[رشيد]

.
.
لا ذعذع الشوق تلقيني على نوده
أنفض غبار الزمان وخيمة جراحي

أبترك الوقت واسهاباته وكوده
وأعطيك طير ورا سور الصدر ناحي

متجردٍ من دروس الغدر وبنوده
لا يخدعك بالهوى كثرة تبجاحي

أجيك ماني حبيبٍ يفتل عهوده
أجيك طفلٍ يدور لعبة أفراحي

بأعصاب شيخٍ من الأيام مشدوده
يخفي هموم الحياة بهول دلباحي

يعطيك حبه على جوده وماجوده
ولا كنهب الوقت ورده بالوفا فاحي

يقبل ويدبر وسبل الصدق مسدوده
وبرق السعاده على غيم النوى لاحي

وإنتي خلاصة دروب العشق وجهوده
وإنتي عناد الظلام ونصرة إلحاحي

يا حظ نفسٍ طوال العمر مقروده
ويا تسلية خاطري وحبوب مسباحي

ياللي يذوب السمار بحمرة خدوده
قولي لثقل الزمان يصافح مزاحي

الوقت يمضي عليّ بايام معدوده
أببتسم له ما دامه غيّب صياحي

وكان الكرز لا تمايل وسط عنقوده
وما شد ذوقي وعيني ماني بصاحي

وإن كان شفتي بميل النفس منقوده
من للكرز يقطفه والا لتفاحي

يا ألذ واغلى عذوقٍ شالها عوده
بأرقى على العود كان العذق ما طاحي

ما دام ما روّحت بيضه على سوده
الصبح يبقى طليب الشمس بمراحي
.
.
#شعر// فالح الناهي
.
.

الموضوع الأصلي: برق السعادة | | الكاتب: رشيد | | المصدر: شبكة بني عبس