[سعد علي]

قامت تجي في ساع وتروح في ساع
ماهي بعميا لا ولا بمغبونه

صارت تراودني لها عام باوجاع
حييتها من هاجسً ما تخونه

حنن ركايبها مضميات وجياع
بسباب علمً دايمً يذكرونه

قعدت اسايسها على اثلاث وارباع
ما ودي اكتب شي ما يفهمونه

ناسً تحاول بس تخريب الاوضاع
ما باقي الا ضلعً يحركونه

مدري جهل ولّا غبا راحت اقطاع
هو ليه لخطا شخص ما يعلمونه

اللي يحسبه بالسما ؟ضارب القاع
وهو يحسبه بالسما مع مزونه

ما يقدّر الخوه ولا يعرف الباع
ويشيش راسه كذب للي يجونه

استغفرالله مير ما يثمن الصاع
وشلون ينسى ناسً يشجعونه

الله واكبر يا زمن صرت تنباع
في خوتً ماهي بعز ومصونه

ناسً ورا تنكس ورا وش هالاطباع
ولضيف حاشي بالقى يقدمونه

ماهو كرم مير البخل صار طماع
يطمع بشيً ويش دونك ودونه

لا تحسبون ان الوفا بالزمن ظاع
باقي ولو به ناس عيّت تصونه

اللي يبيع العز لابد ينباع
ماهمهم وزنه ولو يخسرونه

من كثّر النمه على كل سماع
لابد من يومً يبي يكشفونه

وعرف ترا بالوقت طلقين واسباع
حوض المنايا بالقا ياردونه

ما بديت شعري يا عرب لجل الابداع
ولّا عشان اغرّده في لحونه

لكن يغيض القلب والنفس تلتاع
واصبر على مر الزمان وطعونه

واشره على اللي له قدر بين الاضلاع
وشلون خاوى ناس ما يقدرونه

ما يدري اني حاسب حساب الاقلاع
وورثت طيبي قبلهم يارثونه

اهل المجامل بالوجه واهل الاطلاع
كل شي عنّك ودّهم يعرفونه

الله واكبر يا زمن صرت تنباع
في خوتً ماهي بعز ومصونه

الشاعر محمد نور جريبيع الداموكي الرشيدي

الموضوع الأصلي: لا تحسبون ان الوفا بالزمن ضاع | | الكاتب: سعد علي | | المصدر: شبكة بني عبس

[ساري الغدرا]

من كثّر النمه على كل سماع
لابد من يومً يبي يكشفونه

الله الله
قصيدة جزله وابيات طالعة من قريحة قادرة
صح لسان الشاعر والناقل
ومشكور على النقل المميز
تحيايتي

[كبرياء امراة]

سلمت الأيادي