[رشيد]

.
.
بمشي على درب له الناس يسعون
واصد عن درب الدجى والعتامه
وبقصر اليسرة عن الضيم والهون
وطلق يميني للصخا والكرامه
وبحترم نفسي وانا شخص ممنون
ومن يحترم نفسه وجوب احترامه
ماني من اللي في ذرى الحيط يمشون
ولا من اللي معتلي في مقامه
متواضع وأمشي على الحق بالهون
متوسط بالمعرفة والشهامه
ولي مجلس دايم له الناس يلفون
شرعت بابه والدلال العلامه
ما يفتح الا فيه الاجواد يدنون
ويالله عسى اللي يقترب للسلامه
هذا طريقي وكثر الناس يدرون
صديت عن درب حلاله حرامه
ميزت ربعي بين عاقل ومجنون
واكشف بليد المنفعة من سلامه
واهل المصالح لو على يوم يبنون
في يوم ثاني يرغبون الهدامه
واهل الحكي لو لك عن الناس يحكون
بيجيك يوم ويقصدك في كلامه
لا صار سيفه لاقرب الناس مسنون
يضرب رفيقه وان اقوى في عظامه
ناس مع الكلمة يروحون ويجون
بس المصيبة يدعون الفهامه
ولا نيب ديان ولا نيب مديون
ولا بغيت من الهروج الملامه
ولا طلبت من المخاليق يبكون
ولا بغيت من الحزين ابتسامه
بمشي بدربي واترك الناس يمشون
كلن على كيفه رقى كل هامه
ولا صرت انا من راعي الطيب مطعون
ابيستوي قرب الرفيق وعدامه
وأن خاب ظني بأقرب الناس وشلون
بعطيك ظني يا رفيق الندامه
-
#شعر// #حامد_زيد

.

الموضوع الأصلي: قرب الرفيق وعدامه | | الكاتب: رشيد | | المصدر: شبكة بني عبس