأجر الصوت .. في جزل الحروف .. وزفرة الموال = قوي ٍ دافعي .. واسكب على صدر الشعر .. شعري
تعيش اظروف .. وتموت الشيوخ .. ويكبرون اطفال = وانا مثل الفضا .. ما نزلّت بأسمي ولا قدري
انا شااااامخ .. شموخي ما انحجب دون السماء بظلال = واذا حاول بشر يكسر شموخي.. قلت له : بدري!!
يا انا جيلي .. بعد جيلي .. ولكني رجعت اجيال = ولكن للأسف .. ما به على كبري .. ومن عصري!
يا انا جيلي .. قبل جيلي .. ولكني مشيت اميال = ولكن للأسف .. ما به بشر فيهم .. على كبري !
فقدت ارجال .. لا والله عقول ٍ .. من وراها ارجال = دفنت اللي يموت بداخلي .. في مقبرة قصري !
ولكني .. رغم ذلك .. ما اقابل واقعي .. باهمال = قنوع بما حدث .. وارسم تحياتي .. على سطري
واذا طال الرحيل .. ولا كسبت من الفرح مثقال = حسافة يا ( صدى ) .. كان ابتديت اضحك .. ومن عذري!
امانة يا صدى صوتي .. معك حلمي .. وشرح الحال = تزور اغلى الاماكن .. مع نهاية .. عامها الهجري
وامانة يا صدى صوتي .. لا شح اقسى الزمن ..بوصال = ابي .. لو حفنة ٍ من رملها .. ترمى وسط قبري !!

وسلامتكم ..
مع التحية .. ابو نايف المهيمزي !

الموضوع الأصلي: فرقى .. وضيقة بال .. ! | | الكاتب: شامخ الشامخ | | المصدر: شبكة بني عبس

[العاصفة]

صح لسانك على القصيده الجميله

[فيصل الرشيدي]

وانت سالم وغانم

فقدت ارجال .. لا والله عقـول ٍ .. مـن وراهـا ارجـال=دفنت اللـي يمـوت بداخلـي .. فـي مقبـرة قصـري !

بإختصاااااااااااااار هذا الشعر والا بلاااااااااااااااااااااش ,,,

صح لسانك ولاتحرمنا جديدك ,,,

[العريض]

صح لسانك رئعه

لاهنت تقبل مروري واعجابي

[سيف عبس]

شامخ انت شااااااااااعر الابداع والحرف وانا من اشد المعجبين بك
تقبل مروري

[مرزوق العجوني]

صح لسااانك اخوي شامخ ولا هنت على الرائعه وتقبل مروري

[صلاح المهيمزي]

يا انا جيلـي .. قبـل جيلـي .. ولكنـي مشيـت اميـال
ولكن للأسف .. ما بـه بشـر فيهـم .. علـى كبـري !
فقدت ارجال .. لا والله عقـول ٍ .. مـن وراهـا ارجـال
دفنت اللـي يمـوت بداخلـي .. فـي مقبـرة قصـري !
ولكني .. رغـم ذلـك .. مـا اقابـل واقعـي .. باهمـال
قنوع بما حـدث .. وارسـم تحياتـي .. علـى سطـري
واذا طـال الرحيـل .. ولا كسبـت مـن الفـرح مثقـال
حسافة يا ( صدى ) .. كان ابتديت اضحك .. ومن عذري!



صح لسانك ابونايف

ابيات تحمل معاني واحاسيس راقيه

تقبل اعجابي

دمت بود

[فارس بن علي]

شامخ
صح الله لسانك
وبيض الله وجهك