[ناصر المظيبري]

اضع بين ايديك قصيده للشاعر القادم بقوة الزلزال مستقبل المهامزه خاصه وبني رشيد عامه وهو الشاعر حجاج ابن عمار المهيمزي وها انا ااضع اليكم مجاراة لقصيدة محمد ابن فطيس الشهريه

خبرتو حدن يبكي على واحدٍ يبكيه=وخبرتو حدٍ مسجون مايبغي افراجه

وهنا مجارات الشاعر حجاج لابن فطيس

على مستوى موج التلاطم وبحر التيه=يهيض الضمير الراكد وتلطم امواجه
نبش جرحي ابن فطيس واجبرني اجاريه=وانا ماعلي من العزا والوزا حاجه
تكلم ضميرٍ كشف الوقت عن خافيه=وهو قبلها ماوالله يحطم اسياجه
ليا صار لغلى شخص عندك ثلاث اوجيه=وش يعرفك من وين دربه ومنهاجه
تصبر وخل النيه الزينه تمشيه=ولابد له من ليلةٍ تطفي اسراجه
على شان مايرميك باللوم والتشريه=ليا قل ماتحمل له وطاحت ابراجه
رفيق الزمان اللي من اول بس اداريه=واساقيه من بحر الشعر لوله وعاجه
ولو يطلب اغلى ماملك من الحياه اعطيه=ولابخل بشيٍ يمكن يسبب ابهاجه
على شان شيٍ غالي وصاحبي مغليه=لبس فوق تشريهاته اوسامه وتاجه
على ظني اللي كنت رغم الظروف اوليه=جميع اهتمامت الضمير وتوهاجه
لكن الحقيقه تضرب الراس وتصحيه=ويصحى ويلقى واقع الشمس منباجه
ويدخل بغيبوبه وليل اسود ويدويه=ويونس بصدره علط الارماح خجاجه
ويستدرك انفاسه ويضحك على ماضيه=ويرجع على ماضيه ويفتش ادراجه
ويلقى الدليل اللي عليه الغلا معميه=ويندم على مافاته وسبب ازعاجه
مع ان الكلام اللي يجيني عنه طاويه=تحت جنح تظليل الكذوب وتدراجه
انا ليش يوم اسمع بهالهرج والتشويه=وانا خابر ان الناس بالناس هراجه
لكن الصحيح انه حقيقه ولو مابيه=مصيره حقيقه وسطها النار سراجه
ومع ذالك الوضع المحير ومايعنيه=من الصدمه اللي بين الاضلاع رجاجه
ماوالله يخلي قلبي الانتقام يجيه=لو الغبن يسمر فيه ويقطع امشاجه
تركته وقفيت وخلاص انتهى ماضيه=ودونه ضربت الباب قفله ومزلاجه
هو الله يسمح دربه وماحصل يكفيه=وانا قلبي من الوقت يكفيه ماواجه

وسلامتكم
اتمنى ان تنال اعجابكم وذايقتكم الشعريه

الموضوع الأصلي: نبش جرحي ابن فطيس واجبرني اجاريه | | الكاتب: ناصر المظيبري | | المصدر: شبكة بني عبس

[العـير]

قصيده شاامخه بكل صراحه تحمل الابداااع والفن
اعجبني بكل صراحه
انا ليش يوم اسمع بهالهرج والتشويه=وانا خابر ان الناس بالناس هراجه

[ابوصالح لرشيدي]

صح السان يابن عمار قصيدة جزله وان شاء الله نشوفه من ابرز النجوم في السااحه الشعريه ..

[قناص الضواري]

صح السان شاعرها وتسلم يمين ناقلها

[ملح وقبله]

صـــح الــــــــــســـــــــانــك