[خوي الذياب]

على شان مايشره عليه خيارالناّس=اغمض عيوني والسواليف امررها
وليمن بنيت احكم جدار البنا والساس=وعمّر بيوتٍ نادر اللى يعمرها
وسوي مثايل كنها البن فالمحماس= اكيّف بها روس النشاما واقدرها
تداوي تزيل اعماس من صابه الأعماس=ومثل الشباري للعدا في خواصرها
تمر الدهور ويسكن الحي بالأرماس=ولازال جيل بعد جيل يتذكرها
عرفت أن كثر الثرثره مصدر الافلاس =وبعض الاوادم قوّها في حناجرها
تزابد وتهدر صوتها يشبه الاجراس=طبيعه ودائم تحتري من يناقرها
ومن يكثر الهدره يسمونه الهلاّس=يغث المجالس والسوالف يكررها
اذا لقي له براد شاهي وعبّا الكاس=يعمّر يدمرّ والرواسي ينثرها
تقول خاض حربٍ مثل دهام ابن دواس= وياكم جيوشٍ بتّ سيفه عساكرها
ومرّه يقول انا المهلهل وانا جساس=وانا حاكم الحيره ونعمان منذرها
وبعض الحكاوي طبّها بالقدم تنداس= ويكفيك عن بعض الروايا مصادرها
ومن عادتي ماواطن الشلّه الانجاس= وقبلما اتوطأ القوم أنذر واحذرها
تبين الفعول اذا أعتلى بالسماء القرناس=وفيران مأرب تنجحر في خبايرها
ولا كل شي اصفر ذهب به ذهب ونحاس=ولوّ المصانع كل سلعه تطورها
تبين المعادن بالحما والحما حساس= اذا عرضت للنار بانت مخابرها
فلا تنخدع في بدي يبرق كما الألماس=ترا معظم الاشياء تغرّك مناظرها
ياكمن هذورٍ تحسب أنه قوي الباس=ويجحد مواقيف النشاما وينكرها
يعاند وينكر فضل (غيره) وطي الراس=وهو مايساوي فردةٍ من كنادرها
معه بندقٍ يرمي بها مالها متراس= على كل وجهه بالذخاير يثورها
ولا ياخسارة بندقٍ مالها مقياس = تشرّك كثير ولا تصوب معابرها
واباقول كلمه واضحه ما عليها اقواس= ترى الصدق عمله ماخسر من يدورها
تعلم وجرّب واضرب اخماسها واسداس= ومد القدم طوّل خطاها وقصرها
لو الخوف يسكن قلب عباس بن فرناس= ماكان ارتقى فوق الشواهق وحدرها
تعيش الاسود بعزّ ولاّ البساس بساس= عرفنا البساس وخابرينن عقايرها

الموضوع الأصلي: على شان مايشره عليه خيار الناس | | الكاتب: خوي الذياب | | المصدر: شبكة بني عبس

[صعصعة]

صح لسانك يا خوي الذياب
متمكن في حبْك الفكرة والنص
والتصوير البلاغي والتشبية وفي بعض الأبيات قد استخدمت الجزء وتريد الكل نحو : بعض الأوادم قوها في ( حناجرها )
لفظ حناجرها هو جزء من جسم الإنسان وأردت قوته أو فيما معناه تسلطه في لسانه
نص متكامل يحوي من العلوم البلاغية البديع والبيان والتصور الخاص بك مع التجربة أو المواقف التي مرت بك ونلاحظ أن هذا الإبداع لم يمر فقط بالتجربة بل على ثقافتك الأدبية والشعرية واطلاعك الواسع .